ពាក្យចាស់និយាយថា បើមិនពូកែ កុំ«ផឹក» ឬបើ«ផឹក» នៅដេកក្នុងផ្ទះ ឲ្យសុខស្រួល។ ព្រោះបើផឹកស្រវឹងហើយ ដើរ​ទៅ​ពេញផ្លូវថ្នល់ វាមិនត្រឹមតែបង្កទុក្ខទោស ដាក់ខ្លួនឯងទេ តែក៏នឹងបង្កឲ្យអ្នកផ្សេង ជួបគ្រោះជាមួយខ្លួនដែរ។ ដូចក្នុង​ករណីនេះ ដែលបានកើតឡើង  កាលពីវេលាម៉ោង៩យប់ ថ្ងៃទី១៧ ខែមិនា ឆ្នាំ២០១៥ រវាងម៉ូតូ និងអ្នកថ្មើរជើងម្នាក់ នៅ​តាម​បណ្តោយផ្លូវមន្នីរ៉េត។

គ្រោះថ្នាក់ដ៏អកុសល បានបង្ករឡើង ដោយបុរសម្នាក់ស្រវឹងដើរឆ្លងថ្នល់ និងយុវជនម្នាក់ ឈ្មោះ វណ្ណា ស្នាក់នៅ​បន្ទប់​ជួល ម្តុំសួនកាណាឌីយ៉ា រាជធានីភ្នំពេញ ដែលបាននបើកម៉ូតូ ប៉ះជាមួយបុរសស្រវឹង ធ្វើឲ្យដួលសន្លប់ភា្លមៗ នៅកន្លែង​កើតហេតុ។ ប្រភពព័ត៌មានបានឲ្យដឹងថា បុរសជនរងគ្រោះឈ្មោះ អុជ សុគុណ អាយុ៤៣ឆ្នាំ គ្មានសាច់ញាតិបងប្អូនទេ សព្វថ្ងៃរស់នៅជួយលក់ អ្នកជិតខាងនៅភូមិថ្មី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

សាក្សីបានឲ្យដឹងថា នៅមុនពេលកើតហេតុ គេឃើញមាន ម៉ូតូមួយគ្រឿងធុនឌ្រីម ពាក់ស្លាកលេខ ភ្នំពេញ 1AC-5421 បើកបរនៅតាមបណ្តោយ ផ្លូវមន្នីរ៉េត ស្រាប់តែមកដល់ ខាងមុខស្លាកសញ្ញា សង្កាត់ស្ទឹងមានជ័យ មានបុរសម្នាក់​បាន​ដើរឆ្លងថ្នល់។ ភ្លាមៗនោះ ម៉ូតូដែលកំពុងបើកបរ បានប៉ះជាមួយជនរងគ្រោះ បណ្តាលឲ្យដួលបោកក្បាល នៅលើផ្លូវ សន្លប់​ភ្លាមនៅកន្លែង កើតហេតុ។ បន្ទាប់ពីបុកជនរងកគ្រោះរួច ម៉ូតូឌ្រីម បានជ្រុលទៅប៉ះម៉ូតូមួយគ្រឿងទៀត ពាក់​ស្លាក​លេខ តាកែវ 1I-2568 ដែលបើកបរនៅលើផ្លូវនោះដែរ បណ្តាលឲ្យរងការខូចខាត សម្ភារៈមួយចំនួន។

យុវជន វណ្ណា បានឲ្យដឹងថា ខ្លួនពិតជាបានបើកម៉ូតូ ទៅប៉ះបុរសនោះមែន ព្រោះគាត់ដើរឆ្លងថ្នល់ ដោយមិនបាន មើល​ឆ្វេង​ស្តាំត្រឹមត្រូវ ហើយថាខ្លួនព្យាយាម ចាប់ហ្វ្រាំងម៉ូតូ តែចាប់មិនទាន់ និងថែមទាំងបានជ្រុល ទៅបុកម៉ូតូមួយទៀត។ នៅទៅបញ្ចប់ យុវជនបានសម្រេចចេញថ្លៃព្យាបាល ឲ្យបុរសស្រវឹង ចំនួន៥០០ដុល្លា ហើយបានធ្វើការសម្របសម្រួល ជាមួយភាគីមួយទៀត ដើម្បីបញ្ចប់រឿង។

អ្នកជិតខាង របស់ជនរងគ្រោះ លោក មិត្ត បានឲ្យដឹងថា ជនរងគ្រោះ ត្រូវបានបញ្ជូនទៅកាន់ មន្ទីពេទ្យរូស្ស៊ី កាលពី​ពេល​ភ្លាមៗ តែមិនទាន់បានទទួលដំណឹង ពីគ្រូពេទ្យនៅឡើយ។ លោកនិងគ្រួសារ បានសម្រេចយកថ្លៃព្យាបាល ៥០០​ដុល្លា ពីយុវជនវណ្ណា បើទោះជាលោក មិនបានឲ្យដឹងថា ជនរងគ្រោះ នៅមិនទាន់ដឹងខ្លួននៅឡើយក្ដី។

មន្ត្រីនគរបាលចររាចរណ៍ម្នាក់ ដែលបានចុះវាសវែង នៅក្នុងហេតុការណ៍នេះ លោក វ៉ន ចន្នា បានប្រាប់ទស្សនាវដ្ដី​មនោរម្យ.អាំងហ្វូ​ថា លោកមិនហ៊ានសន្និដ្ឋានថា អ្នកណាជាអ្នកខុសនោះទេ សំខាន់អ្នករងគ្រោះ និងភាគីបង្ករជាអ្នក​និយាយគ្នា តែលោកជានគរបាលចររាចរណ៍ មាននាទីជាអ្នកសម្របសម្រួល និងធ្វើអត្តរាគមន៍បញ្ជូនវត្តុតាង ទៅកាន់​ខណ្ឌ ដើម្បីធ្វើការដោះស្រាយ។

ដំណឹងពីមន្ទីរពេទ្យ បានឲ្យដឹងថា ជនរងគ្រោះ លោក អុជ សុគុណ មានឈាមកក នៅផ្នែកខាងក្រោមស្បែកក្បាល និង​មានការប្រេះ លលាដ៍ក្បាលបន្តិចផង។ នេះបើតាមលោកគ្រូពេទ្យម្នាក់ នៅផ្នែកពិនិត្យ នៅមន្ទីពេទ្យរូស្ស៊ី លោក លី តាំង។ តាមការសន្និដ្ឋាន របស់គ្រូពេទ្យដដែល នៅមិនទាន់ដឹងច្បាស់ថា តើជនរងគ្រោះ នឹងដឹងខ្លួននៅពេលណាទេ ខណៈ​គ្រូពេទ្យ​នៅកំពុងបន្ត ការតាមដាននៅឡើយ៕