តើពិធីករសំបូរវោហារ លោក ប៉ែន ចំរ៉ុង មានពាក្យពេជ្យអ្វីខ្លះ នៅក្នុងរឿងរ៉ាវស្នេហា របស់ខ្លូនមួយនេះ? តើ​តូឯក​ស្រី កញ្ញា ភិន សុដាលីស ដែលបិតភ្នែក រង់ចាំពាក្យពេជ្យស្នេហា ផ្ដោះផ្ដងវាចាពីសំណាក់ បុរសដែល​នាង​ស្រឡាញ់ មានសភាពបែបណា? រំភើបចិត្តណាស់ មែនឬទេ?

ជាមួយនឹងកាយវិការ ដើរចេញពីក្នុង កាន់មកជាមួយ នូវបាច់ផ្កា និងតុក្កតាដ៏ធំ យកទៅដាក់លើដៃទាំងទ្វេ របស់​កញ្ញា ភិន សុដាលីស តួឯកប្រុស លោក ប៉ែន ចំរ៉ុង បានពោលពាក្យឡើងថា៖ «បងគ្មានពាក្យអ្វី ក្រៅពី​និយាយ​ថា បងស្រឡាញ់អូន មិនមែនជារឿង លេងសើចនោះទេ។ បើសិនជាអាច បងចង់ឲ្យគ្រប់យ៉ាង បានក្លាយ​ជា​ការ​ពិត ដូចដែលពួកយើង បាននិយាយគ្នា។»

តារាប្រុស ដែលថ្លែងក្នុងន័យប្រលោមស្នេហ៍ បានបន្តទៀតថា៖ «ម្យ៉ាងវិញទៀត អ្វីដែលបងចង់បញ្ជាក់ ឲ្យ​អូន​បានដឹងនោះ គឺថ្វីត្បិត តែបងមិនមាទ្រព្យសម្បត្តិច្រើន ឲ្យអូនដូចគេមែន តែបងជឿជាក់ថា បងនឹងធ្វើឲ្យអូន​សើច ច្រើនជាងយំ ហើយនឹងមានក្តីសុខ ច្រើនជាងកើតទុក្ខ ហើយនឹងទទួលបានគ្រប់យ៉ាង ដែលអូនប្រាថ្នា។ បង​នឹង​ព្យាយាម ធ្វើឲ្យអស់ពីលទ្ធភាពដើម្បីប្តូរ ឲ្យបានឲ្យអូនគ្រប់យ៉ាង។»។ កាយវិការចុងបញ្ចប់ ដោយចាប់យកដៃ របស់​តួឯកស្រី មកថើបថ្នមៗ របស់លោក ប៉ែន ចំរ៉ុង បានរឹតតែធ្វើឲ្យបរិយាកាស នៅក្នុងស្ថានីយ៍ទូរទស្សន៍ PNN កាន់តែមានសម្លេង ហ៊ោរកញ្ច្រៀវខ្លាំងឡើង។

រឿងរ៉ាវស្នេហារបស់តារាទាំងពីរ ធ្លាប់ត្រូវបានលោក«ប៉ា» របស់កញ្ញា ភិន សុដាលីស គឺលោក អ៊ិន សុភិន ដែល​ជាម្ចាស់ផលិតកម្ម មហាហង្សភាពយន្ដ នោះ ព្រមានមិនទទួលយកលោក អ៊ិន សុភិន ជាគូអនាគត​របស់កូន​ស្រី​របស់លោកនោះទេ។ លោក សុភិន បានលើកយកហេតុផល ជាច្រើន ដើម្បីជំទាស់លោក ប៉ែន ចំរ៉ុង មិន​ឲ្យ​មាន​វត្តមាន នៅក្នុងបេះដូង របស់កញ្ញា ភិន សុដាលីស។ តែយ៉ាងណាក៏ដោយ កញ្ញា ភិន សុដាលីស ធ្លាប់​បាន​បង្ហោះ វីដេអូឃ្លិបបង្ហាញថា នាងឈប់ធ្វើតាមចិត្តលោក«ប៉ា» របស់នាងទៀត ហើយព្រោះសេចក្តីស្នេហា មិន​អាច​នរណា​បង្ខំនរណាបានទេ៕