ប្រធានផ្សារដើមគដេញអាជីវករចេញ យកកន្លែងជួលឲ្យអ្នកដ៏ទៃ?
- ដោយ: ក. សោភណ្ឌ អត្ថបទ៖ ក. សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី០២ ធ្នូ ២០១៤
- កែប្រែចុងក្រោយ: December 03, 2014
- ប្រធានបទ: ជ្រុងមួយ
- អត្ថបទ: មានបញ្ហា?
- មតិ-យោបល់
-
ដំណឹងបានធ្លាក់មកជាបន្តបន្ទាប់ ពីគៀនកោះនៃបញ្ហា ដែលបង្កការក្ដៅក្រហាយ ដល់ក្រុមអាជីវករនៅផ្សារដើមគ ដែលធ្លាប់លក់ដូរនៅមុខទីស្នាក់ការគណៈគ្រប់គ្រងផ្សារ តែបែជាត្រូវប្រធានផ្សារបញ្ជា ឲ្យរើចេញពីកន្លែងនោះ។ បើគ្រាន់តែរើចេញ ព្រោះហេតុផល«រៀបចំសណ្ដាប់ធ្នាប់» ប្រហែលការរិះគន់ និងការក្ដៅក្រហាយមិនកើតមានប៉ុន្មានដែរ តែផ្ទុយទៅវិញ នៅមុខទីស្នាក់ការក្នុងពេលបច្ចុប្បន្ននេះ បែជាគេឃើញមានការគំនរបាវអំបិល និងមានរថយន្ដចតពីមុខទៅវិញ។
ក្នុងកិច្ចសម្ភាសផ្ទាល់ជាមួយទស្សនាវដ្ដីមនោរម្យ.អាំងហ្វូ លោក សុខ លី ដែលជាជំនួយការ របស់គណៈកម្មការផ្សារនេះ មិនបានបញ្ជាក់ច្បាស់លាស់ ពីហេតុផលដំណើរដើមទងទេ ដោយគ្រាន់តែនិយាយថា លោកក៏មិនយល់ដែរ ដោយនេះ គឺជាបញ្ជារបស់ថ្នាក់លើ។ លោកបានថ្លែងថា៖ «ខ្ញុំមិនយល់ដែរ វាជាបញ្ជារបស់ថ្នាក់លើ»។
មន្ត្រីជំនួយការរូបនេះ បានបញ្ជាក់ថា កាលពេលដេញអាជីករចេញ ថាយកកន្លែងនេះ ធ្វើឲ្យមានសណ្តាប់ធ្នាប់ នៅពីមុខទីស្នាក់ការ ដល់ឥឡូវត្រឡប់ទៅដាក់អំប៊ិល និងចតឡានទៅវិញ។
ទស្សនាវដ្ដីមិនអាចសុំកាបំភ្លឺពីលោក សេង សារ៉ន ដែលជាប្រធានផ្សារដើមគបានទេ ដោយទូរស័ព្ទរបស់លោក មិនអាចទំនាក់ទំនងបាន។ ប្រធានផ្សារដើមគ លោក សេង សារ៉ន រូបនេះ ទើបនឹងត្រូវបានផ្លាស់ មកពីផ្សារច្បារអំពៅ កាលពីពេលថ្មីៗនេះ។
យ៉ាងណាក៏ដោយ ក៏បញ្ជាថ្នាក់លើនេះ បានធ្វើឲ្យអាជីវករមួយចំនួន ដែលលក់ដូរឥវ៉ាន់ បន្តិចបន្តួចជួបការលំបាក ព្រោះតែលក់មិនដាច់ដួចមុន តាំងពីពួកគាត់ ត្រូវគេដេញឲ្យទៅលក់នៅកន្លែងថ្មីមក។ លោកយាយ តី ឡេង ដែលមានអាយុ៧៣ឆ្នាំ បានប្រាប់ទស្សនាវដ្តីមនោរម្យ.អាំងហ្វូនៅថ្ងៃទី២ ខែធ្នូនេះដែរថា សម្រាប់កន្លែងចាស់ ដែលលោកយាយលក់ អស់រយះពេល១១ឆ្នាំហើយ មិនដែលមានការដេញចេញបែបនេះទេ។ ទើបតែមកដល់ប្រធានផ្សារថ្មីនេះ ស្រាប់តែបានចេញបញ្ជា ឲ្យរៀបចំសណ្តាប់ធ្នាប់ ហើយដេញអ្នកលក់នៅជិតនោះទាំងអស់។ លោកយាយបន្ថែមថា ចំពោះកន្លែងថ្មីនេះ លោកយាយមិនដឹងពេលណា គេដេញទៀតទេ ហើយការលក់ទៀត ក៏ធ្វើទាំងអារម្មណ៍ភ័យខ្លាច និងមិនដឹងថា មានអ្នកយកលុយគាត់ប៉ុន្មានទៀតឡើយ ទៅថ្ងៃខាងមុខ។ លោកយាយបានត្អូញឡើងថា៖ «ចេះតែលក់ទាំងបារម្មណ៍ទេ រាល់ថ្ងៃហ្នឹង»។
អាជីវករម្នាក់ទៀត នៅក្បែរនោះដែរ អ្នកស្រី សីវ លី បាននិយាយទាំងកាយវិការកំពុងលក់ដូរថា ដំបូងប្រធានគ្រប់គ្រងផ្សារហៅទៅប្រជុំ បន្ទាប់មកឲ្យពួកគាត់ផ្តិតមេដៃ។ ស្រាប់តែពីរបីថ្ងៃក្រោយមក ក៏ដេញអ្នកដែលផ្តិតមេដៃទាំងអស់នោះចេញ ថាយកកន្លែងរៀបចំសណ្តាប់ធ្នាប់ផ្សារ៕