យ៉ាងណាក៏ដោយ ជាងមួយឆ្នាំក្រោយមក អាជ្ញាធរនៅតែចិញ្ចឹមចិត្ត តាមស្វែងរកយន្ដហោះបាត់ខ្លួននេះ នៅឡើយ។ នៅ​ថ្ងៃព្រហស្បត្តិ៍ទី១៦ ខែមេសានេះ ការរុករកយន្ដហោះ ប៊ូអីង (Boeing 777) របស់ក្រុមហ៊ុនអាកាសចរណ៍ ម៉ាឡេស៊ី​អ៊ែរឡាញ ដែលបានបាត់ខ្លួនតាំងពីថ្ងៃទី០៨ ខែមីនា ឆ្នាំ២០១៤ ត្រូវបានប្រកាសសារជាថ្មីថា នឹងត្រូវពង្រីកទ្វេឡើង ប្រសិន​បើ​គ្មានអ្វី ត្រូវបានរកឃើញ ក្នុងពេលនេះទេ។ នេះជាការប្រកាសរួមគ្នា រវាងអ្នកទទួលខុសត្រូវ ក្នុងការរុករក​យន្ដហោះ នៃ​ប្រទេស​ម៉ាឡេស៊ី អូស្ត្រាលី និងចិន។

សេចក្ដីប្រកាសព័ត៌មានរួមគ្នាមួយ របស់ប្រទេសទាំងបី បន្ទាប់ពីការប្រជុំនៅរដ្ឋធានី កូឡាឡំពួរ បានឲ្យដឹងថា តំបន់​សង្ស័យ ដែលនឹងត្រូវធ្វើការរុករក នឹងពង្រីកឡើងដល់ ១២០ ០០០ គីឡូម៉ែត្រក្រឡា (ពីមុន មានត្រឹមតែ ៦០ ០០០ គីឡូម៉ែត្រ​ក្រឡា) ប្រសិនបើការរុករកក្នុងពេលនេះ មិនបានផ្ដល់នូវលទ្ធផលអ្វីសោះ។

ការរុករកក្នុងពេលកន្លងមក ទៅលើតំបន់ ដែលត្រូវបានសង្ស័យ ដោយការចាប់រូបភាព របស់ប្រព័ន្ធផ្កាយរណបនោះ ត្រូវ​បានធ្វើសម្រេច ទៅលើផ្ទៃក្រឡា ៦០ភាគរយហើយ។ ហើយគម្រោង នៃតំបន់រុករក ដែលកើនឡើងទ្វេដង ទៅលើ​យន្ដហោះបាត់ខ្លួន អាចនឹងមានរយៈពេលជាច្រើនឆ្នាំទៀត ដោយយោងទៅលើភាពពិបាក ក្នុងការចូលទៅតំបន់ ទាំង​នោះ ក៏ដូចជាស្ថានភាពឧត្តុនិយម មិនអំណោយផល។

យន្ដហោះ ប៊ូអ៊ីង ដែលភ្ជាប់ជើងហោះហើរ MH370 ពីរដ្ឋធានីកូឡាឡំពួរ ប្រទេសម៉ាឡេស៊ី ឆ្ពោះទៅរដ្ឋធានីប៉េកាំង ប្រទេស​ចិន បានបាត់ខ្លួន ពីប្រព័ន្ធត្រួតពិនិត្យអាកាស យ៉ាងអាថ៌កំបាំង នៅមួយម៉ោងក្រោយការងើបហោះ ចេញពីដី កាល​ពីថ្ងៃ​ទី០៨ ខែមីនា ឆ្នាំទៅម៉ិញ។ នៅក្នុងយន្ដហោះ មានមនុស្ស២៣៩នាក់ រាប់ទាំងអ្នកដំណើរ និងបុគ្គលិកបម្រើការ នៅ​លើ​យន្ដហោះ។

កាលពីខែមករា ឆ្នាំ២០១៥នេះ អាជ្ញាធរម៉ាឡេស៊ី បានប្រកាសជាផ្លូវការថា ការបាត់ខ្លួន របស់យន្ដហោះ ជា«គ្រោះ​ឧប្បត្តិ​ហេតុ» ខណៈដែលការស៊ើបអង្កេត មិនបានរកឃើញ អ្វីទាំងអស់។ អាជ្ញាធរខ្លួនឯង មិនបានដឹងច្បាស់ថា តើយន្ដហោះ​បាន​បញ្ចប់ដំណើរខ្លួន ទៅកាន់ទីណា ឬនៅតំបន់ណា នោះឡើយ។ ភាពឃ្លីងឃ្លោងនេះ បានបង្កឲ្យមានការលើកឡើង និង​ការរក​ឃើញ​ខុសៗ​គ្នា ពីការបាត់យន្ដហោះនេះ។

ការពន្យល់តែមួយ ដែលអាចយកជាការបាន ដោយក្រុមអ្នកស៊ើបអង្កេត គ្រាន់តែបានបញ្ជាក់ថា ការធ្លាក់ចុះដ៏គំហុក​នៃ​សម្ពាធខ្យល់អុកស៊ីសែន អាចធ្វើក្រុមអ្នកបើកបរយន្ដហោះ និងអ្នកដំណើរទាំងអស់ សន្លប់លែងដឹងខ្លួន ហើយយន្ដហោះ បានបន្តដំណើររបស់ខ្លួន ដោយស្វ័យប្រវត្តិ រហូតធ្លាក់ចូលសមុទ្រ បន្ទាប់ពីអស់សាំង៕

---------------------------------------

» ស្វែងយល់បន្ថែម ពីការបាត់យន្ដហោះនេះ ជាវីដេអូ៖