ការផ្ទុះអាវុធ បានចាប់ផ្ដើមនៅវេលាម៉ោង ២និង១៥នាទីទៀបភ្លឺ ម៉ោងក្នុងស្រុក នៃរដ្ឋតិចសាស (ត្រូវនឹងព្រឹក​ម៉ោង ៨ និង១៥នាទី ម៉ោងនៅបារាំង ឬរសៀល​ម៉ោង ១៣និង១៥នាទី ម៉ោងនៅកម្ពុជា) នៅក្នុងសង្កាត់មួយ ដែល​សម្បូរទៅដោយរង្គសាលស៊ីផឹក កណ្ដាលក្រុងអូស្តាំង (Austin) នៃរដ្ឋតិចសាស ភាគខាង​ត្បូង​សហរដ្ឋ​អាមេរិក។ ក្នុងពេលភ្លាមៗ នគរបាលក្រុង​បានប្រកាស​តាមទំព័រ​ទ្វីសធើរ (Twitter) របស់ខ្លួន ហាមពលរដ្ឋ​មិន​ឲ្យ​មកជិត​កន្លែង​កើតហេតុ ខណៈ«ជនខ្មាន់កាំភ្លើង កំពុងធ្វើសកម្មភាព និងកំពុងបង្ក ឲ្យមានជន​រងគ្រោះ​ច្រើន​នាក់»។

ស្ត្រីវ័យជាង២០ឆ្នាំម្នាក់ បានស្លាប់នៅនឹងកន្លែង តាំងពីពេលផ្ទុះអាវុធដំបូង។ ស្ត្រីបីនាក់ទៀតបានរងរបួស និង​ត្រូវ​បានបញ្ជូនទៅកាន់មន្ទីរពេទ្យ។ ផ្ទុយទៅវិញ ជនរងគ្រោះទី៥ ជាបុរស ដែលរងរបួសដែរនោះ បានបដិសេធ មិនទទួលយកការជួយសង្គ្រោះអ្វីទេ។ នេះបើតាមការអះអាង របស់ក្រុមអ្នកជួយសង្គ្រោះ ដែលបានទៅដល់​ទី​កើត​ហេតុ នៅពេល​ក្រោយបន្តិចមក។

នៅ៧នាទី ក្រោយការផ្ទុះអាវុធលើកទីមួយ ការផ្ទុះអាវុធលើកទីពីរ នៅក្នុងចំណតរថយន្ដមួយ បានកើតឡើង​ជាថ្មី។ ការផ្ទុះអាវុធលើកនេះ បង្កឡើង​ដោយ​ជនខ្មាន់​កាំភ្លើង​ម្នាក់​​ផ្សេងទៀត។

នៅក្នុងសន្និសីទកាសែត ដែលធ្វើឡើងតាមបណ្ដាញសង្គម នាយនគរបាលក្រុង បានថ្លែងឲ្យដឹងថា អាជ្ញាធរ​នៅ​មិនទាន់កំណត់អត្តសញ្ញាណ របស់ជនប្រដាប់អាវុធទីមួយ បាននៅឡើយ តែបានអះអាងថា ជននេះ​ទំនង​មាន​អាយុជាង២០ឆ្នាំ និងបានរត់គេចខ្លួន នៅក្រោយពេលកើតហតុ។ នគរបាលបានស្រង់សម្ដីសាក្សី មក​អះអាង​ថា ជនខ្មាន់កាំភ្លើងទីមួយនេះ បានឈរជំទែង ហើយបានបាញ់ស្រោច ទៅលើអ្នកដំណើរទាំងឡាយ នៅតាម​ដងផ្លូវ។

ចំពោះការផ្ទុះអាវុធជាលើកទីពីរ សាក្សីបានអះអាងប្រាប់នគរបាលថា ជនខ្មាន់កាំភ្លើងម្នាក់ទៀតនោះ បាន​ឈរ​ជំទែង ដកកាំភ្លើងបាញ់ដូចគ្នា តែត្រូវបានមនុស្សនៅជុំវិញ បង្ក្រាបទាន់ពេល និងបញ្ជូនទៅឲ្យនគរបាល។ ជន​នេះ​បាន​រងរបួស ហើយកំពុងព្យាបាលខ្លួន នៅឯមន្ទីរពេទ្យ។ នគរបាលកំពុងធ្វើការស៊ើបង្កេត ដើម្បីឲ្យដឹងថា តើ​ជន​ខ្មាន់់​កាំភ្លើង​ទាំងពីរ មានជាប់ទាក់ទងគ្នា ហើយស្គាល់ពីទិសដៅដូចគ្នា ឬយ៉ាងណា។

នគរបាលសហរដ្ឋអាមេរិក ត្រូវបានដាក់ស្ថិតក្នុងសភាពត្រៀមជើងការ បន្ទាប់ពីជនប្រដាប់អាវុធស្បែកខ្មៅម្នាក់ បានបាញ់សម្លាប់ភ្នាក់ងារនគរបាលប្រាំនាក់ ដែលកំពុងបំពេញភារកិច្ច ការពារក្រុមបាតុករ ដែលធ្វើបាតុកម្ម​កាល​ពីថ្ងៃ​ទី៧ ខែកក្កដាកន្លងមក។ បាតុកម្មនាពេលនោះ ត្រូវបានរៀបចំធ្វើឡើង ដើម្បីសម្ដែងការ​ប្រឆាំង​នឹង​ភាព​ឃោរឃៅ របស់កម្លាំងនគរបាល ដែលបានប្រើតួនាទីរបស់ខ្លួន បាញ់សម្លាប់ជនអាមេរិកស្បែកខ្មៅ​ជាបន្ត​បន្ទាប់៕

Police @ scene #Austin #Texas reports shooter still on run. pic.twitter.com/P5F1omdTJL

— Tongue Twister Carl (@carlste30) 31 juillet 2016