ក្រុម បាសា បញ្ជាក់​ជា​ផ្លូវ​ការ ពី​ការ​ចាក​ចេញ​របស់ ណីម៉ា

ក្រុមបាល់ទាត់ បាសឺឡូន (FC Barcelone) ដ៏ល្បីនិងដ៏ធំ របស់ប្រទេសអេស្ប៉ាញ បានផ្សាយសេចក្ដីជូនដំណឹង ជាផ្លូវការនៅថ្ងៃនេះ ពីការផ្ទេរដ៏សំខាន់ ប្រចាំសតវត្សន៍មួយ របស់ខ្សែប្រយុទ្ធរបស់ខ្លួន គឺកីឡាករ ណីម៉ា (Neymar) ទៅកាន់ក្រុមបាល់ទាត់ប៉ារីស។ នៅក្នុងសេចក្ដីជូនដំណឹងនោះ ក្រុមបាសា បានបញ្ជាក់ថា កីឡាករ ណីម៉ា ដែលអមដំណើរដោយឪពុក និងភ្នាក់ងាររបស់ខ្លួន បានជូនដំណឹងនៅព្រឹកថ្ងៃពុធនេះ ថាខ្លួនចង់ចាកចេញពីក្រុម។
ក្រុម បាសា បញ្ជាក់​ជា​ផ្លូវ​ការ ពី​ការ​ចាក​ចេញ​របស់ ណីម៉ា
កីឡាករ ណីម៉ា តារាបាល់ទាត់ជាតិប្រេស៊ីល ដ៏ល្បី ដែលកំពុងចាកចេញពីក្រុមបាល់ទាត់ បាសឺឡូន ទៅកាន់ក្រុមប៉ារីស។ (រូបថតឯកសារ)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០២ សីហា ២០១៧
  • កែប្រែចុងក្រោយ: August 02, 2017
  • ប្រធានបទ: ការផ្ទេរកីឡាករ
  • អត្ថបទ: មានបញ្ហា?
  • មតិ-យោបល់

បន្ទាប់ពីបានមកដល់ទីលានហ្វឹកហាត់ នៅព្រឹកថ្ងៃពុធនេះ ក្នុងក្រុងបាសឺឡូន (Barcelone - ប្រទេសអេស្ប៉ាញ) បានប្រមាណជាកន្លះម៉ោងប៉ុណ្ណោះ កីឡាករ ណីម៉ា (Neymar) ដែលមកដល់ម៉ោងនេះ នៅជាខ្សែប្រយុទ្ធ របស់ក្រុមបាល់ទាត់ បាសឺឡូន (FC Barcelone) នៅឡើយ បានបើករថយន្ដ​ចាកចេញទៅវិញ យ៉ាងស្ងាត់ស្ងៀម។ នៅបន្តិចក្រោយមក ទើបគេដឹងថា កីឡាករជាតិប្រេស៊ីលរូបនេះ បានចំណាយពេលបន្តិចបន្តួចនេះ ដើម្បីជូនដំណឹងទៅកាន់ក្រុមបាសឺឡូន ពីបំណងរបស់ខ្លួន ដែលចង់ចាកចេញពីក្រុម និងបានថ្លែងពាក្យលាគ្នា ​ជាចុងក្រោយ ទៅកាន់កីឡាកររួមក្រុមដទៃទៀត។

ការផ្ទេរកីឡាករ ប្រចាំសតវត្សន៍...

នៅក្នុងសេចក្ដីប្រកាសព័ត៌មាន របស់ក្រុម បាសឺឡូន ដែលបានចេញផ្សាយជាផ្លូវការ នៅពេលក្រោយមក ក៏បានបញ្ជាក់ដែរ ពីបំណងរបស់ខ្សែប្រយុទ្ធរបស់ខ្លួន និងបានបញ្ជាក់ថា ដើម្បីអាចចាកចេញ​ពីក្រុមបាន កីឡាករ ណីម៉ា ឬក្រុមបាល់ទាត់ ដែលត្រៀមទទួលយកកីឡាកររូបនេះ ទៅទាត់នៅក្នុងរដូវកាលខាងមុខ ត្រូវបង់សំណង​ឲ្យក្រុមបាសឺឡូន តាមកិច្ចសន្យាកីឡាករ នូវទឹកប្រាក់២២២លានអ៊ឺរ៉ុប ដែលជាទឹកប្រាក់ដ៏ថ្លៃបំផុត មិនដែលធ្លាប់មាន នៅក្នុងប្រវត្តិនៃការផ្ទេរកីឡាករ។

ក្រុមបាសឺឡូន បានអះអាង​នៅក្នុង​សេចក្ដី​ប្រកាស​ព័ត៌មាន​នោះ​ទៀត​ថា ខ្លួនបានបង្កកប្រាក់លើកទឹកចិត្ត ចំនួន២៦លានអ៊ឺរ៉ូ ដែលគ្រោងផ្ដល់ជូនកីឡាករ ណីម៉ា ក្នុងការបន្តកិច្ចសន្យា ជាមួយខ្លួនទៅមុខទៀត។ សេចក្ដីប្រកាសព័ត៌មាន បានសរសេរថា៖ «ទឹកប្រាក់​២៦លានអ៊ឺរ៉ូនេះ ត្រូវបានតំកល់ទុក ក្នុងគណនី របស់សារការី (ប្រហាក់ប្រហែលនឹងមេធាវី) ដើម្បីរង់ចាំការសម្រេច របស់កីឡាករ ណីម៉ា ថានឹងនៅក្នុងក្រុម​បន្តទៀត»។

ក្រុមបាសឺឡូន បានបញ្ជាក់បន្ថែមថា នៅរយៈពេលនេះ កីឡាករ ណីម៉ា ត្រូវបានអនុញ្ញាតឲ្យសម្រាក ដោយមិនចាំបាច់ហ្វឹកហាត់ ដូចការកំណត់ទុករបស់ក្រុម ដែលតម្រូវឲ្យកីឡាករទាំងអស់ ត្រូវចូលហាត់ជាធម្មតាវិញ ចាប់ពីថ្ងៃនេះតទៅ។

«គ្រាប់បាល់»នៅពេលនេះ កំពុងស្ថិតក្នុងជើង របស់ក្រុមប៉ារីស

ដំណឹងចុងក្រោយ ដែលទើបធ្លាក់មកដល់ បានឲ្យដឹងថា ទឹកប្រាក់សំណង ចំនួន២២២លានអ៊ឺរ៉ូ អាចនឹងត្រូវក្រុមប៉ារីស-សាំងហ្សែរម៉ាំង (Paris Saint germain) ផ្ទេរទៅកាន់ក្រុមបាសឺឡូន នៅល្ងាចនេះ ខណៈ​ការចុះហត្ថលេខា ទៅលើកិច្ចសន្យាជាមួយក្រុមប៉ារីស អាចនឹងត្រូវធ្វើនៅថ្ងៃស្អែក ឬខាងស្អែកយ៉ាងយូរ ខណៈកីឡាករ ណីម៉ា បានចាកចេញពីក្រុង បាសឺឡូន តាមជើងយន្ដហោះ ដើម្បីទៅសម្រាកកាយមួយរយៈខ្លី នៅក្នុងរាជធានី ឡុង នៃចក្រភពអង់គ្លេស៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...