ការផ្ទុះចំងល់របស់ប្រិយមិត្ត និងបណ្ដាអ្នកគាំទ្រ តារាចម្រៀងដើមទ្រូងបាន កញ្ញា ស៊ីម ថៃណា បានសម្ដែង​ចម្ងល់សារជាថ្មី បន្ទាប់ពីគេហទំព័រក្នុងស្រុកមួយ បានយកវីដេអូឃ្លីប ដែលថតជាលក្ខណៈឯកជន មកធ្វើការ​ចុះផ្សាយ ហើយបន្ទាប់មកមានបង្ហោះចែករំលែកតៗគ្នា នៅពាសពេញបណ្ដាញសង្គម។

ប្រិយមិត្តឆ្ងល់ និងបានសួរគ្នាថា តើកញ្ញា ស៊ីម ថៃណា ស្ថិតក្នុងសភាពបែបណា ទើបនៅក្នុងវីដេអូនោះ គេ​ឃើញ​តារាចម្រៀងរូបនេះ បានរាំកៀកកើយ យ៉ាងស្ថិតស្នាលខ្លួនទល់នឹងខ្លួន ជាមួយនឹងយុវជនម្នាក់ទៀត យ៉ាងស៊ិចស៊ី។ មិនត្រឹមតែប៉ុណ្ណឹង គេឃើញតារាចម្រៀងរូបនេះ បានលើកបង្ហាញ ម្រាមដៃកណ្ដាល ដាក់អ្នក​ថតវីដេអូទៀតផង។ ប៉ុន្តែចម្ងល់នេះ មិនត្រូវបានគេហទំព័រ ដែលយកវីដេអូរបស់នាង មកផ្សាយនេះ ធ្វើការ​ពន្យល់ពីដើមហេតុ យ៉ាងណានោះទេ។ គេហទំព័រនោះ គ្រាន់តែបានសរសេរ តែមួយឃ្លាប៉ុណ្ណោះថា៖ «ស៊ីម ថៃណា រាំសិចស៊ី ជាមួយប្រុសក្មេង មើលហើយពិតជាញាក់សាច់ (...) សូមទស្សនាវីដេអូទាំងអស់គ្នា!!!»។

តាមពិតទៅវីដេអូនេះ ត្រូវបានបែកធ្លាយ តាំងពីដើមខែមិនា ឆ្នាំ២០១២មកម្លេះ ហើយត្រូវបានសារព័ត៌មាន​ក្នុង​ស្រុកមួយ យកមកបង្ហោះផ្សាយ នៅតាមគេហទំព័រចែករំលែកវីដេអូ យូធូ (វីដេអូខាងលើ)។ នៅពេល​វីដេអូនោះ បានបែកធ្លាយ ការភ្ញាក់ផ្អើលបានកើតរួចមកហើយ នៅក្នុងចំណោមស្រទាប់ អ្នកគាំទ្រ និងប្រិយមិត្តរបស់កញ្ញា ស៊ីម ថៃណា ដោយពួកបានចាត់ទុក សកម្មភាពរបស់តារាស៊ិចស៊ីរូបនេះ មានលក្ខណៈជ្រុលប្រមាណ។

នៅចំពោះប្រតិកម្មរបស់សាធារណជន តារាចម្រៀងដែលបានបដិសេធ នៅពេលដំបូង ថាមិនមែនជា​រូបនាង​នោះ ត្រូវបង្ខំចិត្តនៅទីបំផុត ចេញសារភាព និងបកស្រាយ ជាមួយនឹងសារព័ត៌មាន ដែលទម្លាយវីដេអូននោះ ដោយកញ្ញាបានអះអាងថា ជាវីដេអូឯកជនមួយរវាងនាង និងក្រុមគ្រួសារ ដែល​ពួក​នាង បានថតតាំង​ពីមួយ​ឆ្នាំ​មុន (២០១១)។ រីឯប្រុស​ក្មេង​ម្នាក់នោះ ជាប្អូនប្រុសរបស់នាង។

តារាចម្រៀងបាន​និយាយពន្យល់ថា វីដេអូ​នេះ ត្រូវ​បាន​ថតដោយ​ទូរស័ព្ទ​ដៃ ​របស់​ប្អូនប្រុសនាងនេះឯង ប៉ុន្តែ​ជា​អកុសល ទូរស័ព្ទ​នោះបានបាត់ ដែល​ជា​មូលហេតុ ធ្វើឲ្យវីដេអូ​របស់​នាង ក្នុង​កាយវិការរាំ«មិនធម្មតា»មួយ​នេះ ត្រូវបានបែក​ធ្លាយ​ចេញជាសាធារណៈ៕