គ្រោះ​ថ្នាក់​ចរាចរណ៍៖ ទាល់​តែ​បុក​អង្គរក្ស​នាយក​រដ្ឋមន្ត្រី ទើប​ចាត់​ការ?

ពីមួយថ្ងៃទៅមួយថ្ងៃ នៅប្រទេសកម្ពុជា មានមនុស្សស្លាប់ ដោយគ្រោះថ្នាក់ចរាចរណ៍ ចេះតែបន្តមាន យ៉ាងរន្ធត់។ គ្រោះ​ថ្នាក់​ចរាចរណ៍​នោះ ច្រើន​ផ្តើម​ឡើង ដោយការមិនគោរពច្បាប់ ដោយអ្នកបើកបរ ពិសេសអ្នកកំពុងបើកបរ ដែលត្រូវបានបំពុល ដោយ«គ្រឿងស្រវឹង»ជាដើម។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី៣ មេសា ២០១៥
  • កែប្រែចុងក្រោយ: April 06, 2015
  • ប្រធានបទ: ចរាចរណ៍
  • អត្ថបទ: មានបញ្ហា?
  • មតិ-យោបល់

នៅប្រទេសកម្ពុជា កម្រថ្ងៃណាមួយ ដែលគ្មានគ្រោះថ្នាក់ចរាចរណ៍ណាស់។ តែប្រសិនជាមាន គ្រោះថ្នាក់​ចរាចរណ៍ សាហាវៗ ដូចយ៉ាង «កិនបែកខួរ» ឬ«បុកដាច់ក្បាល»... វាគ្រាន់តែជាព្រឹត្តិការណ៍ ដ៏«ពិសេសៗ» សម្រាប់ក្រុម អ្នក​សារព័ត៌មាន​មួយចំនួន ឬក្រុមអ្នកប្រើប្រាស់ បណ្ដាញសង្គម យកមកធ្វើជាអត្ថបទប្រចាំថ្ងៃ របស់​ពួកគេ ដើម្បីស្វែងរក​អតិថិជន ទាំងមិនដឹងថា តើរូបភាព ឬទិដ្ឋភាពនោះ គួរត្រូវចុះផ្សាយបិតបាំង បែបណា នោះ​ឡើយ។ ប៉ុន្តែចំពោះ​ចំណាត់​ការ ពីសំណាក់អាជ្ញាធរទទួលខុសត្រូវ ផ្នែកចរាចរណ៍ផ្លូវគោកវិញ មិនត្រូវបាន​គេ​ឃើញ​ថា បានបង្កើនវិធានការ ដើម្បី​ធ្វើ​យ៉ាងណា កាត់បន្ថយនូវគ្រោះថ្នាក់ចរាចរណ៍ ឲ្យបានយ៉ាងដូចម្ដេចទេ។

រហូតមកដល់ ថ្ងៃទី០១ ខែមេសា វេលាម៉ោង២ រំលងអាធ្រាតកន្លងទៅ បន្ទាប់ពីព្រឹត្តិការណ៍បើកបំបុក របស់និស្សិត​ស្រី​ម្នាក់ អ៊ុង កុលហ្សានិច អាយុ២៦ឆ្នាំ ដែលបានបើកបរទាំងស្រវឹង ទៅបុកបំបាក់ដើមឈើ និងឲ្យរបួសធ្ងន់​អង្គរក្ស​ពីរនាក់ នៅនឹងមុខគេហដ្ឋាន ជិតវិមានឯករាជ្យ របស់លោកនាយករដ្ឋមន្ត្រី ហ៊ុន សែន នោះ ស្រាប់តែគេ​ឃើញចំណាត់ការ ពី​សំណាក់អាជ្ញាធរ ទៅលើគ្រោះថ្នាក់ចរាចរណ៍ ហាក់មានប្រសិទ្ធិភាពជាងមុន។ យុវតីបើកបរ ត្រូវបានឃាត់ និងឃុំខ្លួន ហើយ​បញ្ជូនទៅតុលាការ និងត្រូវបានចោទប្រកាន់ នៅមួយថ្ងៃក្រោយមក ពីបទបើកបរ​បង្កគ្រោះថ្នាក់ និងធ្វើឲ្យខូចខាត​ដោយអចេតនា ប់ុន្តែត្រូវបានដោះលែង ឲ្យនៅក្រៅឃុំជាបណ្ដោះអាសន្នវិញ នៅថ្ងៃទី៣ ខែមេសា។

