មនុស្សគ្រប់គ្នា តែងតែចង់បានភាពជោគជ័យ ក្នុងជីវិតរបស់ពួកគេ។ ទោះបីជាអ្នកស្ថិតក្នុងភាព ជាយុវវ័យម្នាក់ក៏ដោយ ក៏អ្នកអាចទទួលបានភាពជោគជ័យទាំងនេះ នៅក្នុងជីវិត ដូចមនុស្សទាំងនោះដែរ។ ហើយវា ក៏មិនមានភាពលំបាក ណាស់ណា រហូតធ្វើមិនកើតទេ។

ចំណុចទាំង១០ នេះ នឹងអាចជួយឲ្យអ្នក ក្លាយទៅ ជាយុវវ័យមួយរូប ដែលទទួលបានជោគជ័យ។

១. ធ្វើបានលទ្ធផលល្អ ក្នុងសាលា៖
ទោះបីជាពេលនេះ មានការធុញទ្រាន់បន្តិចក៏ដោយ ការអប់រំនឹងជួយអ្នកក្លាយទៅជាមនុស្ស មួយរូប ដែលមានប្រយោជន៏​សំរាប់សង្គម។ ការទទួលបានភាពឥតខ្ចោះពីសាលាដូចជា ធ្វើ អ្វីៗឲ្យបានល្អ ស្តាប់គ្រូបង្រៀន ធ្វើលំហាត់ ព្យាយាមយក​ចិត្តទុកដាក់ និងទទួលបានចំណាត់ ថ្នាក់ល្អ។ ធ្វើដូចនេះ នឹងអាចជួយអ្នកឲ្យមានភាពងាយស្រួល ក្នុងការបន្តទៅសិក្សា​នៅ​ថ្នាក់សាកលវិទ្យាល័យ អនុបណ្ឌិត ឬបណ្ឌិត ដែលនឹងអាចឲ្យអ្នកទទួលបានការងារល្អនាពេល អនាគត។

២. ធ្វើអ្វីដែលល្អ ក្នុងសហគមន៏របស់អ្នក៖
ការងារស្ម័គ្រចិត្តមិនត្រឹមតែជួយឲ្យ សហគមន៏របស់អ្នកមានភាពរីកចំរើននោះទេ វាថែមទាំង ធ្វើឲ្យអ្នកសប្បាយចិត្ត​ទៀត​ផង។ តាមការស្រាវជ្រាវបង្ហាញថា អ្នកធ្លាប់ធ្វើការស្ម័គ្រចិត្ត មាន ទឹកចិត្តតស៊ូ និងមិនងាយបាក់ទឹកចិត្ត ជាងអ្នកដែលមិន​ធ្លាប់ធ្វើ។ ស្វែងរកឳកាសការងារស្ម័គ្រ ចិត្ត ដែលអ្នកចាប់អារម្មណ៏មកធ្វើ។ ឧទាហរណ៏៖ បើអ្នកចូលចិត្តពពួកសត្វ អ្នក​អាច​ធ្វើការនៅ សួនសត្វ។ បើអ្នកចូលចិត្តជួយមនុស្ស ធ្វើការនៅតាមភោជនីយដ្ឋានដូចជាធ្វើស៊ុប ឬមុខម្ហូប ផ្សេងៗ។ បើអ្នក​ស្រលាញ់ និងចង់ជួយថែរក្សារបរិដ្ឋាន អាចធ្វើជាអ្នកដាំដើមឈើ។ នៅពេល ដែលអ្នកជួយដល់អ្នកដទៃ ធ្វើឲ្យអ្នកកាន់​តែ​មានអារម្មណ៏ល្អសំរាប់ខ្លួនឯង។

៣. បង្កើតគោលដៅជីវិតរបស់អ្នក និងធ្វើអ្វីៗសំដៅទៅរកវា៖
ចាប់ផ្តើមគិតពីអាជីព ដែលអ្នកចង់ធ្វើ ប៉ុន្តែត្រូវជ្រើសរើសយកជម្រើសដែលល្អមួយ ដោយ ផ្តោតទៅលើអ្វី ដែលអ្នកចាប់​អារម្មណ៏ និងកម្លាំងរបស់អ្នកអាចធ្វើបាន។ នេះអាចជាការងារ ក្នុងជីវិតរបស់អ្នកជារៀងរហូត។ អ្នកក៏អាចធ្វើអ្វីផ្សេងៗ ដែលមិនទាក់ទងទៅនឹងគោលដៅ អាជីពរបស់អ្នកបាន ដូចជាបង្កើនសមត្ថភាពទំនាក់ទំនងក្នុងសង្គម ទទួលបាន​ចំណាត់​ថ្នាក់ល្អ ពីសាលា ឬក៏ចូលរួមជាមួយនឹងក្រុមកីឡាជាដើម។ ប្រកួតប្រជែងជាមួយនឹងខ្លួនឯង នោះអ្នក នឹងភ្ញាក់ផ្អើលពីអ្វីៗ ដែលអ្នកទទួលបាន។

៤. កុំធ្វើរឿងអាក្រក់ ឬអំពើខុសច្បាប់ផ្សេងៗ៖
វាអាច ធ្វើឲ្យអនាគតរបស់អ្នកវិនាស។ ដូច្នេះ អ្នកត្រូវជៀសវាង ការជក់បារី ទទួលទានគ្រឿងស្រវឹង ឬប្រើប្រាស់ថ្នាំ គ្រឿង​ញៀន។ បើអ្នកអាចជៀសផុតពី កត្តាទាំងអស់នេះ ក្នុងកំឡុងពេល យុវវ័យរបស់អ្នក នោះអ្នកនឹងមានអនាគតល្អ នឹងអាច​ទៅដល់ភាពជោគជ័យបាន។

