មុខមាត់របស់នាង ប្រកបដោយភាពភ័យភិត និងប្រលាក់ដាបដោយឈាម ផ្តិតនៅក្នុងរូបថតខាងលើ ត្រូវបាន​ផ្សាយចេញ នៅគ្រប់ជ្រុងជ្រោយទាំងអស់ ក្នុងពិភពលោក។ អង្គុយនៅលើកៅអីមួយ ដែលនៅមិនឆ្ងាយប៉ុន្មាន ពីទីកន្លែងបំផ្ទុះគ្រាប់បែក ដោយភេរវជនអត្តឃាតពីរនាក់ ក្នុងព្រលានយន្ដហោះអន្តរជាតិ ស្ត្រីរូបនេះបាន​ក្លាយ​ជានិមិត្តរូប​យ៉ាងសំខាន់ ជំនួសឲ្យជនរងគ្រោះទាំងឡាយ នៅក្នុងអំពើភេរវកម្ម ជាពិសេសភេរវកម្មនៅ រាជធានី ប្រ៊ុយសែល ប្រទេសប៊ែលហ្សិក កាលពីព្រឹកថ្ងៃអង្គារកន្លងមកនេះ។

បើតាមសារព័ត៌មានប៊ែលហ្សិក «Sudinfo.be» ដែលចេញផ្សាយ តាមបណ្ដាញអ៊ិនធើណែត បានឲ្យដឹងថា ស្ត្រី​រងគ្រោះរូបនេះ ឈ្មោះ នីឌី ឆាផេការ (Nidhi Chaphekar) មានសញ្ជាតិឥណ្ឌា និងធ្វើការជាស្ត្រីបម្រើការ នៅ​ក្នុង​យន្ដហោះ តាំង​​ពី​​ជាង១៥ឆ្នាំមកហើយ ឲ្យក្រុមហ៊ុនអាកាសចរណ៍ «Jet Airways»។

» រូបថតនាង នីឌី នាពេលកន្លងមក៖

ត្រូវឡើងទៅបម្រើការ លើយន្ដហោះ...

មានលំនៅដ្ឋាន ក្នុងទីក្រុង ម៉ុមបៃ (ប្រទេសឥណ្ឌា) និងមានកូនពីរនាក់ នាង នីឌី ត្រូវឡើងទៅបម្រើការ នៅ​ក្នុង​យន្ដហោះ ដែលភ្ជាប់ជើងហោះហើរលេខ «9W228» ឆ្ពោះទៅកាន់ក្រុង «Newark» ក្នុងរដ្ឋ «New Jersey» សហរដ្ឋ​អាមេរិក នៅព្រឹកថ្ងៃកើតហេតុ។ យន្ដហោះរបស់នាង គ្រោងហោះចេញ ពីរាជធានី របស់​ប្រទេស​ប៊ែលហ្សិក នៅវេលាម៉ោង ១០និង១៥នាទី។

ប៉ុន្តែនាវេលាម៉ោងជិត៨ព្រឹក នៅពេលនាង បានដើរកាត់សាលធំ ដែល​មាន​បញ្ជរ​សម្រាប់​ទទួល​ចុះ​ឈ្មោះ នៃ​អ្នក​ធ្វើដំណើរចាកចេញនោះ ក្រុមភេរវជនបានបំផ្ទុះគ្រាប់បែកឡើង ធ្វើ​ឲ្យ​នាង​រង​របួស​យ៉ាង​ធ្ងន់ធ្ងរ ជា​ពិសេស​អាវ​ក្រៅ​​របស់​នាង បានប៉ើងឡើង និងរហែកអស់ពាក់កណ្ដាល។

នៅពេលនោះ អ្នកសារព័ត៌មាន ជាតិហ្សរជីម្នាក់ នាង កេតេវ៉ាន់ ការដាវ៉ា (Ketevan Kardava) បាន​ថតរូប​របស់​នាង ដែលកំពុងរងរបួស និងកំពុងអង្គុយនៅលើកៅអី (Editor's Note ៖ គឺរូបថតទីមួយខាងលើ ដែលត្រូវ​បាន​ផ្សាយ នៅពាសពេញពិភពលោក) មុននឹងអ្នកសារព័ត៌មានស្រីរូបនេះ ចូល​ទៅយកអាសារ ដោយបានជួយ​ហៅ អ្នក​ជួយ​សង្គ្រោះមកពិនិត្យ និងដឹកនាងទៅកាន់មន្ទីពេទ្យ។ នាង នីឌី បានដង្ហោយឡើងថា៖ «សូមជួយ​យើង​ផង!»។

រីឯក្រុមហ៊ុន «Jet Airways» វិញ បានថ្លែងប្រាប់​ទៅ​គ្រួសារ​របស់​នាង នីឌី ក្នុងប្រទេសឥណ្ឌាថា បុគ្គលិក​ស្ត្រី​របស់​ខ្លួន ត្រូវ​បាន​ជួយ​សង្គ្រោះ​ហើយ។ បើ​តាម​សារព័ត៌មាន​អង់គ្លេស «Sun» បានស្រង់ប្រភពមួយ មក​បញ្ជាក់​ថា៖ «ក្រុម​គ្រួសារ​របស់​នាង ទទួល​រង​នូវ​ការ​តក់ស្លុត​យ៉ាងខ្លាំង ហើយនៅមិនទាន់បានជួបជជែកផ្ទាល់ ជាមួយ​នាង​នៅ​ឡើយ។ ប៉ុន្តែ​ស្ថានទូត​ឥណ្ឌា បាន​​អះអាង​​ថា ពលរដ្ឋរបស់ខ្លួន នាង នីឌី បានរួចផុតពីគ្រោះថ្នាក់ ជា​ស្ថារពរ។»៕