អ្នកឃ្លាំមើលបញ្ហាសង្គម បានធ្វើការវាយតម្លៃថា ចំណាត់ការលើកនេះមានប្រសិទ្ធភាព ព្រោះជនរងគ្រោះ ជា​អង្គរក្ស​របស់​នាយក​រដ្ឋមន្ត្រី ដែលអ្នកផងមើលឃើញថា ជាស្បែកមួយយ៉ាងក្រាស នៅក្នុង​ព្រះរាជា​ណាចក្រ​កម្ពុជា។ លោក ណៃ វ៉ង់ដា សកម្មជនមួយរូប ពី​សមាគម​ការពារសិទ្ធិមនុស្ស អាដហុក បានថ្លែងប្រាប់​ទស្សនាវដ្តី​មនោរម្យ.អាំងហ្វូ ឡើងថា មន្រ្តី​តុលាការ និងមន្រ្តីប៉ូលីសចរាចរណ៍ ច្រើនអនុវត្តទៅតាមឋានៈ បុណ្យស័ក្ត ឬមុខ​មាត់នៃអ្នកបង្កហេតុ ឬអ្នករងគ្រោះ​ប៉ុណ្ណោះ។ មន្ត្រីសង្គមស៊ីវិលរូបនេះ បានលើកជាឧទាហរណ៍ថា បើ​«ជន​រង​គ្រោះ» មានបងប្អូន ឬសាច់ញាតិជាអ្នកធំ អ្នកមានមុខមាត់ ឬបុណ្យស័ក្ត ច្បាស់ជាចាប់ជនល្មើសមក​ផ្តន្ទាទោស​បាន។ ផ្ទុយមកវិញ តែបើ«ជនល្មើស» មានបងប្អូន ឬសាច់ញាតិជាអ្នកធំ អ្នកមានមុខមាត់ ឬបុណ្យស័ក្ត ក៏ច្បាស់​ជារួចខ្លួន ទៅតាមនោះដែរ។ ឯជនក្រីក្រ ឬអ្នកតូចតាច​ធម្មតា ច្បាស់ជាចាំតែទទួលកំហុស ទាំង​«អយុត្តិធម៌»​មិន​ខាន។

លោក ណៃ វង់ដា ដែលជាអនុប្រធានផ្នែក និងមេធាវីតំបន់ នៃសមាគមអាដហុកផងនោះ បានសម្ដែងការខកចិត្ត ចំពោះ​របាយការណ៍ និងចំណាត់ការរបស់តុលាការ ក្នុងការកំណត់ទោស ក៏ព្រោះតែយុវតីនោះ បើកបរ ហើយ​បង្ក​គ្រោះថ្នាក់ ក្បែរផ្ទះលោកនាយករដ្ឋមន្រ្តី ហ៊ុន សែនតែប៉ុណ្ណោះ។ ផ្ទុយមកវិញ បើករណីដដែលនេះ កើតឡើង​នៅ​មុខ​ផ្ទះប្រជា​ពលរដ្ឋ​ធម្មតាវិញនោះ ប្រហែលជាការសម្រេច និងផ្តន្ទាទោសចំពោះយុវតីខាងលើ អាចស្រាល​ជាង​នេះ ឬក៏រួចខ្លួន​តែ​ម្តង គ្រាន់តែសងជំងឺចិត្ត និងសងការខូចខាតជាការស្រេច។ លោក វង់ដា បានថ្លែងឡើងថា៖ «ព្រោះតែករណីបង្កឡើង នៅមុខផ្ទះលោកនាយករដ្ឋមន្រ្តី ហ៊ុន សែន ចង់មិនចង់ (អាជ្ញាធរប៉ូលីស) មិន​អាច​លើក​លែង​ចោល​បានទេ។ ត្រូវតែ​ចោទ​ប្រកាន់ ត្រូវតែបញ្ជូនទៅតុលាការ។»

