ភ្នំពេញៈ អាស៊ានទាំង១០ប្រទេស នឹងប្រកាសចេញ នូវភាពជាដៃគូសេដ្ឋកិច្ច​ទូលំទូលាយក្នុងតំបន់ ហើយក៏អាចឈាន ទៅពិភាក្សាផ្លាស់ប្តូរយោបល់អំពីបញ្ហាសន្តិសុខក្នុងតំបន់ និងពិភពលោក។

លោក សូរិន ពិតសុវណ្ណ ក្នុងសន្និសីទកាសែត កាលពីថ្ងៃទី ១៧ វិច្ចិការ។ រូបថត MONOROOM.info/ Phnom Thom

លោក ស៊ូរិន ពិតស៊ូវណ្ណ (Surin Pitsuwan) អគ្គលេខាធិការអាស៊ាន នៅព្រឹកថ្ងៃទី១៧ខែវិច្ឆិកាឆ្នាំ២០១២ បានធ្វើសន្និសីទ​កាសែត ដោយបានថ្លែងឲ្យដឹងថាសម្រាប់កិច្ចប្រជុំកំពូលអាស៊ានលើកទី២១នេះ មេដឹកនាំអាស៊ានទាំង១០ប្រទេស អាច​ចេញប្រកាសនូវភាពជាដៃគូសេដ្ឋកិច្ចទូលំទូលាយក្នុងតំបន់។

ការថ្លែងរបស់លោក គឺធ្វើឡើងមុនពេលរដ្ឋមន្ត្រីការបរទេសអាស៊ានបើកកិច្ចប្រជុំ នៅវិមានសន្តិភាព។ លោក បានឲ្យដឹង​បន្ថែមថា ភាពជាដៃគូសេដ្ឋកិច្ចទូលំទូលាយក្នុងតំបន់ ជាការច្របាច់បញ្ចូលគ្នា នៃកិច្ចព្រមព្រៀងសេរីចំនួន៥ ជាមួយនឹង​ប្រកាសដៃគូអាស៊ានចំនួន៦ប្រទេស។

លោក បានមានប្រសាសន៍ដូច្នេះថា «នេះគឺជាកិច្ចខិតខំប្រឹងប្រែង ដើម្បីធ្វើឲ្យសម្រេច​បាននូវកិច្ចព្រមព្រៀងចំនួន៥​ បន្ថែមទៀត ជាមួយនឹងបណ្តាប្រទេសចំនួន៦បន្ថែមទៀតនៅក្នុងតំបន់។ ប្រទេសឥណ្ឌា អូស្ត្រាលី ញូហ្ស៊ីឡែន នឹងចុះកិច្ច​ព្រមព្រៀងជាមួយនាកិច្ចប្រជុំនេះ ហើយបន្ទាប់មកប្រទេសចិន ជប៉ុន និងកូរ៉េខាងត្បូង នឹងធ្វើការចុះហត្ថលេខាទៅលើ​ កិច្ចព្រមព្រៀងតំបន់ពាណិជ្ជកម្មសេរីផងដែរ ។ យើងចង់ឲ្យកិច្ចព្រមព្រៀងចំនួន៥ នៃដៃគូ​អាស៊ានចំនួន៦ប្រទេសនេះ​ ស្ថិតនៅក្រោមកិច្ចព្រមព្រៀងតែមួយ ។ ពោលគឺ ចង់ឲ្យអាស៊ានក្លាយទៅជាដៃគូ នៃតំបន់​សេដ្ឋកិច្ច ដែលនឹងត្រូវបាន​ឯកភាពគ្នានៅទីនេះ នារាជធានីភ្នំពេញ»។

លោក ស៊ូរិន្ទ ពិនសុវណ្ណ បានបន្តថា មេដឹកនាំអាស៊ាន និងប្រទេសដៃគូ ក៏នឹងពិភាក្សាផ្លាស់ប្តូរយោបល់អំពីបញ្ហាសន្តិសុខ ក្នុងតំបន់ និងពិភពលោក សមាហរណកម្មសេដ្ឋកិច្ចក្នុងតំបន់ និងក្រៅតំបន់។ កិច្ចប្រជុំនេះ ក៏ពិភាក្សាផងដែរនូវការ​រឹតបន្តឹង សកម្មភាពដែលជាឧបសគ្គរាំងស្ទះលើបញ្ហាថាមពល បញ្ហាបម្រែបម្រួលអាកាសធាតុ បញ្ហាអភិវឌ្ឍន៍ធនធាន​មនុស្ស បញ្ហាកិច្ចសហប្រតិបត្តិការ ក្នុងពេលមានការគម្រាមកំហែងពីគ្រោះមហន្តរាយ ជាដើម។

ដោយឡែក ចំពោះ បញ្ហា​សមុទ្រ​ចិនខាងត្បូងវិញ លោក សូរិន្ទ ពិនសុវណ្ណ នៅមិនទាន់បញ្ជាក់ឲ្យបានច្បាស់លាស់ទេ ដោយគ្រាន់តែបញ្ជាក់ថា មេដឹកនាំកំពូលអាស៊ានពេលនេះ គួរតែប្រឹងប្រែងជាងមុន ដើម្បីពិភាក្សាចេញ នូវសេចក្តី​ថ្លែងការណ៍រួមរបស់ខ្លួន កុំឲ្យបញ្ហាសមុទ្រចិនខាងត្បូង ក្លាយជាឧបសគ្គនៃកិច្ចប្រជុំនេះ។

តែទោះជាយ៉ាងនេះក៏ដោយ លោក សូរិន្ទ ពិនសុវណ្ណ បានបង្ហាញនូវសេចក្តីសង្ឃឹមថា មេដឹកនាំកំពូលអាស៊ាន នឹងចូល​រួមទាំងអស់គ្នាក្នុងការដោះស្រាយនូវបញ្ហាមួយនេះ។

---------------------------------------------------------
ដោយៈ ភ្នំធំ - ភ្នំពេញថ្ងៃទី ១៨ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