នាយប៉ុស្តិ៍នគរបាលអន្តោរប្រវេសន៍ ច្រកទ្វាអន្តរជាតិប៉ោយប៉ែត លោក ស៊ីម សំអាត បានថ្លែងបដិសេធ ការជំរិតទារប្រាក់ ពីសំណាក់មន្ត្រីនគរបាលអន្តោរប្រវេសន៍ ទៅលើពលរដ្ឋអ្នកធ្វើការ រកទទួលទាន នៅនឹងច្រកព្រំដែន កម្ពុជា-ថៃ មួយ​នេះ។

សេចក្ដីបដិសេធ របស់លោកនាយនគរបាល បានធ្វើឡើង បន្ទាប់ពីពលរដ្ឋជាច្រើននាក់ ដែលជាអ្នករស់នៅ ឬអ្នករក​ទទួល​ទាន តាមច្រកទ្វារ ប៉ោយប៉ែត បានរអ៊ូរទាំឡើងថា មន្ត្រីនគរបាលអន្តោរប្រវេសន៍ មួយចំនួន បានធ្វើការជំរិត ទារប្រាក់ពី​ពួក​គាត់​ជា​ញឹកញាប់ ជាពិសេស នៅរៀងរាល់ពេល ដែលពួកគាត់ធ្វើប័ណ្ណ សម្រាប់ចេញចូលទឹកដីថៃនោះជាដើម។

ពលរដ្ឋទាំងនោះ បានអះអាងថា ការទាមទារឲ្យបង់ប្រាក់នេះ មានធ្វើតែភាគីមន្ត្រីអន្តោប្រវេសខ្មែរប៉ុណ្ណោះ តែនៅខាង​ភាគីថៃវិញ មិនមានឃើញទារឲ្យបង់ប្រាក់អ្វីទេ។

លោក ប្រុស រស់នៅខេត្តបន្ទាយមានជ័យ ដែលទើបនឹងបង់លុយ ឲ្យមន្ត្រីខ្មែររួចនោះ បានប្រាប់​ទស្សនាវដ្តី​មនោរម្យ.អាំងហ្វូ​ថា រូបលោកផ្ទាល់ ត្រូវបានគេទារលុយថ្លៃសំបុត្រចូល ៧០ បាត (១០០០០រៀល) ហើយបើករណី ដែល​ត្រូវ​ត្រឡប់​មកវិញ ហើយចូលម្តងទៀត ទោះជាក្នុងថ្ងៃតែមួយក៏ដោយ ក៏ត្រូវចំណាយម្តងទៀតដែរ។ លោកបញ្ជាក់ថា មិន​មែន​តែ​លោកម្នាក់ទេ ដែលត្រូវបង់លុយ គឺប្រជាពលរដ្ឋទាំងអស់ ដែលត្រូវចេញចូលទឹកដីថៃ តាមច្រកទ្វារ​អន្តជាតិ​ប៉ោយ​ប៉ែត ត្រង់ចំណុចភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវចំណាយប្រាក់ បង់ឲ្យ​មន្ត្រី​អន្តោរប្រវេសន៍​ខ្មែរទាំងអស់។

ការអ៊ូរទាំរបស់ពលរដ្ឋខាងលើនេះ ត្រូវបានលោក ស៊ីម សំអាត ថ្លែងបដិសេធខ្លាំងៗថា មន្ត្រីអ្នកធ្វើការ នៅក្នុងអង្គភាព​របស់លោក មានច្រើន ដូច្នេះបើមានម្នាក់ណា ប្រព្រឹត្តបែបនេះ កំបាំងពីភ្នែកលោក លោកមិនបានដឹងទេ។ តែបើតាម​គោល​ការណ៍ គឺគ្មានដូចប្រជាពលរដ្ឋ ចោទប្រកាន់នោះឡើយ។ លោកបានវាយបក ទៅក្រុមអ្នករអ៊ូរទាំវិញថា៖ «មន្ត្រីអន្តោរប្រវេសន៍ធ្វើអ្វី ក៏មិនគាប់ចិត្តអ្នកដំណើរឆ្លងដែនដែរ។ ចំណុចត្រូវជាច្រើន មិនមើលឃើញទេ មើលឃើញតែចំណុចខុស។»។

ដោយឡែក លោក ស៊ុំ ចាន់គា មន្រ្តីឃ្លាំមើល របស់សមាគមការពារសិទ្ធិមនុស្ស អាដហុក ប្រចាំខេត្តបន្ទាយមានជ័យ បានលើកឡើងថា វាមិនមែនជាលើកទីមួយទេ ដែលមន្ត្រីអន្តោប្រវេសន៍ តែងតែយកលុយ ពីអ្នកឆ្លងកាត់ព្រំដែននោះ ហើយបានបរិហារថា នេះជាអំពើពុករលួយ ប្រព្រឹត្តិឡើង ដោយមន្ត្រីសាធារណៈ នៅតាមច្រកទ្វាព្រំដែន។ មន្ត្រី​អាដហុក​រូបនេះ បានលើកឡើងថា បើច្រកទ្វារអន្តរជាតិ នៅតែមានសកម្មភាពពុករលួយ បែបនេះទៀត ប្រទេសកម្ពុជានឹងខ្មាសគេ នៅពេលដែលសមាហរណកម្ម អាស៊ាន មកដល់៕