មនុស្សយន្ដពិតប្រាកដ ដែលមានឈ្មោះ «J-deite RIDE» ដែលមានច្បាប់អនុញ្ញាតឲ្យផលិត ពីផលិតកម្ម​ម្ចាស់​ភាពយន្ដ «Transformer»នោះ នឹងអាចឃើញពន្លឺថ្ងៃ នៅពីរឆ្នាំខាងមុខ ហើយវានឹងត្រូវផលិតឡើង ដោយ​សហគ្រាសជប៉ុនចំនួនពីរ «Brave Robotics» និង«Asratec»។ មនុស្សយន្ដក្នុងពេលនេះ ស្ថិត​ក្នុង​លក្ខណៈ​​ជា​គំរូ ដែលមានទំហំតូចនៅឡើយ។ ប៉ុន្តែនៅដំណាក់កាលជាបន្តបន្ទាប់ មនុស្សយន្ដមួយទៀត នឹង​ត្រូវ​ផលិត​ចេញ មុន​នឹងមនុស្សយន្ដចុងក្រោយ ដែលមានកំពស់ ៣,៥ម៉ែត្រ ត្រូវបានសម្រេចយក មក​ដំណើរ​ការ​ជា​ចុង​ក្រោយ។

លោក កេនជី អ៊ីស៊ីដា (Kenji Ishida) អ្នកស្រាវជ្រាវ ផលិតមនុស្សយន្ដនេះ បានថ្លែងឡើងក្នុង​ពេល​នេះ៖ «វាត្រូវ​ការរយៈពេលយ៉ាងហោច ១០វិនាទី ដើម្បីមនុស្សយន្ដនេះ អាចធ្វើការប្ដូររូប ពីមនុស្សយន្ដ ទៅ​ជា​រថយន្ដ ឬពី​រថយន្ដ ទៅជាមនុស្សយន្ដ»។ មនុស្សយន្ដ «J-deite RIDE» មានលទ្ធភាពដើរ ក្នុង​ល្បឿន​១០គីឡូម៉ែត្រ ក្នុង​មួយ​ម៉ោង និងរត់ដោយកង់ ក្នុងល្បឿន៦០គីឡូម៉ែត្រ ក្នុងមួយម៉ោង។ នៅពេលវា​ក្លាយ​ខ្លួន ជា​រថយន្ដ វា​នឹង​មាន​បណ្ដោយ ប្រមាណជា ៣,៨ម៉ែត្រ ជាមួយនឹងទម្ងន់ជាង៧០០គីឡូក្រាម។

មនុស្សយន្ដនេះ អាចត្រូវបានម្ចាស់វាបញ្ជា ដោយចូលទៅក្នុងខ្លួនវា តែម្ដង ឬអាចបញ្ជា​ពី​ខាង​ក្រៅ ដោយ​ប្រើ​បច្ចេកវិទ្យាគ្មានខ្សែរ។

ជនជាតិជប៉ុនមានចំណូលចិត្តខ្លាំងណាស់ ទាក់ទងនឹងមនុស្សយន្ដ ទោះវាជាលក្ខណៈបែបណាក៏​ដោយ។ គេ​បានឃើញចំណូលចិត្តនេះ តាមរយៈការស្រមើរស្រម័យ ដែលមានក្នុងគំនូរជីវចល ឬភាពយន្ដឆ្នៃ​ប្រឌិត​​មួយ​ចំនួន ដែលមានអាយុកាល តាំងពីច្រើនសិបឆ្នាំមកហើយ។ ចំពោះលោក កេនជី អ៊ីស៊ីដា អ្នក​បង្កើត «J-Deite RIDE» ក៏មានចំណូលចិត្តដូច្នេះដែរ។ នៅក្នុងជីវប្រវត្តិ ដែលផ្សាយជាផ្លូវការរបស់លោក បាន​បង្ហាញ​ថា លោក​បានចូលចិត្ត ធ្វើមនុស្សយន្ដ ដែលអាចបម្លែងខ្លួនបាននេះ តាំងពីលោកនៅមាន វ័យជំទង់​មក​ម្លេះ៕