សង្គ្រាមពាក្យសំដី នៅតែបន្តហូរ! នៅថ្ងៃនេះ លោក អេង ​ឆៃអ៊ាង អនុប្រធានគណបក្សសង្គ្រោះជាតិ ដែលកំពុងមានវត្តមាន នៅសហរដ្ឋ​អាមេរិក បានសរសេរសារ​បញ្ឆិតបញ្ឆៀង ដាក់លោកនាយករដ្ឋមន្ត្រី ហ៊ុន សែន ដោយទំនងជាហៅ​បុរស​ខ្លាំង​រូបនេះ ថាជា«មនុស្សពាល»។ ហើយ​នេះ ជាប្រតិកម្មដ៏ខ្លីមួយ បន្ទាប់ពីការការថ្លែងជាសាធារណៈ របស់នាយករដ្ឋមន្ត្រីកម្ពុជា កាលពីម្សិលម៉ិញ ដែលប្រើពាក្យ«ហ្អែង អញ អាមឹង...» ជាច្រើន។

មេដឹកនាំគណបក្សប្រឆាំង លោក អេង ឆៃអ៊ាង បានសរសេរនៅលើបណ្ដាញសង្គមថា៖ «មនុស្សពាល អវិជ្ជា ចូលចិត្តប្រើពាក្យ" ហ្អែង អញ អា មឹង..."។ មនុស្សប្រភេទនេះ មិនស័ក្តិសមជាមេដឹកនាំប្រទេសឡើយ។»

កាលពីម្សិលម៉ិញ នៅចំពោះក្រុមកម្មករ កម្មការិនីច្រើនពាន់នាក់ ក្នុងពិធីសំណេះសំណាលមួយ នាខណ្ឌពោធិ៍សែនជ័យ​ រាជធានីភ្នំពេញ លោកនាយករដ្ឋមន្ត្រី ហ៊ុន សែន បានប្រកាសដោយ ពាក្យពេជន៍ដ៏គ្រោតគ្រាតថា លោកនឹងមិន«ជ្រលក់មាត់» និយាយពីគណបក្សសង្គ្រោះជាតិទៀតទេ។ លោកបានថ្លែងដូច្នេះ បន្ទាប់ពីលោកបានបន្ទន់ជំហរ កាលពីម្សិលម្ងៃ ប្រាប់ឲ្យមន្ត្រីគណបក្សប្រឆាំង បង្កើតគណបក្សថ្មីមួយទៀត ដើម្បីចូលរួមការបោះ​ឆ្នោត​ខាងមុខ។

នាយករដ្ឋមន្ត្រីបីទសវត្សន៍ជាង របស់កម្ពុជា បានថ្លែងឡើងថា៖ «អស់​លោក​អ្នក​កុំ​ទាញ​គេ​ ឲ្យ​ទទួល​កំហុស​ជាមួយ។ កុំ! មិន​ចាំបាច់​ជ្រលក់​មាត់​ទេ។ ហ្អែង​មិន​បង្កើត​បក្ស​ថ្មី​ទេ មុខ​ដូច​ម៉ែ​អញ!  យើង​មិន​បាន​ដេញ​អ្នក​ឯង​ទេ អ្នក​ឯង​ចេញ​ទៅ​ក្រៅ​ ស្រុក​ខ្លួន​ឯង​តើ!»។

លោក ហ៊ុន សែន បានពន្យល់ថា ការហៅមន្ត្រីប្រឆាំងទាំងឡាយ ឲ្យបង្កើតគណបក្សនយោបាយថ្មី គឺជា«បំណងល្អ»របស់លោក ខណៈ​គណបក្ស​សង្គ្រោះជាតិ ត្រូវបានរដ្ឋាភិបាលលោក​រំលាយរួចហើយនោះ។ លោកថា៖ «ជួនកាល​យើង​មាន​បំណង​ល្អ តែ​គេ​បែរ​ជា​យល់​ថា យើង​បង្ខំ​ឲ្យ​ធ្វើ​តាម។ មិន​បាច់​ធ្វើតាម ហ៊ុន សែន ទេ មិន​បាច់​ធ្វើ​ទេ ទៅ​ងាប់​ឯណា​ងាប់​ចុះ! និយាយ​ស្រួល​ អា​នេះ​ថា​យើង​ទន់។»។

ប្រមុខដឹកនាំរដ្ឋាភិបាលកម្ពុជា ត្រូវបានគេស្គាល់​ជាទូទៅ ថាតែងបានប្រើពាក្យដ៏«អសុរស» ក្នុងការឆ្លើយឆ្លងជាសាធារណៈ ហៅមន្ត្រីគណបក្ស​ប្រឆាំង ជាពិសេសលោកបានហៅមេដឹកនាំគណបក្សប្រឆាំង ដោយប្រើពាក្យថា «អាគុក» ឬ «អាកូនជនក្បត់ជាតិ» ជាដើម៕