លោក ខៀវ សុភ័គ អ្នកនាំពាក្យក្រសួងមហាផ្ទៃ ត្រូវបានស្រង់សំដី មកបញ្ជាក់ថា អាជ្ញាធរនឹងចាត់វិធានការ ទៅតាមផ្លូវច្បាប់ ប្រសិនជាយុទ្ធនាការ «ស្នាមមេដៃមួយ ដើម្បីកោះត្រល់» មិនមានច្បាប់អនុញ្ញាតត្រឹមត្រូវទេនោះ។ យុទ្ធនាការនេះ បង្កើតឡើងដោយគណបក្សខ្មែរក្រោក ដែលគេស្គាល់ថា ជាគណបក្ស​ដឹកនាំ ដោយលោក សុខសុវណ្ណ វឌ្ឍនាសារប៊ុង ហៅនៅលើបណ្ដាញសង្គម «William Guang»។

ជាប្រតិកម្មតបវិញ លោក «William Guang» បានហៅការព្រមានេះ ថាជារឿងអយុត្តិធម៌ ហើយថានឹងនៅតែរក្សាជំហរ ក្នុងការធ្វើយុទ្ធនាការនេះដដែល នៅផ្ទាល់នឹងទីស្នាក់ការ​គណបក្ស។

ការចុះផ្សាយ របស់ប្រព័ន្ធផ្សព្វផ្សាយក្នុងស្រុក បានស្រង់សំដីរបស់លោក ខៀវ សុភ័គ មកបញ្ជាក់ថា «ការធ្វើកិច្ចការអ្វី​ក៏ដោយ ទាក់ទងនឹងសន្តិសុខជាតិ គឺត្រូវ​មាន​លិខិត​ ស្នើសុំទៅ​អាជ្ញាធរ​ ឲ្យបា​នត្រឹមត្រូវ​ ដោយអ​នុវត្តទៅ​តាម​ច្បាប់បាតុក​ម្ម ដោយ​សន្តិវិធី»។

សារព័ត៌មានទាំងនោះ នៅបានស្រង់សំដី របស់អភិបាលរាជធានី លោក ឃួង ​ស្រេង មកបញ្ជាក់បន្ថែមថា៖ ​«ការធ្វើអ្វី​ គឺត្រូវអ​នុវ​ត្តទៅ​តាមច្បាប់ ​ពី​ព្រោះគាត់​ជា​គណបក្សនយោបាយ ​ដូច្នេះត្រូវសិ​ក្សាច្បាប់ ​ឲ្យបានច្បាស់​លាស់ ​ដើម្បីជៀស​វាង​នូវខុសឆ្គ​ង អំ​ពីបញ្ហា​ច្បាប់ ​វាប៉ះ​ពាល់ទៅ​ដ​ល់សង្គមជាតិ» ។

តែប្រធានគណបក្សខ្មែរក្រោក បានពន្យល់​បញ្ជាក់វិញថា៖ «ការផ្ដិតមេដៃ ជាសិទ្ធរបស់ពលរដ្ឋ ដែលមានចែងក្នុងរដ្ឋធម្មនុញ្ញ។ ហេីយយុទ្ធនាការផ្ដិតមេដៃ គឺធ្វេីឡេីងនៅទីស្នាក់ការ ពុំទាក់ទងដល់បាតុកម្មឯណានោះទេ។»។

លោក សុខសុវណ្ណ វឌ្ឍនាសារប៊ុង បានបន្តថា៖ «ពេលនេះដឹងហេីយថា នរណាជានរណា! ខ្ញុំឈឺចាប់ណាស់ ត្រង់បរទេស​វាឈ្លានពានដីយេីង យ៉ាងគឃ្លេីនបំផុត ហេីយអ្វី ដែលឈឺចាប់បំផុត គឺនៅពេលដែលយេីងនិយាយ យេីងចេញមុខទាមទារ នូវអ្វីដែលយេីងបាត់បង់សោះ គឺមានខ្មែរ​មួយចំនួនតូចហ្នឹង មិនព្រម​ជួយចូកជួយចែវ ទប់ស្កាត់ទង្វេីបរទេសឈ្លានពានទេ បែរជាទៅការពារ​ទង្វេីឈ្លានពាន​របស់​បរទេស ហេីយវាយប្រហារ មកខ្មែរគ្នាឯងទៅវិញ»។

កាលពីយប់ ថ្ងៃទី៣១ ខែកក្កដា ឆ្នាំ២០១៨ គណបក្សខ្មែរក្រោក បានបង្ហាញ​តាមរយៈ​សេចក្ដី​ជូនដំណឹងមួយ ស្ដីពីយុទ្ធនាការ «ស្នាមមេដៃមួយដេីម្បីកោះត្រល់» ដែលនឹងចាប់ផ្ដើមធ្វើ នៅថ្ងៃទី០៨ ខែសីហា ឆ្នាំ២០១៨ខាងមុខ ដើម្បីប្រ​មូលស្នា​មមេ​ដៃ​ប្រជាព​លរដ្ឋ​ នៅ​ទូទាំង​ប្រទេស ក្នុងបំណងរៀបញត្តិ ប្តឺងទៅក្រុមប្រឺក្សាធនុញ្ញកម្ពុជា មុននឹងបន្តបណ្ដឹងនេះ ទៅតុលាការអន្តរជាតិ នៅក្នុងជំហានក្រោយរបស់ខ្លួន។

អ្នកច្បាប់មួយរូប បានពន្យល់ប្រាប់ទស្សនាវដ្ដីមនោរម្យ.អាំងហ្វូ​ថា ក្នុងដំណាក់កាលនេះ ទោះក្នុងជំហានណា ក៏មិនអាចធ្វើទៅរួចដែរ ជាពិសេសយន្ដការតុលាការអន្តរជាតិ។ អ្នកច្បាប់រូបនោះ បានពន្យល់ថា ក្នុងរឿងជម្លោះទឹកដី ស្ថាប័នសាលាក្ដីយុត្តិធម៌អន្តរជាតិ (ហៅកាត់តាមភាសាអង់គ្លេស ICJ ឬភាសាបារាំង CIJ) ទទួលយកបណ្ដឹង តែពីសំណាក់រដ្ឋាភិបាល ដែលតំណាងឲ្យរដ្ឋប៉ុណ្ណោះ៕