​ក្រុមជម្រើសជាតិ អាហ្សង់ទីន កំពុងឈរនៅមាត់ជ្រោះមរណៈ បន្ទាប់ពីបានប្រកួតចាញ់យ៉ាងធ្ងន់ធ្ងរ នៅយប់ថ្ងៃព្រហស្បត្តិនេះ ទល់នឹងក្រុម ក្រូអាស៊ី ដែលទទួលបានសំបុត្រ ឡើងទៅវគ្គបន្ត (ឈ្នះទាំងពីរប្រកួត បាន៦ពិន្ទុ) ជាស្ថាពរ។ ជិតធ្លាក់ជ្រោះ ព្រោះក្រុម អាហ្សង់ទីន រកបានតែមួយពិន្ទុ ពីក្នុងចំណោមការប្រកួតទាំងពីរប៉ុណ្ណោះ។

គ្រាប់បាល់ទាំងបី របស់ក្រុម ក្រូអាស៊ី រកបាន​នៅនាទីទី ៥៣ ដោយកីឡាករ «Rebic» - នៅនាទីទី ៨០ ដោយកីឡាករ «Modric» មុននឹងបំបាក់ក្រុម អាហ្សង់ទីន ងើបមុខលែងរួច ដោយគ្រាប់ទីបី នៅនាទីទី ៩០+១ ដោយកីឡាករ «Rakitic»។

ផ្ទុយពីការទន្ទឹងរង់ចាំ របស់អ្នកស្នេហាកីឡាបាល់ទាត់ នៅជុំវិញពិភពលោកនោះ កីឡាករ លីយ៉ូនែល ម៉េស៊ី (Lionel Messi) ដែលជាខ្សែប្រយុទ្ធ​ដ៏ល្បី (កំពុងទាត់ឲ្យក្រុម បាសឺឡូន) កម្រិតពិភពលោក មិនបានបញ្ចេញសកម្មភាពអ្វី ដែលគួរឲ្យកត់សម្គាល់ នៅក្នុងការប្រកួតទេ។ រូបរាងកីឡាករ នៅក្នុងការប្រកួត ប្រៀបបាននឹងស្រមោលមួយ ដែលមិនសូវទទួលបានបាល់ ពីកីឡាកររួមក្រុម ឬបើមិនដូច្នេះទេ កំពូលកីឡាករ​ត្រូវបានខ្សែការពារ ក្រូអាស៊ី ចាប់ជាប់ជានិច្ច នៅពេលបញ្ជូនបាល់ មកដល់​ជិតទីរបស់ ក្រូអាស៊ី។

រឿងដែលសំខាន់មួយទៀត ដែលធ្វើឲ្យក្រុម អាហ្សង់ទីន ចាញ់ធ្ងន់ធ្ងរនោះ គឺកំហុស​ដែល​​មិនអាច​ជួសជុល​បាន របស់អ្នកចាំទី អាហ្សង់ទីន កីឡាករ «Caballero»។ គ្រាប់បាល់ដំបូងរបស់ ក្រូអាស៊ី បណ្ដាលមកពីការទាត់ចេញ របស់កីឡាករចាំទីរូបនេះ ទៅចំជើង របស់ខ្សែប្រយុទ្ធ ក្រូអាស៊ី កីឡាករ «Rebic» ដែលគ្រាន់តែបង្ហើយ ក្នុងការទាត់ត្រឡប់មកវិញ ដើម្បីបំប៉ោងទីក្រុម អាហ្សង់ទីន ប៉ុណ្ណោះ។ សម្រាប់គ្រាប់បាល់​ទីពីរ របស់ក្រូអាស៊ី ក៏អាចចាត់ទុក ថាជាកង្វះប្រសិទ្ធភាព របស់អ្នកចាំទី អាហ្សង់ទីន ដែ។ ដោយហេតុថា គ្រាប់បាល់របស់កីឡាករ «Modric» មួយនេះ ជាគ្រាប់បាល់ ដែលទាត់ពីចំងាយ។

» វីដេអូសង្ខេប នៃការប្រកួតរវាងក្រុម អាហ្សង់ទីន និងក្រុម ក្រូអាស៊ី៖

ជ័យជំនះដ៏ត្រចះត្រចង់ បានផ្ដល់៣ពិន្ទុ ឲ្យក្រុម ក្រូអាស៊ី ក្នុងការឡើងមកឈរ នៅចំណាត់ថ្នាក់កំពូល នៃពូល D និងទទួលបានសំបុត្រ ឡើងទៅវគ្គ ១ភាគ៨ ជាស្ថាពរហើយ។ ប៉ុន្តែចំណាត់ចុងក្រោយ ដែលចេញពីការប្រកួតជុំទីពីរ នឹងឲ្យដឹងជាផ្លូវការ បន្ទាប់ពីលទ្ធផល នៃការប្រកួតរវាងក្រុម នីហ្សេរីយ៉ា និងក្រុម អ៊ីស្លង់ នៅរសៀលស្អែក៕