តបតាមការអញ្ជើញរបស់ព្រះមហាក្សត្រកម្ពុជា លោក ង្វៀង ហ្វូជុង (Nguyen Phu Trong) អគ្គលេខាធិការគណៈកម្មាធិការមជ្ឈឹមបក្សកុម្មុយនិស្ត វៀតណាម នឹងមកធ្វើទស្សនកិច្ចនៅកម្ពុជា សម្រាប់រយៈពេល៣ថ្ងៃ និងគ្រោងចុះហត្ថលេខា នៅលើសេចក្ដីថ្លែងការណ៍រួម វៀតណាម-កម្ពុជា មួយចំនួនផង។ នេះ បើតាមសេចក្ដីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សាយ កាលពីថ្ងៃទី១៦ ខែកក្កដាម្សិលម៉ិញ។

សេចក្ដីប្រកាសព័ត៌មាននោះ បានអះអាងថា ក្រៅពីចូលក្រាបបង្គំគាល់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នៅក្នុង ប្រាសាទទេវាវិនិច្ឆ័យ និងចូលក្រាបបង្គំគាល់ សម្តេចព្រះមហាក្សត្រី នរោត្តម មុនិនាថ សីហនុ នៅព្រះរាជដំណាក់គន្ធបុប្ផា នៃព្រះ​បរម​រាជវាំងនោះ លោក ង្វៀង ហ្វូជុង នឹងមានគម្រោងចូលថ្វាយបង្គំ មេដឹកនាំព្រះសង្ឃ និងជួបមេដឹកនាំកម្ពុជាកំពូលៗ រួមមាន៖

- ព្រះតេជគុណ ទេព វង្ស សម្តេចព្រះមហាសង្ឃរាជ នៃគណៈមហានិកាយ
- ព្រះតេជគុណ បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ
- លោក សាយ​ ឈុំ ប្រធានព្រឹទ្ធសភា និងជាអនុប្រធានគណបក្សប្រជាជនកម្ពុជា
- លោក ហេង សំរិន ប្រធានរដ្ឋសភា និងជាប្រធានកិត្តិយស​គណបក្សប្រជាជនកម្ពុជា
- និងលោក ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។

នៅក្រោយជំនួប ហ៊ុន សែន - ង្វៀង ហ្វូជុង នឹងមានពិធីចុះហត្ថលេខាមួយ ទៅលើសេចក្ដីថ្លែងការណ៍រួម ស្តីពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងវៀតណាម ដែលធ្វើឡើង​ក្រោមអធិបតី របស់មេដឹកនាំទាំងពីរ។ នៅក្នុងរបៀបវារៈចុងក្រោយ នៃដំណើរទស្សនកិច្ចនោះ លោក ង្វៀង ហ្វូជុង និងលោក សាយ ឈុំ នឹងរួមគ្នា ទៅសម្ពោធស្ដូបអនុស្សាវរីយ៍ ស្ដីពីមិត្តភាពកម្ពុជា-វៀតណាមមួយ នៅក្នុងខេត្តព្រះសីហនុ។

សេចក្ដីប្រកាសរបស់ក្រសួងការបទេសកម្ពុជា បានអះអាងទៀតថា ដំណើរទស្សនកិច្ច«ផ្លូវរដ្ឋ» របស់លោក ង្វៀង ហ្វូជុង នឹងបញ្ជាក់ពីមិត្តភាព និងកិច្ចសហប្រតិបត្តិការ «ដ៏រឹងមាំ និងយូរលង់» រវាងប្រទេសទាំងពីរ ដែលបានប្រារព្ធពិធីរំលឹកខួបទី ៥០ នៃទំនាក់ទំនងការទូតរវាងគ្នា ក្នុងឆ្នាំ២០១៧នេះ៕