៥. ត្រូវធ្វើល្អដល់ឪពុកម្តាយ និងគ្រូរបស់អ្នក៖
ត្រូវចង់ចាំថា ពួកគាត់ទាំងអស់ សុទ្ធតែចង់ឲ្យអ្នកទទួលបានអ្វីដែលល្អបំផុត។ គោរពគាត់ និង ឲ្យតម្លៃដល់ការណែនាំ​របស់ពួកគាត់ ទោះបីជាពេលខ្លះ គាត់មានការច្រឡោតដាក់អ្នកក៏ ដោយ។ ត្រូវចាំទុកថា ពួកគាត់ធ្វើអ្វីៗទាំងអស់ ព្រោះតែ​គាត់បារម្មណ៏ពីអ្នក និងចង់ឃើញអ្នក មានភាពជោគជ័យក្នុងជីវិត។

៦. មានមិត្តភក្តិល្អៗ ដើម្បីជួយដល់អ្នក៖
មិត្តភក្តិ មានតួនាទីដើម្បីជួយអ្នក ពេលណាអ្នកជួបការលំបាក និងធ្វើឲ្យអ្នកមានលំនឹងក្នុង ជីវិត។ ត្រូវនៅជិតអ្នកណា ដែល​ធ្វើឲ្យអ្នករីករាយ បង្កើតជាក្រុមដើម្បីជួយគាំទ្រគ្នា ចេះ ស្រលាញ់គ្នា អាចជួយគ្នាឲ្យជោគជ័យក្នុងជីវិត និងសំរេច​គោលដៅ​បាន។ ស្វែងរកមិត្តភក្តិ ពីរ ឬបីនាក់ ដែលតែងតែនៅក្បែរអ្នក និងជាមិត្តល្អរបស់អ្នក ក្នុងពេលសិក្សា​នៅ​វិទ្យាល័យ ឬមហា​វិទ្យាល័យ។

៧. ធ្វើសកម្មភាពហាត់ប្រាណ៖
ចូលរួមជាមួយនឹងក្រុមកីឡានៅតាមសាលា ឬក្រៅសាលា។ រត់ហាត់ប្រាណជាមួយអ្នកជិត ខាងរបស់អ្នក។ ដើរបណ្តើរ​ឆ្កែ​ដ៏ស្រស់ស្អាតរបស់អ្នកកំសាន្ត។ លេងហែលទឹក លេងបាល់ទាត់ បាល់ទះ ឬក៏ទៅហាត់ប្រាណតាមក្លឹបនានា។ វាជួយឲ្យ​អ្នកមានអារម្មណ៏ល្អ ទាំងកម្លាំងកាយ និងកម្លាំងចិត្ត។ តាមការស្រាវជ្រាវបង្ហាញថា មនុស្សដែលលេងកីឡា ឬហាត់ប្រាណ​នៅវ័យក្មេង នឹងក្លាយទៅជាយុវវ័យដែលមានសកម្មភាពរស់រវើក។

៨. ធ្វើអ្វីៗ ដែលអ្នកស្រលាញ់៖
រក្សារទំលាប់របស់អ្នកដូចជា ការអាន សរសេរ ច្រៀងរាំ ឬការលេងកីឡាជាដើម។ ពេលវេលា ដែលហួសកន្លងទៅ អ្នកនឹង​ដឹងថា វាជួយបង្កើន នូវបទពិសោធន៏របស់អ្នក នឹងអាច ជួយដោះស្រាយអ្វីដែលថ្មីៗ។

៩. មានជំនឿលើអ្វីមួយ៖
ចាប់ផ្តើមជឿលើ មូលហេតុអ្វីមួយដូចជា បញ្ហាសង្គម បរិដ្ឋាន ឬក៏សាសនា។ អ្នកនឹងចាប់ផ្តើម មានគំនិត ការយល់ឃើញ​របស់ខ្លួនឯង និងមានជំហរច្បាស់លាស់ទៅលើអ្វី ដែលអ្នក ជឿជាក់។

១០. ធ្វើអ្វីៗ ឲ្យអស់ពីសមត្ថភាពដែលអ្នកមាន៖
អ្នកមានវ័យក្មេង ត្រឹមតែមួយរយះពេលខ្លីប៉ុណ្ណោះ ហើយមុនពេលអ្នកដឹងខ្លួន វានឹងចូលដល់ វ័យកណ្តាល។ មានមនុស្ស​ច្រើននិយាយថា «ខ្ញុំស្តាយណាស់ ដែលខ្ញុំមិនបានធ្វើរឿងនេះកាល ពីខ្ញុំនៅក្មេង»។ ដូច្នេះកំឡុងពេលដែលអ្នកនៅក្មេង អ្នកគួរតែធ្វើអ្វី ដែលមានប្រយោជន៏សំរាប់ ខ្លួនឯង និងសង្គមឲ្យអស់លទ្ធភាព។ នោះថ្ងៃក្រោយ អ្នកនឹងពេញចិត្ត​ នូវ​លទ្ធផលពីអ្វី ​ដែលអ្នកបានធ្វើរួច៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៥ ខែកុម្ភះ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