បុរសចំណាស់ ជាអ្នកដំណើរម្នាក់ នៅក្នុងព្រលានយន្ដហោះ ឆាឡុតឌូគ្លាស (Charlotte-Douglas) នៅក្នុង​រដ្ឋ​ការ៉ូលីនខាងជើង សហរដ្ឋអាមេរិក បានបង្កឲ្យមានភ្ញាក់ផ្អើលយ៉ាងខ្លាំង នៅចំពោះមនុស្សជាច្រើននាក់ ដែល​កំពុង​ត្រៀមខ្លួន ឡើងយន្ដហោះ។ បុរសចំណាស់យើង បានទម្លាក់ចោល ចេញពីខ្លួន នូវខោអាវទាំងអស់ ដើម្បី​តវ៉ា​ប្រឆាំង នឹងការមិននៅសល់កន្លែងទំនេរទៀត នៃជើងហោះហើរមួយ ដែលបុរសត្រូវជិះ។ នេះបើតាមការ​ផ្សាយ​ឲ្យដឹង របស់ទូរទស្សន៍ NBC កាលពីចុងខែមុន។

បុរសជាតិអាមេរិកាំងរូបនេះ ត្រូវធ្វើដំណើរតាមយន្ដហោះ ឆ្ពោះទៅកាន់ប្រទេស ចាម៉ែអីក (Jamaïque) ហើយ​បាន​មក​ព្រលានយន្ដហោះ ដោយមិនបានគិតថា ជើងហោះហើររបស់លោក ត្រូវបានអ្នកដំណើរផ្សេងទៀត ទិញ​យកកន្លែងអស់នោះទេ។ ប៉ុន្តែនៅពេល ដែលលោកបានដឹងថា កន្លែងត្រូវបានអ្នកផ្សេងទិញអស់ហើយ បុរស​ចំណាស់ បានស្រែកឡូឡាខ្លាំងៗឡើង ដល់បុគ្គលិករបស់ក្រុមហ៊ុន អាកាសចរណ៍ Us Airways មុននឹងប្រើ​ប្រាស់​មធ្យោបាយ«តវ៉ា»ម្យ៉ាងទៀត ដែលគួរឲ្យចាប់អារម្មណ៍ជាង។

អ្នកស្រី ខេឈី (Ketchie) ភ្នាក់ងារនគរបាលម្នាក់ ដែលនៅក្នុងហេតុការណ៍ ហើយដែលបានយករូបថត ដែល​អ្នកស្រីថតបាន យកមកបង្ហោះលើហ្វេសប៊ុកនោះ បានថ្លែងប្រាប់ទូរទស្សន៍ NBC ថា៖ «បុរសចំណាស់ បាន​ឈរ​នៅពីមុខបញ្ជរសំបុត្រ ដោយក្រពាត់ដៃធ្វើសង្ហា បន្ទាប់មកបានស្រែកដាក់ស្ត្រីម្នាក់ ដែលឈរក្នុងបញ្ជរ។ មួយ​សន្ទុះ​ក្រោយមកទៀត បុរសបានចាប់ផ្ដើម ស្រាតខោអាវចេញ ហើយបង្ហាញខ្លួន យ៉ាងននលគោល នៅនឹង​មុខ​គេ​ឯង។»

អ្នកស្រីនគរបាល បាននិយាយទៀតថា៖ «ខ្ញុំមិនដែលឃើញរឿងបែបនេះទេ ក្នុងមួយជីវិតនេះ។ អញ្ចឹង ខ្ញុំក៏ដក​ទូរស័ព្ទចេញមក រួចថតរូបពីបុរសនេះ។»

ចំណែកឯក្រុមហ៊ុនអាកាសចរណ៍វិញ មិនបានធ្វើអត្ថាធិប្បាយ ពីករណីនេះ ជាលក្ខណៈផ្លូវការទេ ហើយក៏មិន​បានធ្វើការប្ដឹងផ្ដល់អ្វីដែរ។ ប៉ុន្តែឈុតឆាក អាក្រាតកាយរបស់បុរសរូបនេះ បានកើតឡើងប្រមាណជា៤០នាទី មុននឹងកិច្ចអន្តរាគមន៍ ពីសំណាក់នគរបាល។ ប៉ុន្តែបុរសចំណាស់ មិនត្រូវបានកម្លាំងសមត្ថកិច្ចអាមេរិក ធ្វើការ​ឃាត់ខ្លួនទេ តែគេបានបញ្ជូនបុរស ទៅកាន់មន្ទីរពេទ្យវិញ ដើម្បីធ្វើការព្យាបាលរោគចិត្ត ដែលបុរសកំពុងមាន។ តាមប្រភពពីមន្ទីរពេទ្យ ដែលស្រង់សម្ដីដោយទូរទស្សនដដែល បានឲ្យដឹងថា បុរសចំណាស់មិនបានលេបថ្នាំ រំងាប់អារម្មណ៍ នៅមុននេះ ដែលធ្វើឲ្យគេយល់ភ្លាម ពីមូលហេតុអ្វី បានជាខោស្លីបរបស់គាត់ ងាយនឹងរបូត​ធ្លាក់​ចុះក្រោម យ៉ាងដូច្នេះ៕