នៅចំពោះការរើសអើង និងការម៉ាក់ងាយ ពីសំណាក់មនុស្ស អ្នកលេងសើចមួយចំនួន នៅតាមបណ្ដាញ​អ៊ិនធើណែត កញ្ញា លីហ្សី វេឡាស្កេ បានជ្រើសរើសការទ្រាំទ្រ ជាច្រើនឆ្នាំ មុននឹងបញ្ចេញសកម្មភាព ដើម្បី​ប្រតិកម្មតបតរវិញ។ រងគ្រោះនឹងជម្ងឺ «Marfan» ដ៏កម្រម្យ៉ាង ដែលធ្វើឲ្យកញ្ញា មិនអាចផ្ទុក​ជាតិខ្លាញ់​នៅ​ក្នុង​ខ្លួន និងមិនអាចធំធាត់បាន កញ្ញា លីហ្សី វេឡាស្កេ ដែលពិកាភ្នែក​មួយចំហៀងទៀតនោះ បានរងទុក្ខ​នឹង​ការ​រើសអើង និងការម៉ាក់ងាយ តាំងពីកញ្ញាមានអាយុ ១៧ឆ្នាំ។ កាលនោះ កញ្ញាបានរកឃើញដោយចៃដន្យ នូវ​វីដេអូមួយ ដែលថតពីកញ្ញា ហើយដែលត្រូវបានបង្ហោះ នៅលើគេហទំព័រ យូធូប ជាមួយនឹង​ការធ្វើ​អត្ថាធិប្បាយ ដ៏សែនអប្រិយ វាយតម្លៃកញ្ញា ជា«ស្ត្រីដែលមានរូបអាក្រក់ជាងគេ នៅក្នុងពិភពលោក»។

នៅក្នុងសន្និសីទមួយក្នុងក្រុង អូស្តីន (Austin ក្នុងរដ្ឋ Texas សហរដ្ឋអាមេរិក) ដើម្បីបង្ហាញពីការ​ចេញ​បញ្ចាំង តាមរោងភាពយន្ដមួយចំនួន (នៅអាមេរិក) នូវភាពយន្ដឯកសារ «The Lizzie Velasquez Story» ស្ដីពី​ជីវិត​របស់​នាងផ្ទាល់នោះ កញ្ញា លីហ្សី បានថ្លែងថា៖ «ខ្ញុំរន្ធត់ខ្លាំងណាស់ តែការរន្ធត់នេះ មិនដល់ថ្នាក់ ដូច​ពេល​ដែល​ខ្ញុំ បានអានអត្ថាធិប្បាយ របស់អ្នកប្រើប្រាស់គេហទំព័រ យូធូប នៅខាងក្រោមវីដេអូ និយាយ​ពី​រូប​ខ្ញុំ​នោះ​ទេ។ នៅពេលនោះ ខ្ញុំមានអារម្មណ៍ថា ពោះរបស់ខ្ញុំ បានរមួលចូលគ្នា។»

ភាពរន្ធត់ញាប់ញ័រ មានសភាពខ្លាំងក្លាណាស់ ព្រោះក្រៅពីមានសភាពខុស ពីមនុស្សផងទាំងពួង និង​រស់​នៅ ជាមួយជំងឺប្រចាំកាយរហូតនោះ កញ្ញា លីហ្សី ត្រូវប្រឈម នឹងការ«មើលលើសម្លឹងក្រោម» ដោយ​មិន​ឈប់​ឈរ ពីសំណាក់មនុស្សមួយភាគ នៃពិភពលោករបស់យើង។ ជាពិសេស អ្នកខ្លះថែមទាំងបានជំរុញ​ឲ្យ​នាង ​ទៅ​​ធ្វើ​​អត្តឃាត​នោះ​ថែម​ទៀត។

ប៉ុន្តែនៅថ្ងៃនេះ ជាមួយនឹងគម្រោងជាច្រើន ដែលចេញពីបំណងផ្ទាល់របស់នាង និងការគាំទ្រ ពីសំណាក់​ជន​ល្បីៗជាច្រើននោះ កញ្ញា លីហ្សី បានសម្ដែងក្ដីរីករាយរបស់នាង ប្រកបដោយក្ដីសង្ឃឹមមួយ យ៉ាងមុខមាំ ថា​នឹង​អាចធ្វើឲ្យផ្លាស់ប្ដូរ នូវ«ផ្នត់គំនិត»ដ៏គួរឲ្យស្អប់ខ្ពើម។ នាងបានថ្លែង ប្រាប់ទស្សនាវដ្ដីអាមេរិក «People» ថា៖ «បើ​សិន​​ជា​ថ្ងៃណាមួយ ខ្ញុំបានជួបជាមួយម្ចាស់វីដេអូ ដែលបង្ហាញពីរូបខ្ញុំនេះ ខ្ញុំនឹងអោបគាត់ឲ្យណែន នៅ​ក្នុង​​ដៃ។ វីដេអូនេះ បានធ្វើឲ្យផ្លាស់ប្ដូរ នូវអ្វីៗគ្រប់យ៉ាង ហើយវាបានផ្ដល់មធ្យោបាយ ឲ្យខ្ញុំធ្វើការតស៊ូ និង​ប្រតិកម្ម​​ជំនួសមនុស្សទាំងឡាយ ដែលរងការចំអក ដូចខ្ញុំជាដើម។»។

បន្ទាប់ពីប្រតិកម្មរបស់នាង ដែលបានបង្កភាពញាប់ញ័រ ដល់ពិភពលោក ជនល្បីៗជាច្រើននាក់ បាន​សម្ដែង​ការកោតសរសើរ និងការគាំទ្ររបស់ពួកគេ កាន់តែខ្លាំងឡើង ចំពោះស្ត្រីរងគ្រោះម្នាក់នេះ។ ជា​ពិសេស ជន​ល្បីៗទាំងនោះ រាប់ទាំងតារាភាពយន្ដធំៗ នៅពិភពហូលីវូដផង បានបង្ហោះសាររបស់ពួកគេ នៅ​លើ​បណ្ដាញ​សង្គម ដើម្បីជំរុញឲ្យក្រុមអ្នកវិទ្យាសាស្ត្រ ធ្វើការស្រាវជ្រាវ ពីជំងឺ «Marfan» ឲ្យ​បាន​កាន់​តែឆាប់៕