ឃាតកម្ម​​​លើ​លឹម ស្រីពេជ្រ៖ ជន​មាន​អំណាច នៅ​ពី​ក្រោយ?

អាជ្ញាធរមានសមត្ថកិច្ចកម្ពុជា បានបញ្ចេញលទ្ធផលនៃការស៊ើបអង្កេត ទៅលើឃាតកម្ម និងការចាប់ជំរិត ទៅលើជនរងគ្រោះ នាង លឹម ស្រីពេជ្រ អាយុ១៩ឆ្នាំ អតីតកញ្ញាឯករបស់ក្រុមហ៊ុនភេសជ្ជះ ស្ប៉ាយ។ តែជាលទ្ធផលមួយ ដែលមតិសាធារណមួយចំនួន បានយល់ថា មិនសូវចំ និងខ្វះតម្លាភាព។ រីឯឪពុករបស់ជនរងគ្រោះ បានសង្ស័យថា អាជ្ញាធរមានបំណងចង់លាក់បាំង ជនមានអំណាចណាផ្សេង ដែលបានទាក់ទងក្នុងសំនុំរឿងនេះ។
Loading...
  • ដោយ: កេសរ កូល
  • កែប្រែចុងក្រោយ: November 04, 2012
  • ប្រធានបទ:
  • អត្ថបទ: មានបញ្ហា?
  • មតិ-យោបល់

អាជ្ញាធរមានសមត្ថកិច្ចកម្ពុជា បានបញ្ចេញលទ្ធផលនៃការស៊ើបអង្កេត ទៅលើឃាតកម្ម និងការចាប់ជំរិត ទៅលើជនរង​គ្រោះ នាង លឹម ស្រីពេជ្រ អាយុ១៩ឆ្នាំ អតីតកញ្ញាឯករបស់ក្រុមហ៊ុនភេសជ្ជះ ស្ប៉ាយ។ តែជាលទ្ធផលមួយ ដែលមតិ​សាធារណមួយចំនួន បានយល់ថា មិនសូវចំ និងខ្វះតម្លាភាព។ រីឯឪពុករបស់ជនរងគ្រោះ បានសង្ស័យថា អាជ្ញាធរមាន​បំណងចង់លាក់បាំង ជនមានអំណាចណាផ្សេង ដែលបានទាក់ទងក្នុងសំនុំរឿងនេះ។


រូបថតរបស់ កញ្ញាឯកស្ប៉ាយ លឹម ស្រីពេជ្រ ក្នុងទំព័រហ្វេសប៊ុករបស់នាង។

ជនសង្ស័យបីនាក់ ត្រូវបានដោះលែង

បណ្ដាអ្នកជិតខាង របស់ស្រ្តីឈ្មោះ ស៊ឹម ​គឹម​ហេង ដែលជាជនសង្ស័យអាយុ២៣ឆ្នាំ (ប្រភពខ្លះ ថានាងមានអាយុ៣៥ឆ្នាំ?) នៅក្នុងសំនុំរឿងឃាតកម្មទៅលើ នាងលឹម ស្រីពេជ្រ នេះបាននិយាយថា ពួកគាត់នៅមិនធ្លាប់ត្រូវបាន នគរបាល​ស៊ើប​អង្កេត ហៅទៅសួរនាំឡើយ បើទោះជាពួកគាត់អះអាងថា នឹងអាចផ្ដល់ជាពន្លឺខ្លះៗ ទៅលើករណីនេះក៏ដោយ។ នេះជា​ការ​​និយាយអោយដឹង នៅក្នុងរបាយការណ៍មួយ របស់សារពត៌មានក្នុងស្រុក ខេមបូឌៀដែលី (Cambodia Daily) ដែលបាន​ផ្សាយនៅថ្ងៃទី៣១តុលាកន្លងមក។

