ដំណឹងធ្លាក់យន្ដហោះ ត្រូវបានឲ្យដឹងតាំងពីថ្ងៃសុក្រ ទី០៥ ខែកញ្ញានេះ ដោយបណ្ដាញផ្សព្វផ្សាយ របស់​អាមេរិក ប៉ុន្តែគេគ្រាន់តែដឹងថា ជាយន្ដហោះដែលមិនស្គាល់អត្តសញ្ញាណប៉ុណ្ណោះ។ ប៉ុន្តែព័ត៌មាន ដែល​ធ្លាក់មកច្បាស់ជាងមុន នៅថ្ងៃសៅរ៍ទី០៦នេះ បានអះអាងថា យន្ដហោះឯកជន ដែលអាចផ្ទុកមនុស្សបាន ពី៦ ទៅ ៧នាក់ ធុន Socata TBM-700 បានហោះចេញ ពីក្រុងរ៉ូសឆេស្ទើរ (Rochester) នៃរដ្ឋញ៉ូយក សហរដ្ឋ​អាមេរិក ឆ្ពោះទៅកាន់ទីក្រុង ណាព (Naples) នៃរដ្ឋផ្លរីដ។

តែយ៉ាងណាក៏ដោយ សហព័ន្ធរដ្ឋបាលអាកាសចរណ៍ស៊ីវិល អាមេរិក នៅមិនទាន់អាចបញ្ជាក់ឲ្យដឹង ថា​ចំនួន​មនុស្សជិះលើយន្ដហោះនេះ មានចំនួនប៉ុន្មាននោះនៅឡើយ។ សហព័ន្ធបានបន្ថែមទៀតថា នៅវេលា​ម៉ោង​ប្រមាណជា ៤រសៀល (ម៉ោងក្នុងស្រុក) ថ្ងៃសុក្រនោះ យន្ដហោះបានឈប់ផ្ដល់សញ្ញា ទៅនឹងការ​ទាក់ទង​តាមវិទ្យុ។ ប្រមាណជា១ម៉ោងកន្លះក្រោយមក យន្ដហោះប្រដេញធុន F-15 ត្រូវបាន​បញ្ជូនមកហោះ​អម​យន្ដហោះ​ឯកជននេះ រហូតដល់យន្ដហោះ បានហោះចូលក្នុងដែនអាកាស របស់ប្រទេសគុយបា។

លោក ចូសេហ្វ ម័រ៉ែល (Joseph Morelle) តំណាងរាស្ត្រមួយរូបពីរដ្ឋញ៉ូយក បានថ្ងែងឡើងថា យ៉ាងហោច​ណាស់ មនុស្សពីរនាក់នៅលើយន្ដហោះម៉ាស៊ីទោលនេះ ទំនងជាបានស្លាប់ ក្នុងនោះម្នាក់ជាអ្នកជំនួញ​ខាង​អចលនវត្ថុ និងម្នាក់ទៀតជាភវិយារបស់អ្នកជំនួញរូបនោះ។

បើតាមសាក្សីច្បាស់ការណ៍មួយរូប ដែលនិយាយក្នុងល័ក្ខខ័ណ្ឌមិនបញ្ចេញឈ្មោះ បានថ្លែងប្រាប់ទូរទស្សន៍ NBC News ថា អ្នកបើកបរយន្ដហោះ បានបាត់ស្មារតី ហើយបានដេកដួលនៅក្នុងកៅអីបើកបររហូត។ សម្រាប់​អាជ្ញាធរនៃប្រទេសចាម៉ៃអីកវិញ ក៏បានគិតដែរថា យន្ដហោះអាចធ្លាក់នៅក្នុងឈូងសមុទ្ររបស់ខ្លួន ដោយ​សារ​តែ​បានឃើញប្រេងសាំងយន្ដហោះ បានអណ្ដែតមកជិតតំបន់ឆ្នេររបស់ខ្លួន។ ការរុករកតួ​យន្ដហោះ ត្រូវ​បាន​បន្ត​ធ្វើ នៅព្រឹកថ្ងៃសៅរ៍នេះ បន្ទាប់ពីបានផ្អាក នៅយប់ថ្ងៃសុក្រ។ នាវាអាមេរិកមួយគ្រឿង គ្រោង​​នឹង​​ទៅ​ដល់​តំបន់​នោះ ដើម្បីផ្ដល់សន្ទុះដល់ការរុករកដូចគ្នា៕