គ្រូបង្រៀនផ្នែកមុខវិជ្ជា គណិតវិទ្យាមួយរូប ត្រូវបានបណ្ដេញចេញ ពីសាលារៀនមួយ ក្នុងខេត្ត ជុងគីង (Chongqing ភាគ​អាគ្នេយ៍ នៃប្រទេសចិន) បន្ទាប់ពីវីដេអូ នៃរឿងអាស្រូវ របស់គ្រូបង្រៀនរូបនោះ ត្រូវបានបែកធ្លាយ នៅតាមបណ្ដាញ​អ៊ិនធើណែត។ ការពីថ្ងៃអាទិត្យ សប្ដាហ៍មុន គ្រូបង្រៀន ដែលមានវ័យចំណាស់ម្នាក់នេះ ត្រូវបានលួចថត ពីចំងាយ ខណៈ​គាត់កំពុងនៅជាមួយ កូនសិស្សស្រីរបស់គាត់ ដែលមានអាយុទើបតែ១៦ឆ្នាំ តែពីរនាក់ នៅក្នុងបន្ទប់រៀន។

វីដេអូនោះ គេឃើញគ្រូបង្រៀន កំពុងបំបោសអង្អែល និងអោបកូនសិស្សជំទង់ ដែលទំនង ដូចជាចង់រើបម្រាស់ចេញ។ ប៉ុន្តែ​បុរសចំណាស់ បានចាប់អោបនាងជាប់ ហើយអោនថើប កញ្ចឹង ក របស់នាង។

សារព័ត៌មាន «South China Morning Post» បានរាយការណ៍ថា បន្ទាប់ពីត្រូវបានបង្ហោះ នៅលើបណ្ដាញសង្គម និង​បណ្ដាញចែកផ្សាយវីដេអូ របស់ចិនរួច វីដេអូបានបង្កឲ្យផ្ទុះ ជារឿងអាស្រូវដ៏ខ្លាំងមួយ នៅក្នុងតំបន់។ អ្នកខ្លះ បាន​ទាមទារ​ឲ្យ ដាក់ទណ្ឌកម្ម ប្រឆាំងនឹងសាលា។

រដ្ឋបាលតំបន់ និងក្រុមប្រឹក្សាសិក្សាធិការ ប្រចាំក្រុង យូបី (Yubei) បានប្រកាស​បើក​ការស៊ើបអង្កេតមួយ ទៅលើករណី​នេះ ហើយបានបញ្ជាក់ថា វីដេអូនេះ ជាវីដេអូពិត។ គ្រូបង្រៀន​ ត្រូវបានបណ្ដេញចេញ ពីសាលារៀនភ្លាមៗ ដោយចោទ​ពី​បទ បានប្រព្រឹត្តិកំហុស ក្នុងអាជីពយ៉ាងធ្ងន់ធ្ងរ។

ប៉ុន្តែការស៊ើបអង្កេត នៅមិនទាន់បញ្ចប់ទេ និងកំពុងបន្តធ្វើ ទៅលើគ្រូបង្រៀនផ្សេងទៀត នៅក្នុងសាលារៀននោះ។ សាលា​​រៀនបានចេញមកប្រកាស តាមរយៈអ្នកគ្រប់គ្រងរបស់ខ្លួនថា៖ «យើងមិនអត់អោនឲ្យជាដាច់ខាត នូវចរិក​លក្ខណៈ​បែបនេះ នៅក្នុងសាលារៀនរបស់យើង ទោះអ្នកនោះ ជានរណាក៏ដោយ ជាពិសេស ចំពោះគ្រូ​បង្រៀន​របស់​យើង។»៕