ប្រភពព័ត៌មាន ពីកន្លែងកើតហេតុបានឲ្យដឹងថា ករណីភ្លើងឆេះនេះ បានកើតឡើងនៅវេលាម៉ោង ១និង​០៥​នាទី រសៀលថ្ងៃទី ១៦ ខែវិច្ឆិកា ឆ្នាំ២០១៥។ ប្រភពបន្តថា ផ្ទះដែលឆេះខាងលើ ជារបស់ដូនជីមួយរូប តែ​បច្ចុប្បន្ន លោកយាយាបានស្លាប់បាត់​ទៅហើយ។ ប៉ុន្តែមានកូនស្រីមេម៉ាយម្នាក់ គឺអ្នកស្រី ចាន់ កែវ កំពុងរស់​នៅ​ជាមួយកូន០៥នាក់ ក្នុងផ្ទះមួយនេះ។

ក្នុងវ័យ៣០ឆ្នាំ អ្នកស្រី ចាន់ កែវ ហៅ អ៊ិន បានប្រាប់ទស្សនាវដ្តីមនោរម្យ.អាំងហ្វូឲ្យដឹងថា មុនពេលកើតហេតុ គាត់មិនបាននៅផ្ទះទេ គឺទៅយកសាច់ញាតិ នៅពោធិ៍ជិនតុង និងយកធៀបការ ទៅអញ្ជើញភ្ញៀវ ក្នុងពិធីរៀប​មង្គលការបងប្អូន។ ក្នុងនោះ អ្នកស្រីបញ្ជាក់ថា បានយកទៅតែកូនពៅម្នាក់ប៉ុណ្ណោះ ក្រៅពីនោះ គេនៅរត់​លេង នៅផ្ទះធម្មតា។ ម្ចាស់ផ្ទះខាងលើ បានឲ្យដឹងដែរថា សម្ភារៈមានទាំងឯកសារកូន ឯកសារអ្នកស្រី រួមនឹង​ប្រាក់​ចំនួន​១លានរៀល និងរបស់របរប្រើប្រាស់ក្នុងផ្ទះ ត្រូវភ្លើងឆេះអស់ទាំងស្រុង។

ព្រះសង្ឃគង់ ក្នុងវត្តស្ទឹងមានជ័យមួយអង្គ ព្រះនាម ម៉ៅ សុម៉ូណូ បានឲ្យដឹងថា កុដិឆេះនេះ ជារបស់យាយជី​ម្នាក់ ដែលបានស្លាប់បាត់ទៅហើយ បច្ចុប្បន្នមានកូនស្រីម្នាក់ខាងលើ មករស់នៅជាមួយកូន។ នៅវេលា​កើត​ហេតុ ព្រះអង្គមិនបានដឹងថា បណ្តាលមកពីហេតុអ្វីនោះទេ ដឹងត្រឹមតែថា គេផ្អើលមកជួយពន្លត់។ រីឯ​សាក្សី​ម្នាក់​ទៀត អ្នកស្រី រី បានឲ្យដឹងដែរថា ដំបូងគាត់ឃើញផ្សែងហ៊ុយចេញតិចៗ មួយសន្ទុះក្រោយមក ស្រាប់តែ​ឆេះកាន់តែខ្លាំងឡើងៗ។ ពេលនោះ អ្នកស្រីបានស្រែក ឲ្យអ្នកជិតខាងជួយពន្លត់ តែមិនដឹង ពីមូលហេតុនៃការ​ឆេះនេះទេ។

តាមការបញ្ជាក់ របស់មន្រ្តីផ្នែកពន្លត់អគ្គីភ័យម្នាក់ បានឲ្យដឹងថា ដើម្បីពន្លត់អគ្គិភ័យនេះ ឲ្យអស់ជាស្ថាពរ ខាង​លោកបានប្រើប្រាស់ឡានទឹក ជួយសង្គ្រោះអស់ចំនួនពីរគ្រឿង។ លោកបានបន្ថែមថា គ្មានតុល្យភាព និយាយ​ពីអ្នករងរបួសនោះទេ ប៉ុន្តែខាងពន្លត់អគ្គីភ័យ មិនអាចជួយពន្លត់បានរហ័ស ដោយសារគ្មានផ្លូវ សម្រាប់​ឡាន​បាញ់​ទឹកចូល (ផ្លូវតូចចូលមិនរួច)៕