ករណីជម្លោះនៅតាមដងផ្លូវខ្លះ ពិបាក​នឹង​ពន្យល់​គ្នា​ឲ្យ​បាន​យល់​ណាស់ ប្រសិន​បើ​ភាគី​ម្ខាងៗ ចង់​តែ​យក​ឈ្នះ​តែ​រៀង​ខ្លួន​នោះ។ ប៉ុន្តែ​បើ​មាន​តំណាង​អាជ្ញាធរ ឬ​ក៏​តំណាង​រាស្ត្រ​ចូល​ជួយ​អន្តរាគមន៍ ករណី​ជម្លោះ​អាច​នឹង​ងាយ​ដោះ​ស្រាយ ហើយ​អាច​បញ្ចប់​បាន​ឆាប់​ជាង​មុន។

នេះជាករណីជម្លោះមួយ ដែល​បាន​កើត​ឡើង នៅ​ផ្សារ​ដើម​គរ រាជធានី​ភ្នំពេញ កាល​ពី​ព្រឹក​ថ្ងៃទី២៤ ខែ​វិច្ឆិកា ឆ្នាំ​២០១៤​នេះ រវាង​អ្នក​លក់​បន្លែ​ជា​ស្ត្រី​មួយ​រូប និង​កង​កម្លាំង​សន្ដិសុខ​បី​នាក់ ដែល​បង្ក​ឲ្យ​មាន​ការ​ភ្ញាក់​ផ្អើល​យ៉ាង​ខ្លាំង រហូត​មាន​ប្រតិកម្ម​ចូល​ជួយ​អន្តរាគមន៍ ពី​សំណាក់​តំណាង​រាស្ត្រ មក​ពី​គណបក្ស​សង្គ្រោះ​ជាតិ លោក​ស្រី មូរ សុខហួរ។

សាក្សីដែលឃើញហេតុការណ៍នេះផ្ទាល់ បានឲ្យដឹងថា ឡានសន្តិសុខមួយគ្រឿង ដែលបើកបរដោយកង​សន្ដិសុខ​ម្នាក់ឈ្មោះ កុយ កេង បានបើកមកកិនកញ្ជើរបន្លែ របស់ស្ត្រីលក់បន្លែឈ្មោះ តិប ចិន្តា និងបន្ទាប់មក បានចុះមក«ដាល់»ស្ត្រីនោះ ចំមុខយ៉ាងហោចណាស់ មួយកំភ្លៀង។ បន្ទាប់ពីអ្នកស្រី តិប ចិន្តា មាន​បំណង​ចង់ធ្វើការតបតរវិញនោះ ស្រាប់តែមានសន្តិសុខបីនាក់ផ្សេងទៀត បានលេចមុខមកឃាត់ ហើយក៏មានការ​ប្រតាយប្រតប់គ្នា បានកើតឡើងនៅនឹងកណ្តាលផ្លូវ។ សន្តិសុខម្នាក់ ពីក្នុងចំណោមបីនាក់នោះ បានបាន​ប្រើ​សម្តីខ្លាំងៗ ទៅកាន់អ្នកលក់បន្លែថា៖ «នៅឲ្យស្ងៀម ឆាប់អង្គុយចុះភ្លាម!»។ ទិដ្ឋភាពដែលពិបាកមើល ព្រោះ​មនុស្សប្រុសបីនាក់ ធ្វើការបោកចំបាប់ជាមួយមនុស្សស្រីម្នាក់។

នៅក្នុងទីស្នាក់ការគណៈកម្មការគ្រប់គ្រងផ្សារដើមគ និងនៅចំពោះ លោកស្រីតំណាងរាស្រ្ត មួ សុខហួ ដែល​បានធ្វើដំណើរចុះជួបជាអាជីវករមានបញ្ហាក្នុងផ្សារ ហើយបានដឹងហេតុការណ៍នេះដោយចៃដន្យនោះ អ្នក​បើកឡានខាងលើបានសារភាពថា ខ្លួនពិតជាបានទះកំភ្លៀងអ្នកស្រី តិប ចិន្តា ព្រោះស្ត្រីរូបនេះបានជេរគាត់។ អ្នកបើកឡានបានថ្លែងឡើងថា៖ «ជេរខ្ញុំ បានខ្ញុំវ៉ៃ»។

ប៉ុន្តែការលើកឡើងរបស់អ្នកបើកឡាន ត្រូវបានអ្នកស្រី តិប ចិន្តា បដិសេធ ដោយបានបញ្ជាក់ថា គាត់ជា​មនុស្សស្រី មិនអាចតបតរជាមួយកម្លាំងមនុស្សប្រុសបានទេ ហេតុនេះហើយ ទើបគាត់ប្រើសម្តី៖ «កុំបើកឡាន​លឿនពេក កិនបន្លែខ្ញុំអស់ហើយ»។ ស្ត្រីអ្នកលក់បន្លែ​បានថ្លែងប្ដឹងផ្ដល់ទៀតថា គេទះកំភ្លៀងគាត់ប៉ុណ្ណេះ​ហើយ គ្មានអ្នកណាមកជួយគាត់ទេ ស្រាប់តែមានសន្តិសុខពីរបីនាក់ មកចាប់គាត់ថែមទៀត។

ជាដំណោះស្រាយចុងក្រោយ លោកស្រី មូ សុខហួ បានជំរុញឲ្យភាគីទាំងសងខាង បានយល់ព្រមបញ្ចប់រឿង នៅត្រឹមទីស្នាក់ការគណៈកម្មការគ្រប់គ្រងផ្សារដើមគរ ដើម្បីកុំឲ្យរឿងវែងឆ្ងាយ។ សូមទស្សនាវីដេអូ​ខាង​ក្រោម​នេះ (វីដេអូពី​ហ្វេសប៊ុក និងរបស់អ្នកយកព័ត៌មានទស្សនាវដ្ដី) ដូចតទៅ៖