ស្ត្រីវ័យក្មេងជនជាតិបារាំងម្នាក់ ដែលបានទៅសម្រាកវិស្សមកាលនៅប្រទេសកម្ពុជា ត្រូវបានគេរកឃើញស្លាប់ នៅក្នុងស្ទឹង​មួយក្នុងផ្នែកនារតីនៃប្រទេស។ អាជ្ញាធរមានសមត្ថកិច្ច បានប្រកាសប្រាប់អ្នកកាសែត ពីការស៊ើបអង្កេតមួយ ត្រូវបានបើក​ធ្វើកាលពីថ្ងៃច័ន្ទទី១១ខែកុម្ភះនេះ។

ស្ទឹងកំពត។ MONOROOM.info photo/ D.KEO

ហេតុការណ៍កើតឡើងនៅក្នុងខេត្តកំពត នៅជាប់នឹងតំបន់ឆ្នេរសមុទ្រ។ វាជាកន្លែងមួយដែលជាធម្មតា អ្នកទេសចរណ៍​បរទេសភាគច្រើន ដែលមកទស្សនាកម្ពុជា តែងតែទៅលេងកំសាន្ដ។

ជនរងគ្រោះជាស្ត្រីវ័យក្មេងមួយរូប អាយុ២៥ឆ្នាំ ត្រូវបានរកឃើញស្លាប់ រាងកាយអាក្រាត ដោយមានស្នាមរបួស​នៅនឹង​ក្បាល និងនៅដៃទាំងគូរ។ នាយរងនរគបាលខេត្តកំពត លោក អិន ជីវា បាននិយាយបញ្ជាក់ថា «យើងសន្និដ្ឋានថា ជា​សំនុំរឿងឃាតកម្ម» ដោយសារតែសា្នមរបួស ដ៏សំខាន់នៅត្រង់ក្បាល ដែលទំនងជាបានទទួល នូវការវាយប្រហារ នឹង​អាវុធមុតស្រួចណាមួយ។

មកកម្ពុជាដើម្បី ស្វែងយល់ពីវប្បធម៌ខ្មែរ...

ទេសចរណ៍បារាំងនេះ ជាសិល្បការនីមួយរូប ឈ្មោះ អូហ្វេលី (Ophélie) មកពីក្រុមល្ខោនប្រឺមីញ៉េ អាតថ៍ (Premier Acte) ដែលមានទីតាំង ស្ថិតនៅជាយក្រុងនៃទីក្រុងលីយ៉ុង (Lyon) ផ្នែកខាងត្បូងនៃប្រទេសបារាំង។ ឃាតកម្មដ៏រន្ធត់ ដែលបាន​ធ្វើទៅលើ អ្នករួមក្រុមរបស់ខ្លួន  បានធ្វើអោយក្រុមល្ខោនទាំងមូល រងនូវភាពតក់ស្លុត ហើយបានលើកជាសំនួរ មកចោទ​ឡើងជាច្រើន។ របាយការណ៍មួយ របស់កាសែតបារាំង «មេត្រូ» បានលើកយកសម្ដី របស់អ្នកដឹកនាំល្ខោនប្រចាំក្រុម លោក សាគីស ឈឹមឡេកដ្យន់ (Sarkis Tcheumlekdjian) មកបញ្ជាក់ថា អូហ្វេលី នៅក្នុងក្រុមល្ខោនតាំងពីប្រាំឆ្នាំ​មក​ហើយ។ ថ្មីៗនេះ លោកថែមទាំងបានប្រគល់ទៅអោយនាង អោយដើតួរសំខាន់ជាងគេ នៅក្នុងល្ខោនរបស់លោក​ថែម​ទៀត​ផង។

«ជានិច្ចជាកាល អូហ្វេលី ជាស្ត្រីវិជ្ជមាន ចាប់អ្វីមួយពិតប្រាកដ និងជានារីម្នាក់ ដែលភ្លឺថ្លា» លោក សាគីស បានបន្ថែម​យ៉ាង​ដូច្នេះ។ ក្រុមលោក និងរូបលោកផ្ទាល់ មិនយល់ថាតើមានរឿងហេតុភេទអ្វី បានកើតឡើងចំពោះ អ្នកសម្ដែងរួមក្រុម​របស់​ខ្លួននៅប្រទេសកម្ពុជានោះទេ។ អ្នកដឹកនាំល្ខោនរូបនេះ គ្រាន់តែនិយាយថា «នាងធ្វើដំណើរទៅកាន់ទីនោះ ដើម្បីស្វែង​យល់អោយកាន់តែច្បាស់ ពីល្ខោនអាស៊ី»។

កាលពីរសៀលថ្ងៃសៅរ៍ ទី០៩ខែកុម្ភះកន្លងមក អូហ្វេលី ត្រូវបានគេឃើញជាចុងក្រោយ ថាបានចាកចេញពីផ្ទះសំណាក់ ដែលនាងស្នាក់នៅ នៅកំពត ដោយជិះកង់ទៅជាមួយ។ ដោយឡែក ស្ថានទូតបារាំងប្រចាំនៅរាជធានីភ្នំពេញ បាននិយាយ​ថា «ការស៊ើបអង្កេតកំពុងតែប្រព្រឹត្តិទៅ ដើម្បីកំណត់អោយបានច្បាស់ ពីមូលហេតុពិតប្រាកដ នៃការស្លាប់នេះ។ តែបើ​តាមការសង្កេតជាជំហានដំបូង ឃាតកម្ម វាជាការជាប់ទាក់ទង ដ៏គួរអោយសង្ស័យជាងគេ៕»

------------------------------------------------
ដោយ ៖ កេសរកូល - ភ្នំពេញ ថ្ងៃទី១០ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