ក្នុងអាជីពជាវិចិត្រករចម្លាក់ ភាពចាំបាច់នៃទេពកោសល្យ ជារឿងមួយ។ ប៉ុន្តែគំនិតឆ្នៃប្រឌិត ជារឿង​ដ៏សំខាន់​មួយទៀត ដើម្បីអាចធ្វើឲ្យវិចិត្រកររូបនោះ អាចសម្រេចនូវផលិតផលដ៏ពិសេសៗបាន។

ផលិតផលពិសេសនោះ មានឈ្មោះហៅថា «ខ្សែរក្រវ៉ាត់កូនខ្មែរ» ដែលធ្វើអំពីឈើសុទ្ធសាត និងមាន​រូបរាង​គួរឲ្យចាប់អារម្មណ៍។ ខ្សែរក្រវ៉ាត់នេះ មានតម្លៃសមរម្យ បើធៀបនឹងវត្ថុសិល្បៈជាច្រើនទៀត និងមាន​គុណភាព ដែលអាចទុកចិត្តបាន។ មិនតែប៉ុណ្ណោះ គំនិតឆ្នៃប្រឌិតមួយនេះ ថែមទាំងបានជួយផ្ដល់ការងារ ឲ្យយុវជន​ប្រមាណជាង១០នាក់ទៀតផង។

ក្នុងការសាកសួរផ្ទាល់ ដោយទស្សនាវដ្តីមនោរម្យ.អាំងហ្វូ នៅថ្ងៃទី០៦ ខែកុម្ភៈ ឆ្នាំ២០១៥នេះ លោក ម៉ៅ ជីមន ជាវិចិត្រករ និងជាម្ចាស់អាជីកម្មសូនឆ្លាក់ នៅក្នុងស្រុកស៊ីធរកណ្តាល ខេត្តព្រៃវែង បានឲ្យដឹងថា ខ្សែរក្រវ៉ាត់ដែលធ្វើពីឈើនៅហាងរបស់លោក មានតម្លៃចាប់ពី៣៥ដុល្លា ដល់៦៥ដុល្លា អាស្រ័យទៅតាម​ប្រភេទ នៃឈើដែលអតិថិជនចង់បាន។ លោកប្រាប់ទៀតថា ក្នុងខ្សែរក្រវ៉ាត់មួយ ត្រូវចំណាយពេលពីប្រាំថ្ងៃ ទៅប្រាំពីរថ្ងៃ ក្នុងនោះប្រើឈើអស់ពី២ ទៅបីគីឡូក្រាម (ឈើជ្រុងពីគីឡូកន្លាស់ ឈើមូលបីគីឡូក្រាម) ដើម្បី​ផលិត។

ជាង មន បានបញ្ជាក់ថា លោកបានបើកអាជីវកម្ម ក្នុងភូមិពានាជើង ស្រុកស៊ីធរកណ្តាលនេះ អស់រយៈ​ពេល​ពីរឆ្នាំមកហើយ។ លោកថា ពីមុនមិនសូវមានអ្នកស្គាល់ច្រើនទេ តែមួយរយៈចុងក្រោយនេះ មានភាព​ប្រសើឡើងហើយ។

ម្ចាស់អាជីវកម្មរូបនេះ បានថ្លែងប្រាប់ទៀតថា លោកនៅមិនទាន់មានការលក់ ជាទ្រង់ទ្រាយធំនោះទេ។ តែ​បើ​ទោះជាអាជីវកម្មរបស់លោក នៅមានលក្ខណៈជាគ្រួសារក៏ដោយ ក៏កន្លងមកថ្មីៗនេះ លោកបាន បង្កើន​កូន​ជាង បាន១០នាក់បន្ថែមទៀត ដើម្បីធ្វើការងានេះ ជាមួយលោក ខណៈពេលដែលចំនួនអតិថិជន ក៏មានការ​កើនឡើងដែរនោះ។ ក្នុងនោះមានអតិថិជនខ្លះ បានយកឈើ ដែលពួកគាត់មានរួចហើយ មកឲ្យពួកលោកឆ្នៃ ដោយគ្រាន់តែគិតថ្លៃឈ្នួល និងជ្រើសរើសម៉ូដតែប៉ុណ្ណោះ។ តែអតិថិជនមួយចំនួនទៀត បានកុំម៉ង់ង (Commande) របស់ធ្វើស្រាប់តែម្តង។

អ្នកផលិតខ្សែរក្រវ៉ាត់«កូនខ្មែរ» លោក ម៉ៅ ជីមន បានពោលដោយមោទនភាពថា គោលបំណងរបស់លោក គឺចង់ជួយសង្គមខ្មែរ ជាពីសេសលោកបានរួមចំណែក បង្កើតការងារឲ្យកូនខ្មែរជំនាន់ក្រោយ ផ្តោតសំខាន់​ទៅ​លើជនក្រីក្រ និងកុមាកំព្រា។ លោកបានថ្លែងថា៖ «ខ្ញុំចង់ជួយជនពិការ និងជនទីទាល់ក្រនៅក្នុងសង្គម»៕

វីដេអូបង្ហាញពីសកម្មភាពផលិតខ្សែរក្រវ៉ាត់នេះ៖