ជនជាតិបារាំង​អាយុ៣៨ឆ្នាំមួយរូប លោក នីកូឡា ហ្សារ៉ូសៃ (Nicolas Jarossay) បានចាប់ផ្ដើមធ្វើដំណើរ ចេញ​ពីកំពង់ផៃក្រុងប្រារីយ៉ា (Praia) នៃកោះ «Cap Vert (ខាងលិចទ្វីបអាហ្វ្រិក)» ដើម្បីឆ្លងមហាសមុទ្រ​អាត្លង់ទិក តាមទូកចែវមួយ ដោយគ្មានត្រូវការជំនួយ អ្វីផ្សេងទាំងអស់។ នេះបើតាមការអះអាងឲ្យដឹង របស់​ក្រុម​អ្នក​រៀបចំ​ដំណើរ​ផ្សងព្រេង ដែលកម្រកើតមានមួយនេះ។ ក្រុមអ្នករៀបចំបានឲ្យដឹងទៀតថា វាជា​ការ​ប៉ុនប៉ង​មុន​គេ​ និងលើក​ដំបូង​បង្អស់ ក្នុងការឆ្លងកាត់មហាសាគរ អាត្លង់ទិក ជាមួយនឹងមធ្យោបាយ ត្រឹមតែ​«ទូក​ចែវ» និង​តាម​លក្ខណៈ​«ធម្មជាតិ»សុទ្ធសាធ។

លោក នីកូឡា ហ្សារ៉ូសៃ ដែលជាអ្នកជំនាញខាងជួយសង្គ្រោះ (Pompier professionnel) មានកំពស់​១ម៉ែត្រ៩០ និងដែលមានទំងន់៩០គីឡូក្រាម បានអនុវត្តវិញ្ញាសារ ចែវទូក របៀបនេះ តាំងពី៨ឆ្នាំមកហើយ។ លោក​តែង​ធ្វើការ​ចែវគាស់ទឹក ដោយឈរនៅលើក្ដារាបស្មើមួយ។ អ្នកធ្វើដំណើរផ្សងព្រេងរូបនេះ បានចាកចេញ​ពី​កំពង់ផែ​ក្រុង ប្រារីយ៉ា នៅម៉ោង៣រសៀល ដើម្បីត្រៀមខ្លួន ឆ្លងកាត់មហាសមុទ្រ ដែលមាន​ចំងាយ​៥ពាន់​គីឡូម៉ែត្រ។

ទូកចែវរបស់លោក ត្រូវបានបង្កើតឡើង ចេញពីសម្ភារៈម្យ៉ាង ដែលមិនលិចទឹក (អណ្ដែតរហូត) មាន​បណ្ដោយ​ប្រវែង ៧ម៉ែត្រ និងទទឺងប្រវែង ៨៣សង់ទីម៉ែត្រ។ នៅផ្នែកខាងមុខ ដែលមានប្រវែងប្រមាណជា ២,២ម៉ែត្រ  និង​មាន​ដំបូលកំពស់ ៤៥សង់ទីម៉ែត្រ ជាកន្លែងដែលអាចធ្វើការសម្រាកបាន។ រីឯនៅផ្នែកខាងក្រោយវិញ ជា​កន្លែង​សម្រាប់​ផ្ទុកសម្ភារៈសំខាន់ៗ និងចំណីអាហារ។

ប៉ុន្តែទូកចែវមួយនេះ នៅមានបំពាក់ដោយសម្ភារៈ «Hi-Tech» ខ្លះដែរ ដូចជានៅលើដំបូល នៃផ្នែកខាងមុខ (មើល​រូបខាងក្រោម) មានដាក់បន្ទះស្រូបពន្លឺព្រះអាទិត្យ ដែលអនុញ្ញាតឲ្យអ្នកផ្សងព្រេង អាចមាន​ភ្លើង​អគ្គិសនី​ប្រើប្រាស់ នៅក្នុងរយៈពេល នៃដំណើរឆ្លងមហាសមុទ្ររបស់ខ្លួន៕

» វីដេអូស្ដីពីការចែវទូកដ៏ពិសេស របស់លោក ហ្សារ៉ូសៃ កាលពីខែសីហា ឆ្នាំ២០១៥កន្លងមក៖