អ្នកស្រី ឆាយ អ៊ីងវេន (Tsaï Ing-wen) បានបើកទំព័រ ជាប្រវត្តិសាស្ត្រមួយ ដោយបានក្លាយ ជាប្រធានាធិបតី​ស្ត្រី​លើកដំបូងបង្អស់ របស់កោះតៃវ៉ាន់។ ក្នុងអាយុ៥៩ឆ្នាំ អតីតសាស្ត្រាចារ្យ នៅសកលវិទ្យាល័យរូបនេះ បាន​ត្រៀម​ខ្លួន​ឆ្លើយ​តប ទៅនឹងអ្វីដែលប្រជាពលរដ្ឋតៃវ៉ាន់ ជាង១៨លាននាក់ កំពុងទន្ទឹងរង់ចាំ។

គឺពលរដ្ឋតៃវ៉ាន់ទាំងនោះហើយ ដែលបានទៅបោះឆ្នោត យ៉ាងភ្លូកទឹកភ្លូកដី កាលពីថ្ងៃសៅរ៍ម្សិលម៉ិញនេះ ដើម្បី​ឲ្យអ្នកស្រី ឆាយ ដែលជាប្រធានគណបក្សប្រឆាំង នៅតៃវ៉ាន់ បានឡើងកាន់តំណែងជាប្រមុខរបស់ពួកគេ ជា​មួយ​នឹងសម្លេងឆ្នោត ៥៦,១២% ទល់នឹងសម្លេង ៣១,០៤% ដែលបេក្ខជនគូប្រជែង មកពីគណបក្ស​ជាតិ​និយម គួងម៉ីងតាំង (Kuomintang) ទទួលបាន។ នេះបើតាមការឲ្យដឹង របស់គណៈកម្មាធិការជាតិ រៀបចំ​ការ​បោះ​ឆ្នោត។

បើនិយាយម្យ៉ាងទៀត ជ័យជំនះរបស់អ្នកស្រី ឆាយ អ៊ីងវេន បានអះអាងពីបរាជ័យ នៃនយោបាយរបស់ក្រុម គួងម៉ីងតាំង ដែលបានកាន់អំណាច តាំងពី៨ឆ្នាំមកហើយ ហើយតែងតែប្រកាន់ខ្ជាប់ នូវការ​«សម្រប​សម្រួល»​ជានិច្ច ជាមួយនឹងរដ្ឋាភិបាលក្រុងប៉េកាំង។ ក្រុងប៉េកាំង ដែលចាត់ទុកកោះតៃវ៉ាន់ ថាជាខេត្តបះបោរ​មួយ​របស់​ខ្លួន ហើយព្រមានពីការវាយយកមកកាន់កាប់វិញ ប្រសិនបើកោះនេះ ឈានទៅប្រកាស«ឯករាជ្យ»។

ស្ត្រីខ្លាំងដូចអ្នកស្រី អង់ជឺឡា មែរគែល (Angela Merkel)?

នយោបាយរបស់ក្រុមគួងម៉ីងតាំងខាងលើ បានរងនូវការពិន័យយ៉ាងធ្ងន់ធ្ងរ ពីសំណាក់ពលរដ្ឋតៃវ៉ាន់ ដែល​ភាគ​ច្រើន​​នៅ​តែប្រកាន់ខ្ជាប់ នូវអត្តសញ្ញាណរបស់ពួកគេ។ គោលគំនិតចង់បាន របស់ពលរដ្ឋតៃវ៉ាន់ទាំងនេះ ក៏​ជា​ខ្សែ​បន្ទាត់នយោបាយ របស់អ្នកស្រី ឆាយ ក្នុងការទាមទារ ឲ្យមានបូរណភាពទឹកដីពិតប្រាកដ និងផ្សេង​ដាច់​ដោយ​ឡែក ពីប្រទេសចិនដីគោក។

នៅក្នុងការថ្លែងមួយ ពីវេទិកានយោបាយ នៅចំពោះបណ្ដាជន រាប់សិបពាន់នាក់ ដែលចាត់ទុកអ្នកស្រី ថា​«ស្ត្រី​ខ្លាំង​ដូចអ្នកស្រី អង់ជឺឡា មែរគែល»នោះ អ្នកស្រី ឆាយ អ៊ីងវេន ដែលទើបនឹងជាប់ឆ្នោត បាន​ព្រមាន​ចិន​រួច​ជា​ស្រេច ឲ្យ«គោរពប្រព័ន្ធប្រជាធិបតេយ្យ អត្តសញ្ញាណជាតិ និងភាពមិនអាចបំបែកបាន នៃទឹកដីតៃវ៉ាន់»៕