ខាងនគរបាល បានអះអាងថា ជនជាប់ចោទ ស៊ឹម ​គឹម​ហេង នេះជាជនដៃដល់តែមួយគត់ នៅក្នុងសំនុំរឿងឃាតកម្មនេះ ហើយបានរៀបរាប់ ដំណើរដើមហេតុនៃហេតុការណ៍ ពីដើមរហូតដល់ចប់។ ជនសង្ស័យ ស៊ឹម ​គឹម​ហេង បានស្គាល់ជន​រងគ្រោះ លឹម ស្រីពេជ្រ ក្នុងបណ្ដាញសង្គមហ្វេសប៊ុក ពី៣ខែមុន ហើយបានហៅនាងមកផ្ទះរបស់ខ្លួន ដើម្បីជជែកគ្នា​ពីរឿងចង់បើកហាងលក់សម្លៀកបំពាក់។ ជាដំណើររឿង ដែលត្រូវបានគេប្រមើលមើលឃើញថា «មានភាពប្រហាក់​ប្រហែល» និង«ដូចមែនទែន»។ សូមបញ្ជាក់ឡើងវិញថា ជនសង្ស័យ ស៊ឹម ​គឹម​ហេង ត្រូវបាននគរបាលនិយាយថា បាន​ជម្រិតទាមទារប្រាក់ ប្រមាណជា ១៦ ០០០ដុល្លាអាមេរិក ពីក្រុមគ្រួសាររបស់ជនរងគ្រោះ នៅក្រោយពេលដែល​ជន​រងគ្រោះ ត្រូវបានឃាតករសម្លាប់រួចហើយ និងយកទៅប្លុងសាកសពចោល នៅ​​ក្បែរ​វត្ត​ល្វា ឃុំ​អង្គ​ពពេល ស្រុកគងពិសី ខេត្តកំពង់ស្ពឺ កាលពីថ្ងៃទី២៣តុលាឆ្នាំ​ ២០១២។ បន្ទាប់ពីបានឃាត់ខ្លួន ជនសង្ស័យស៊ឹម ​គឹម​ហេងរួចមក ជនសង្ស័យ​ចំនួន ៣នាក់ទៀត ត្រូវបាននគរបាលឃាត់ខ្លួនបានជាបន្តបន្ទាប់ តែត្រូវបានដោះលែង ក្នុងរយះពេលពីរថ្ងៃក្រោយមក នៅពេល​ដែល​នគរបាល​រកពុំឃើញ ពីការពាក់ព័ន្ធរបស់ជនសង្ស័យក្រោយទាំងនេះ។

«នគរបាលមិនដែលមកសាកសួរអ្វី ពីយើងទេ»

សារពត៌មានដដែល បានស្រង់សម្ដីអ្នកជិតខាង របស់ជនសង្ស័យ ដោយបញ្ជាក់ពី ភាពស្ងប់ស្ងៀមរបស់ ស្រ្តីជាប់ចោទ​រូបនេះ ហើយថានាងទើបតែមករស់នៅក្នុងសង្កាត់នេះ ប្រហែលជាពីរខែមុនប៉ុណ្ណោះ។  ស៊ឹម ​គឹម​ហេង មានរថយន្ដមួយ​គ្រឿងប្រភេទ តូយ៉ូតា ហៃលេនដ័រ ដែលនាងបើកបររាល់ថ្ងៃ និងមានមិត្តប្រុសរបស់នាង ដែលគេធ្លាប់ឃើញ មានមិត្តភ័ក្រ របស់មិត្តប្រុសនោះ មកផឹកស៊ីនៅក្នុងផ្ទះនេះជាញឹកញាប់។ អ្នកយាមទ្វាម្នាក់ ប្រចាំទីស្នាក់ការអង្គការមួយ ស្ថិតនៅខាង​មុខ​​ផ្ទះ ដែលជាកន្លែងកើតហេតុ បាននិយាយអះអាងថា «នគរបាលមិនដែលមកសាកសួរអ្វី ពីយើងទេ»។  បុរសអ្នក​ជិតខាង​ម្នាក់ ឈ្មោះសៀង បានបង្ហើបថា «​ប៉ុន្មានសប្ដាហ៍មុនណ្នឹង ខ្ញុំឃើញមនុស្សប្រុសជាច្រើន បានចេញចូលទៅក្នុង​ផ្ទះនេះ។ ខ្ញុំមិនដឹងថា គេចេញចូលរឿងអីទេ តែសឹងតែរាល់ថ្ងៃ ខ្ញុំឃើញមានមនុស្សចេញចូលច្រើនណាស់។ ភាគច្រើន​ក្នុង​ចំណោម​នោះ មកផឹក។​ ប្រហែលជាមិត្តភ័ក្រ របស់មិត្តប្រុសរបស់នាង ស៊ឹម ​គឹម​ហេង។»