ទស្សនាវដ្ដីមនោរម្យ.អាំងហ្វូ ធ្លាប់បានធ្វើសេចក្ដីរាយការណ៍ជាច្រើន ពីករណីករណីគ្រោះថ្នាក់ចរាចរណ៍ ដែល​មាន​ទាំង​គ្រោះថ្នាក់ ក្នុងកម្រិតស្រាល និងកម្រិតធ្ងន់។ ប៉ុន្តែដំណោះស្រាយ របស់មន្ត្រីអាជ្ញាធរមួយចំនួន មិន​មាន​ភាព​ច្បាស់​លាស់ទេ ដោយពេលខ្លះ ជនល្មើសបើកបរខុសច្បាប់ទម្លាប់ និងបានបង្ករបួសស្នាម ដល់ជនរងគ្រោះ តែមន្ត្រី​អាជ្ញាធរ​ទាំង​នោះ មិនបានធ្វើដឹង ឬដឹងដែរ តែមិនហ៊ានអាកាត់ ព្រោះខ្លាចសុវត្ថិភាពផ្ទាល់ខ្លួន។ ពេលខ្លះ​ជនបង្ក បានបើកបរធ្វើ​ឲ្យ​ស្លាប់មនុស្ស តែបានរត់គេចខ្លួនបាត់ បន្ទាប់ពីហេតុការណ៍ ប៉ុន្តែនៅតែជាអាថ៌កំបាំង រក​ជនបង្កនោះមិនឃើញ រហូត​មក​ដល់សព្វថ្ងៃ។ ជាពិសេសនោះ គេក៏កាន់តែកម្រឃើញ មានករណីគ្រោះថ្នាក់​ចរាចរណ៍ ត្រូវបានបញ្ជូនឡើងទៅ​តុលាការ ដើម្បីស្វែងរកខុសត្រូវ ឬការផ្ដន្ទាទោសណាស់។

យ៉ាងណាក៏ដោយ ក៏លោក ណៃ វ៉ង់ដា បានចាត់ទុកករណីគ្រោះថ្នាក់ របស់យុវតីវ័យ២៦ឆ្នាំ អ៊ុង កុលហ្សានិច ថាជា​«យុត្តិសាស្រ្ត»​មួយ សម្រាប់ជាគំរូ យកទៅអនុវត្តគ្រប់បទល្មើសទាំងអស់ នៃគ្រោះថ្នាក់ចរាចរណ៍ ដែលបង្កឡើង ដោយ​ជនមិនគោរពច្បាប់។ លោកក៏បានផ្តោតសំខាន់ លើអ្នកបើកបរទាំងឡាយណា ដែលស្ថិតក្នុងស្ថានភាព មាន​គ្រឿង​ស្រវឹង​លើសពីច្បាប់ បានកំណត់ ដែលជាកំហុសមួយធ្ងន់ ត្រូវតែផ្តន្ទាទោសទៅតាមច្បាប់កំណត់។ លោកថា ទោះបីបទ​ល្មើសនោះ (គ្រោះថ្នាក់ចរាចរ) មានអ្នកស្លាប់ ឬគ្មានក៏ដោយ ទាំងតុលាការ ឬមន្រ្តីចរាចរណ៍ ត្រូវធ្វើការ​ថ្លឹងថ្លែង និង​កំណត់​បទល្មើស ព្រមទាំងទោសទណ្ឌ ទៅតាមស្ថានភាពជាក់ស្តែង ដែលបានបង្កឡើង និងមាន​ភាព​ស្មើគ្នាចំពោះមុខ​ច្បាប់ និងគ្រប់បុគ្គលទាំងអស់៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...