វីដេអូនេះ ត្រូវបានផ្សាយនៅល្ងាចថ្ងៃអង្គារ ទី១៧ ខែកុម្ភៈ នៅលើគេហទំព័រ នៃសារព័ត៌មានអង់គ្លេស ហ្គាដៀន ហើយ​បានធ្វើឲ្យផ្ទុះរឿងអាស្រូវ ឡើងព្រោងព្រាត ទាំងនៅក្នុងប្រទេសបារាំង និងប្រទេសអង់គ្លេស។ ទង្វើនេះ បាន​បង្ខំ​ឲ្យក្រុមបាល់ទាត់ ឆែលស៊ី ដែលបានមកជួបប្រកួតជាមួយក្រុមប៉ារីស (PSG) នៅយប់ថ្ងៃអង្គារ​ដដែល​នោះ ឲ្យចេញមកធ្វើសេចក្ដីថ្លែងការណ៍ ថ្កោលទោសយ៉ាងម៉ឺងម៉ាត់ នូវសកម្មភាព របស់ក្រុមអ្នកគាំទ្ររបស់​ខ្លួន​នេះ។

នៅក្នុងវីដេអូខ្លី ដែលថតដោយ ផូល ណូឡេន (Paul Nolan) ជនជាតិអង់គ្លេស ដែលរស់នៅក្នុងរដ្ឋធានីប៉ារីស គេ​ឃើញ​អ្នកគាំទ្រក្រុមឆែលស៊ី ច្រើនសិបនាក់ បានហ៊ោរកញ្ជៀវ ខណៈពេលដែលពួកគេ បានឡើង​យករថភ្លើង​ក្រោម​ដី នៃរដ្ឋធានីរបស់ប្រទេសបារាំង ដើម្បីធ្វើដំណើរចេញពីស្ថានីយ Richelieu-Drouot  ឆ្ពោះទៅកាន់ពហុ​កីឡា​ដ្ឋាន ដែលមានការប្រកួតបាល់ទាត់ រវាងក្រុមដ៏ល្បីទាំងពីរ។

បុរសស្បែកខ្មៅម្នាក់ បានព្យាយាមចូលក្នុងរថភ្លើងនោះដែរ តែត្រូវបានក្រុមអ្នកគាំទ្រអង់គ្លេស រុញចេញមកវិញ​ដោយ​កម្លាំង។ បុរសរូបនេះ នៅតែព្យាយាមចូល ទៅក្នុងរថភ្លើងទៀត តែលើកនេះត្រូវបានក្រុមអង់គ្លេសរុញ​ចេញ​មកវិញខ្លាំងជាងមុន ជាមួយនឹងសម្លេងច្រៀងហ៊ោរកញ្ជៀវ ថា«យើងប្រកាន់ពូជសាសន៍ ៗ​ ៗ គឺរឿងបែប​នេះ​ហើយ ដែលធ្វើឲ្យយើងសប្បាយ»។

ក្រុមបាល់ទាត់ ឆែលស៊ី តាមរយៈអ្នកទទួលខុសត្រូវរបស់ខ្លួន បានចេញសេចក្ដីថ្លែងនៅថ្ងៃស្អែកឡើង ថ្កោល​ទោស ដោយបានចាត់ទុកថា វាជារឿងគួរឲ្យស្អប់ខ្ពើម។ សេចក្ដីថ្លែងការណ៍នោះ បានសរសេរថា៖ «ទង្វើទាំងនេះ មានលក្ខណៈគួរឲ្យស្អប់ខ្ពើម ហើយមិនត្រូវឲ្យមាន នៅក្នុងកីឡាបាល់ទាត់ ក៏ដូចជានៅក្នុងសង្គមយើង ទាំងអស់​គ្នា។ យើងនឹងគាំទ្រ នូវរាល់វិធានការព្រហ្មទណ្ឌ ប្រឆាំងនឹងជនទាំងឡាយណា ដែលបានប្រព្រឹត្តិរឿងនេះ។»

ដោយឡែក នគរបាលអង់គ្លេស បានយកករណីនេះមកស៊ើបអង្កេត ដើម្បីរកឲ្យឃើញអ្នកប្រព្រឹត្តិ។ អ្នកមាន​កំហុស​ក្នុងករណីនេះ អាចនឹងរងទណ្ឌកម្ម ដូចជាការផាកពិន័យ និងត្រូវបានហាមប្រាម មិនឲ្យចូលមើល ការ​ប្រកួ​តបាល់ទាត់ លើកក្រោយៗទៀតជាដើម។

សូមបញ្ជាក់ដែរថា ក្រុមបាល់ទាត់ ឆែលស៊ី ធ្លាប់រងគ្រោះ នឹងចម្រៀង«ប្រកាន់ពូជសាសន៍» ពីសំណាក់ក្រុមអ្នក​គាំទ្ររបស់ខ្លួន នៅក្នុងកីឡាដ្ឋាន ខណៈពេលកំពុងមានការប្រកួត។ សកម្មភាពនេះ បានធ្វើឲ្យក្រុម ឆែលស៊ី រង​ទណ្ឌកម្ម​យ៉ាងធ្ងន់ធ្ងរ កាលពី ខែវិច្ឆិកា ឆ្នាំ២០១១ កន្លងមក៕