ស្រ្តីអ្នកជិតខាងម្នាក់ទៀត ឈ្មោះឌី ដែលមានហាងលក់ឥវ៉ាន់នៅក្បែរនោះ បាននិយាយថា «នាងស៊ឹម ​គឹម​ហេង ជួនកាល​ក្នុងសម្លៀកបំពាក់គេង បានមកហាងរបស់ខ្ញុំ ដើម្បីទិញអង្ករខ្លះៗ។  តែខ្ញុំមិនអាចនិយាយ ពីអត្តចរិករបស់នាង​ថាយ៉ាង​ដូចម្ដេចទេ បើនាងមិនដែលជជែកនិយាយស្ដីអ្វីផងនោះ។» អ្នកស្រីឌី បានអះអាងថា ថ្ងៃកើតហេតុ អ្នកស្រីបានឃើញ ស៊ឹម ​គឹម​ហេង និងជនរងគ្រោះ លឹម ស្រីពេជ្រ ចេញពីរថយន្ដ ហើយដើរចូលទៅក្នុងផ្ទះធ្វើអំពីឈើនេះ។ ចំណែកឯអ្នក​ដាំបាយ អោយអង្គការជប៉ុនមួយ ដែលមានផ្ទះជាប់នឹងផ្ទះរបស់ជនសង្ស័យ បាននិយាយប្រាប់ ខេមបូឌៀ ដែលី ដែរថា​គាត់​បាន​ឃើញ​​​មិត្តប្រុស​របស់​ជនសង្ស័យ ស្លៀកខោខ្លី ហើយបានចេញកាត់ក្រចក នៅខាងមុខផ្ទះ ក្នុងពេលរសៀល​នៃ​ថ្ងៃកើតហេតុ។

ជនមានអំណាច មានថានះខ្ពស់ ស្ថិតនៅពីក្រោយឃាតកម្ម?

ឪពុករបស់កញ្ញាឯកលឹម ស្រីពេជ្រ បាននិយាយកាលពីថ្ងៃ ២៦តុលា ប្រាប់សារពត៌មានដដែល ថាលោកមិនជឿថា ជនដៃ​ដល់ ដែលចូលរួមសម្លាប់កូនស្រីរបស់លោក មានតែម្នាក់នោះទេ។ លោកលឹម អ៊ៀងស៊័រ បានបង្ហាញនូវការសង្ស័យ​យ៉ាង​ដូច្នេះថា «នគរបាលបានឃាត់ខ្លួនជនសង្ស័យ ចំនួន ៤នាក់ តែបានលែងទៅវិញ ៣នាក់ ដោយគ្មានអំណះអំណាង​ច្បាស់​លាស់។  ខ្ញុំគិតថា មានជនមានអំណាច មានថានះខ្ពស់ ស្ថិតនៅពីក្រោយឃាតកម្មនេះ។» តាមអ្វីដែល លោកបាននិយាយ «ហាក់បីដូចជា គេបានរៀបគម្រោងមួយ ដើម្បីចោទដាក់បន្ទុក ទៅលើតែស្រ្តីជាប់ចោទរូបនេះតែម្នាក់»។

ប៉ុន្ដែការសង្ស័យនេះ ត្រូវបានច្រានចោលដោយនគរបាល។ លោកអេង សុភា ​នាយនគរបាល​ព្រហ្មទណ្ឌ​កម្រិតធ្ងន់​រាជធានី​ភ្នំពេញ បានឆ្លើយតបថា «ត្រង់ថា ឪពុកម្ដាយរបស់ជនរងគ្រោះ ជឿឬមិនជឿ ជាសិទ្ធិរបស់ពួកគាត់»។

កន្លងមក មានការសង្ស័យជាច្រើនរបស់សាធារណជន បានរិះគន់លើដំណើរការស៊ើបអង្កេត របស់អាជ្ញាធរមានសមត្ថកិច្ច​នៃប្រទេសកម្ពុជា ក្នុងការនាំយកជនសង្ស័យពិតប្រាកដមកផ្ដន្ទាទោស។ មតិរិះគន់ទាំងនោះ បានវាយតម្លៃពីភាពខ្ជីខ្ជា នៃ​ដំណើរស៊ើបអង្កេត របស់នគរបាល ទៅលើករណីឃាតកម្មទាំងឡាយ ថាបានធ្វើឡើងភាគច្រើន ដោយយោងទៅលើតែ​របាយការណ៍​សារភាព របស់ជនសង្ស័យតែប៉ុណ្ណោះ។ ជនដៃដល់ ក្នុងករណីឃាតកម្មជាច្រើនផ្សេងទៀត ត្រូវបានគេ​មើល​ឃើញថា មិន​ទាន់បានរកឃើញផង រហូតមកទល់នឹងបច្ចុប្បន្ន៕

----------------------------------------------------
ដោយ ៖ កេសរកូល - ភ្នំពេញ ថ្ងៃទី០២ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...