នៅម៉ោងប្រមាណ ៨ព្រឹក ថ្ងៃទី១១ ខែឧសភា ឆ្នាំ២០១៥ មានករណីគ្រោះថ្នាក់មួយ បានកើតឡើងរវាងរថយន្ដ និងរថយន្ដ ដោយអ្នកបើកបរ មិនបានប្រុងប្រយ័ត្នទាំងសងខាង បណ្តាលឲ្យមានគ្រោះថ្នាក់ នៅបណ្តោយផ្លូវ លេខ១៣៤ ត្រង់ចំណុច​កែង ស្ថិតក្នុងសង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។ ករណីនេះ មិនមានអ្នកធ្វើដំណើរណាម្នាក់ រងរបួស​នោះ​ទេ តែរថយន្តទាំងពីរ បានរងការខូចខាត ផ្នែកខាងមុខ។

សាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្តម៉ាក វីកូ ពណ៍ប្រាក់ពាក់ស្លាកលេខ ភ្នំពេញ​២P-២០៨៩ បានបើកបរ នៅតាមបណ្តោយផ្លូវ២២១ ក្នុងទិដៅពីជើងទៅត្បូង ដែលមានបុរសម្នាក់ឈ្មោះ អាំង សៀក អាយុ ៥២ ឆ្នាំជាអ្នកបញ្ជាចង្កូត។ មកដល់ ចំណុចកើតហេតុ ស្រាប់តែបានជល់គ្នា ជាមួយរថយន្តមួយគ្រឿងទៀត ម៉ាកកូរ៉េ​ពណ៍​ខៀវ ពាក់ស្លាកលេខ ភ្នំពេញ២P-១០៩៤ កំពុងបើកបរដោយឈ្មោះ វន នឹមឡេង អាយុ៤០ឆ្នាំ យ៉ាងលឿនដល់ត្រង់ផ្លូវកែង ក៏បានបុកគ្នា ជាមួយឡានខាងលើ បណ្តាលឲ្យរថយន្តខ្លួនឯង រងខូចខាតផ្នែកខាងមុខ។

បន្ទាប់ពីមានហេតុការណ៍នេះកើតឡើង ម្ចាស់ឡានទាំងពីរ បានប្រកែកគ្នាមួយសន្ទុះ។ តែពេលភ្លាមៗនោះ សមត្ថកិច្ច​ចរាចរណ៍ ក្នុងសង្កាត់ផ្សារដេប៉ូទី២ បានចុះធ្វើការវាស់វែង។ សមត្ថកិច្ចបានបញ្ជាក់ថា ភាគីខាងរថយន្តកូរ៉េ ជាអ្នកខុស ព្រោះ​ភាគីម្ខាងទៀត បានបើកបរនៅខាងស្តាំត្រូវ ចំណែកឯឡានកូរ៉េ បន្ថែមល្បឿន បំរុងឡើងទៅផ្លូវធំ ជាអ្នកបង្ក។ បន្ទាប់​ពីរការបញ្ជាក់ របស់សមត្ថកិច្ច ភាគីទាំងសងខាង បានសម្របសម្រួលគ្នា បញ្ចប់រឿងនៅកន្លែងកើតហេតុ ដោយយល់ព្រម ជុសជុលរថយន្តរៀងៗខ្លួន៕