ការស្លាប់របស់កុមារីម្នាក់ ដែលជាជនជាតិ ចារ៉ាយ រស់នៅស្រុកអូយ៉ាដាវ ខេត្តរតនគិរី បានធ្វើឲ្យអ្នកស្រុកនេះ ដាក់​មន្ទិល​សង្ស័យផ្សេងៗគ្នា។ អ្នកខ្លះយល់ថា អាចជាឃាតកម្មសំលាប់ ព្រោះរឿងគំនុំ រឺឯអ្នកខ្លះទៀតយល់ថា វាអាចជា​ការរំលោភរួចហើយ សំលាប់ចោល បោះចូលទៅក្នុងទឹកស្រះ ចំការម្រេច។ យ៉ាងណាក៏ដោយ ក៏សាច់ញាតិជន​រង​គ្រោះ និងជនជាតិដើមភាគតិច ចារ៉ាយ ស្រុកអូយ៉ាដាវ មួយចំនួនទៀត បានការប្រត្តិកម្ម ទៅនឹងម្ចាស់ចំការម្រេច ដោយ​ហេតុថា បានជីកស្រះដើម្បីស្រោចម្រេច តែមិនធ្វើរបង ដែលនាំឲ្យក្មេងស្រី លង់ទឹកស្លាប់ដូច្នេះ។

ចំពោះការដាក់ការសង្ស័យ របស់ប្រជាពលរដ្ឋ ថាមានពាក់ព័ន្ធ នឹងការរំលោភ ឬឃាតកម្មព្រោះគំនុំនោះ ព្រោះតែអ្នក​ស្រុក បានឃើញនៅនឹងខ្នង របស់ក្មេងស្រីដែលលង់ទឹកនោះ មានជាប់ស្លាកស្នាមដាច់រលាត់ នៅត្រង់ស្មាមួយដុំធំ។ ស្លាកស្នាមនេះ ធ្វើឲ្យអ្នកស្រុកគិតថា មរណភាពនេះ មិនមែនជាការលង់ទឹក ដោយខ្លួនឯងនោះទេ។

បើទោះជាមានការលើកឡើងខុសគ្នា យ៉ាងដូច្នេះក្តី តែបើតាមការអះអាង របស់លោក ឆាយ ធី មន្ត្រីឃ្លាំ​មើលសិទ្ធិ​មនុស្ស របស់សមាគមការពារសិទ្ធិមនុស្ស អាដហុក ( Adhoc ) ប្រចាំខេត្តរតនគិរី បានប្រាប់ទស្សនាវដ្តី​មនោរម្យ.អាំងហ្វូ​ថា សមត្ថកិច្ចមិនទាន់ អាចសន្និដ្ឋានបានថា ករណីនេះជាឃាតកម្ម ឬយ៉ាងណានោះទេ ព្រោះកំពុងស្ថិតនៅក្នុង ដំណើរ​ការស៊ើបអង្កេត របស់សមត្ថកិច្ចនៅឡើយ។ រឺឯក្រុមការងារ របស់សមាគមអាដហុកវិញ បានកំពុងនឹងតាមដាន ចំពោះ​ករណីនេះដែរ ដើម្បីស្វែងរកការពិត ជូនប្រជាពលរដ្ឋនៅតំបន់នោះ។ លោក ឆាយ ធី បានថ្លែងថា លោក សេវ ទាំ និង​អ្នកស្រី សល់ ក្រឹម ត្រូវជាឪពុកម្តាយរបស់សាកសព បានប្រាប់លោក និងអាជ្ញាធរថា ពួកគេទាំងពីរ មិនធ្លាប់មាន​ជំលោះ ជាមួយនឹងអ្នកណានោះទេ ពីមុនមក។

លោកបញ្ជាក់ថាកុមារី សល់ សុខា មានអាយុ ១២ ឆ្នាំបានបាត់ខ្លួន តាំងពីល្ងាចថ្ងៃទី ២៨ ខែមីនាមកម្លេះ ដោយមិនមាន​ដំណឹង ហើយស្ត្រីជាម្តាយ បានស្វែងរកស្ទើគ្រប់កន្លែង ប៉ុន្តែមិនបានឃើញ រហូតដល់ព្រឹកថ្ងៃទី ២៩ ខែមីនាវេលាម៉ោង ១១:០០ ទើបគេប្រទះឃើញ សាកសពកុមារីនេះ អណ្តែតនៅក្នុងស្រះទឹក ចំការម្រេច នៅជិតផ្ទះដែរនោះ។ សាកសព​ជនរងគ្រោះ ត្រូវបានគេស្រង់ឡើង មកលើគោក ទាំងមានស្នាមដាច់រលាត់ នៅខាងក្រោយស្មារមួយដុំធំ។

បើទោះជាយ៉ាងណាក៍ដោយ ជនជាតិដើមភាគតិច នៅតែមានការខឹង នឹងម្ចាស់ចំការម្រេច ដែលបានជីកស្រះទឹក ដោយ​មិនមានព័ន្ធរបង ទើបធ្វើឲ្យក្មេងត្រូវលង់ដូច្នេះ។ ម្ចាស់ចំការម្រេច ឈ្មោះ ពេទ្យ សៀត បានទទួលការស្តីបន្ទោស របស់​អ្នក​ស្រុក​ទាំងនោះ តែបានបកស្រាយថា ខ្លួនមិនទាន់បានព័ទ្ធរបងស្រះទឹក ដោយហេតុថា ស្រះទើបនឹង​ជីក​ហើយ​ថ្មីៗ។ ម្ចាស់​ស្រះ​រូប​នេះ បានចូលជាបច្ច័យ ក្នុងពិធីបុណ្យសព ២០០ដុល្លា ដើម្បីចូលរួមរំលែកទុក្ខ និងចាត់ចែង ធ្វើ​ពិធី​បុណ្យ។

សាកសពត្រូវបានគេរៀបចំធ្វើបុណ្យ ដូចជនជាតិខ្មែរទូទៅ និងមានការកាប់ក្របីផឹកស្រា ទៅតាមទំនៀមទំលាប់ របស់​ជនជាតិភាគតិចចារ៉ាយ។

គួបញ្ជាក់ថា ម្ចាស់ចំការម្រេចនោះ មិនមែនជាអ្នកស្រុក អូយ៉ាដាវ នោះទេ គាត់គ្រាន់តែជាអ្នកចំណាកស្រុក ដែលទើប​តែ​ទៅ​នៅទីនោះ និងធ្វើស្រែចំការនៅទីនោះប៉ុណ្ណោះ។ ហើយចំការរបស់គាត់ នៅមិនឆ្ងាយពីផ្ទះ របស់ក្មេងស្រីដែល​លង់​ទឹកនោះទេ។ កន្លងមក ជនជាតិដើមភាគតិច រស់នៅដោយអាស្រ័យនឹងធម្មជាតិ មិនធ្លាប់មានការជីកស្រះ ឬ​ត្រពាំង​ឡើយ ពោលគឺទើបតែមានស្រះទឹក របស់ម្ចាស់ចំការម្រេចនេះមួយគត់៕