គួយ ប៊ុនរឿន៖ ប្រព័ន្ធបោះឆ្នោតជប៉ុន ច្បាស់និង«ល្អ» (vdo)
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី១៨ ធ្នូ ២០១៤
- កែប្រែចុងក្រោយ: December 18, 2014
- ប្រធានបទ: បោះឆ្នោត
- អត្ថបទ: មានបញ្ហា?
- មតិ-យោបល់
-
លោក គួយ ប៊ុនរឿន ប្រធានក្រុមការងារចរចាកែទម្រង់ គ.ជ.ប របស់គណបក្សសង្គ្រោះជាតិ បានថ្លែងថា លោកគាំទ្រ ទម្រង់នៃការចុះឈ្មោះបោះឆ្នោត ដែលរៀបចំដោយប្រទេសជប៉ុន ពិសេសការចុះឈ្មោះតាមប្រព័ន្ធអេឡិចត្រូនិច និងបានបង្ហាញនូវការព្រួយបារម្មណ៍ ចំពោះការរៀបចំ និងគ្រប់គ្រងលើស្ថិតិ ប្រជាពលរដ្ឋ ដោយក្រសួងមហាផ្ទៃរបស់កម្ពុជា។
ថ្លែងជាកាន់អ្នកសារព័ត៌មាន នាស្នាក់ការអង្គការខុមហ្រ្វែល ថ្ងៃទី១៨ ខែធ្នូនេះ លោក គួយ ប៊ុនរឿន បានពន្យល់ថា នៅប្រទេសជប៉ុន ក្រសួងមហាផ្ទៃរបស់ប្រទេសនេះ ជាអ្នកគ្រប់គ្រងលើអាត្រានុកូលដ្ឋាន ហើយបានផ្ទេរ បញ្ជីអត្រានុកូលដ្ឋាននោះ ទៅជាបញ្ជីបោះឆ្នោតតែមួយគត់។ លោកបន្តថា នេះជាមូលហេតុមួយ ដែលសម្រួលឬមិនបង្កការលំបាក ដល់ប្រជាពលរដ្ឋក្នុងការទៅចុះឈ្មោះបោះឆ្នោតនោះទេ។ ឲ្យតែប្រជាពលរដ្ឋគ្រប់អាយុ ទទួលបានអត្តសញ្ញាណប័ណ្ណ និងគ្រប់អាយុទៅបោះឆ្នោត អាជ្ញាធរឯករាជ្យរបស់គេ គឺក្រសួងមហាផ្ទៃនេះ នឹងជូនដំណឹងទៅប្រជាពលរដ្ឋថា អ្នកមានឈ្មោះ មានសិទ្ធិទៅបោះឆ្នោត និងត្រូវបោះឆ្នោត នៅការិយាល័យណាមួយជាក់លាក់។ លោកបានចាត់ទុកថា ប្រព័ន្ធគ្រប់គ្រង និងការចុះឈ្មោះរបស់ប្រទេសជប៉ុនជាប្រព័ន្ធ មួយ«ល្អ»។
ដោយឡែក សម្រាប់ក្រសួងមហាផ្ទៃរបស់កម្ពុជាវិញ ពោរពេញទៅដោយចំណុចខ្វះខាត។ លោក ប៊ុនរឿន បានលើកឡើងពីភាពខ្វះចន្លោះ របស់អាជ្ញាធររដ្ឋកម្ពុជា ទៅលើការគ្រប់គ្រងពីអត្រានុកូលដ្ឋាន ពិសេសអត្តសញ្ញាណប័ណ្ណនេះ។ ភាពខ្វះខាតទាំងនេះ ដែលជាជំហានមួយ នាំឲ្យកម្ពុជាត្រូវផ្តល់ការចុះឈ្មោះបោះឆ្នោត ទៅឲ្យ គ.ជ.ប ។ តែសម្រាប់ពេលអនាគត បើក្រសួងមហាផ្ទៃគ្រប់គ្រងបានល្អនោះ មិនចាំបាច់ឲ្យ គ.ជ.ប ខ្វាយខ្វល់ រួមនឹងការចំណាយលុយមកធ្វើបញ្ជីបោះឆ្នោត ដ៏សន្ធឹកសន្ធាប់ដូចកន្លងមកដូច្នេះទេ។ លោកនិយាយទៀតថា៖ «យើងអាចផ្ទេរបញ្ជីពីក្រសួងមហាផ្ទៃ មកជាបញ្ជីបោះឆ្នោត ដែលជាការល្អបំផុត»។
យ៉ាងណា មន្ត្រីជាន់ខ្ពស់របស់គណបក្សប្រឆាំងរូបនេះ បានទទួលយកចំណែកមួយ នៃរបៀបចុះឈ្មោះដែលផ្ដល់ដោយ អង្គការខុមហ្រ្វែល ដែល ដែលមានលក្ខណៈជា«កាត» ចុះឈ្មោះដោយប្រព័ន្ធកុំព្យូទ័រ និងមានបិទទាំងរូបថតផងនោះ។ លោកបន្ថែមថា ករណីនេះមានភាពងាយស្រួល និងជួយសម្រួលដល់អ្នកមិនចេះអក្សរ និងត្រូវចំណាយពេលតិច ហើយអាចផ្ទៀងផ្ទាត់រូបទាំងក្នុងកាត ទាំងក្នុងបញ្ជី ជាមួយនឹងអ្នកទៅបោះឆ្នោតផ្ទាល់ផង (មិនអាចបន្លំ ឬបោះជំនួសបាន)។ លោក និយាយបញ្ជាក់ទៀតថា៖ «ឃើញរូបពិត នៃអ្នកដែលមានឈ្មោះ ក្នុងបញ្ជីបោះឆ្នោត អ្នកមានសិទ្ធិ ជាមួយនិងទិដ្ឋភាពជាក់ស្តែង ដែលថាគាត់មានសិទ្ធិ ក្នុងការបោះឆ្នោតពិតប្រាដកមែន។»
សូមទស្សនាកិច្ចសម្ភាសលោក គួយ ប៊ុនរឿន ជាមួយអ្នកសារព័ត៌មានដូចខាងក្រោម៖