ទោះជាមិនមានអ្វីធំដុំក៏ដោយ ក៏យ៉ាងហោយណាស់ ម៉ូតូមួយគ្រឿង រងការខូចខាតផ្នែកខាងមុខ ព្រោះម្ចាស់បានជិះ ទៅ​បុករឺម៉កម៉ូតូ ដែលកំពុងឈប់ស្ងៀម។ បន្ទាប់ពីបុករួច ម្ចាស់ម៉ូតូបានទាមទារ សំណងពីជនរងគ្រោះ ធ្វើឲ្យអ្នកដំណើរ​ទាំងអស់ ចោមរោមមើលយ៉ាងច្រើនកុះករ។ ហេតុការណ៍មួយនេះ បានកើតឡើង កាលពីវេលាម៉ោង ៥និង៣០ ល្ងាច​ថ្ងៃទី២០ ខែមិនា ឆ្នាំ២០១៥ នៅលើបណ្តោយផ្លូវមន្នីរ៉េត ត្រង់ចំណុចទល់មុខ វត្តស្ទឹងមានជ័យ ស្ថិតក្នុងខណ្ឌមានជ័យ រាជធានីភ្នំពេញ។

សាក្សីនៅកន្លែងកើតហេតុ បានឲ្យដឹងថា ដំបូងគេឃើញមានរឺម៉កដឹកឈើមួយ បានឈប់នៅកៀនផ្លួវ ជាប់របងវត្តស្ទឹង​មានជ័យ ប្រមាណជា១ម៉ោងទៅហើយ ទំនងជាខូច។ ពេលនោះមានអ្នកធ្វើដំណើរជាច្រើន នៅលើផ្លូវជិះទៅមក តែ​គ្មាន​គ្រោះថ្នាក់អ្វីនោះទេ ស្រាប់តែមកដល់ ពេលកើតហេតុ មានបុរសម្នាក់មិនស្គាល់អត្តសញ្ញាណ បានជិះម៉ូតូម៉ាក​វេវ​ពណ៍ក្រហម ពាក់ស្លាកលេខស្វាយរៀង១ក-៧៧២៥ បើកក្នុងល្បឿនលឿន មកបុករ៉ឺម៉កដែលឈប់នោះ ពីក្រោយ​ពេញ​ទំហឹង។ បណ្តាលឲ្យម៉ូតូរបស់ខ្លួន បាក់ក្បាំងខាងមុខ តែម្ចាស់ទាំងសងខាង មិនមានរបួសនោះទេ។

ម្ចាស់ម៉ូតូ ម៉ាកវេវ ក្នុងវ័យ៥០ឆ្នាំ មិនបញ្ចេញឈ្មោះ  ជាអ្នករស់នៅភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានី​ភ្នំពេញ បាននិយាយថា លោកមិនសុខចិត្តទេ ព្រោះម៉ូតូរបស់លោកខូចខាត ត្រូវទារសំណង ពីម្ចាស់រ៉ឺម៉ក​ដឹក​ឈើ ៧០ដុល្លា ថ្លែជួសជុលម៉ូតូ ដើម្បីបញ្ចប់រឿង។

ដោយឡែកម្ចាស់រ៉ឺម៉កដឹកឈើ លោក ដៀប អាយុ២២ឆ្នាំ រស់នៅស្រុកមេសាង ខេត្តព្រៃវែងបានបដិសេធ មិនសង​សំណង​ទាំងនោះ ព្រោះរឺម៉ករបស់ខ្លួន បានឈប់នៅកៀន វាខូចមិនទាន់ជួសជុលរួច។ លោកប្រកែកថា ម្ចាស់ម៉ូតូទេ​ជា​អ្នកខុស ព្រោះមកបុករឺម៉ក ដែលឈប់ស្ងៀម។ ម្ចាស់រឺម៉កបញ្ជាក់ថា បើចង់បានប្រាក់សំណង បញ្ចប់រឿង លោកមានតែ​១០ដុល្លាទេ ព្រោះលោកជាកម្មករដឹកឈើ ឲ្យដេប៉ូឈើ គ្មានប្រាក់ច្រើន ចេញឲ្យនោះទេ។

បន្ទាប់ពីការប្រកែកគ្នា នៅកន្លែងមិនបានប៉ុន្មានផង ម្ចាស់ម៉ូតូដែលបើកបុក បានសម្រេចយកថ្លៃខូចខាត ១០ដុល្លា ពី​ជន​រងគ្រោះ ដែលជាម្ចាស់រឺម៉ក ហើយបានបញ្ចប់រឿងភ្លាមៗ នៅកន្លែងកើតហេតុ៕