ធី សុវណ្ណថា ជឿ​ថា សមត្ថកិច្ច​នឹង​​ចាប់​ឃាតករ​សម្លាប់​ឧកញ៉ា អ៊ឹង ម៉េងជឺ

កញ្ញា ធី សុវណ្ណថា តារាហ្វេសប៊ុកពូកែថ្វីមាត់ ខាងរិះគន់រដ្ឋាភិបាលមិនសំចៃ បានបង្ហាញភាពជឿជាក់ថា សមត្ថកិច្ច​មុខ​ជា​នឹង​ចាប់​ឃាតករ​ពិត ដែលបាញ់សម្លាប់ លោកឧកញ៉ា អ៊ឹង ម៉េងជឺ បាន ដោយនាងប្រកាសថានឹងជូនរង្វាន់ ជាទឹកប្រាក់​១០០​​ដុល្លារ ដល់នគរបាលរូបនោះ។
Loading...
  • ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី២៤ វិច្ឆិកា ២០១៤
  • កែប្រែចុងក្រោយ: November 25, 2014
  • ប្រធានបទ: តារា
  • អត្ថបទ: មានបញ្ហា?
  • មតិ-យោបល់

កញ្ញា ធី សុវណ្ណថា ដែល​ជា​តារា​ហ្វេសប៊ុក​ពូកែ​ថ្វី​មាត់ ខាង​រិះគន់​រដ្ឋាភិបាល​កម្ពុជា​មិន​សំចៃ បាន​ប្រកាស​ថា​នឹង​ជូន​រង្វាន់ ជា​ទឹក​ប្រាក់​១០០​ដុល្លារ ដល់​ភ្នាក់ងារ​នគរបាល​រូប​ណា ដែល​ចាប់​ឃាតករ​បាញ់​សម្លាប់ លោក​ឧកញ៉ា អ៊ឹង ម៉េងជឺ បាន។ នៅ​លើ​ទំព័រ​ហ្វេសប៊ុក​របស់​កញ្ញា មាន​ដាក់​រូបថត​មួយសន្លឹក​របស់​នាង​ផ្ទាល់​ខ្លួន កាន់​ក្រដាស​​ប្រាក់​ដុល្លារ ១០០​ដុល្លារ​មួយ​សន្លឹក ដោយ​មាន​សរសេរ​ថា «១០០​ដុល្លារ ខ្ញុំ​នឹង​ជូន​ប៉ូលីស បើ​ចាប់​ឃាតករ​បាន។ ប្រាក់​នេះ​តិច​តួច តែ​ជា​ទឹក​ចិត្ត​របស់​ខ្ញុំ​ជា​ពលរដ្ឋ​ម្នាក់ ដើម្បី​ចូល​រួម​លើក​ទឹក​ចិត្ត​ប៉ូលីស ចាប់​ឃាតក។»។

លោកឧកញ៉ា អ៊ឹង ម៉េងជឺ ត្រូវបានឃាតករឈរជំទែង បាញ់ប្រហារដោយកាំភ្លើងខ្លី ប្រមាណជា១០គ្រាប់ កាល​ពី​វេលាម៉ោង ប្រមាណជា ៧ នឹង ១៨ នាទី យប់ថ្ងៃទី ២២ ខែ វិច្ឆិកា ឆ្នាំ២០១៤ ធ្វើឲ្យបុរសមាន​ប្រាក់វ័យ​កណ្ដាល​ម្នាក់នេះ ដេកស្លាប់ភ្លាមៗ ក្នុងថ្លុកឈាមយ៉ាងអាណោចអាធម។ អំពើមនុស្សឃាតនៅជិតរង្វង់​មូល​អាងទឹក កណ្ដាលរាជធានីភ្នំពេញ យ៉ាងជាក់ស្តែងបែបនេះ បានបង្កការតក់ស្លុតដល់ពលរដ្ឋទូទៅ ដោយសារ​ពួកគេយល់ថា សុវត្ថិភាពសាធារណៈក្នុងប្រទេសមួយនេះ មិនមានភាពធានាឲ្យបានច្បាស់លាស់នោះទេ។ ករណីឃាតកម្មជាច្រើន បានកើតឡើង តែឃាតករ និងជននៅពីក្រោយភាគតិចណាស់ ដែលត្រូវបានអាជ្ញាធរ​ចាប់មកផ្ដន្ទាទោស។ តែផ្ទុយទៅវិញ នៅក្នុងករណីខ្លះ គេស្រាប់តែឃើញមានឃាតករសិប្បនិមិត្ត ត្រូវបានចាប់​ឲ្យមកទទួលទោស ជំនួសឃាតករពិតទៅវិញ។

ក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ ធី សុវណ្ណថា កញ្ញាវោហាបានរូបនេះ បានរៀបរាប់ថា៖ «មាន​រឿងក្តីឃាតកម្មច្រើនមែនទែន ប៉ុន្តែអត់មានប៉ូលីសណាចាប់ឃាតករបាន។ អញ្ចឹងហើយក្នុងនាមខ្ញុំជា​យុវជន ខ្ញុំឃើញដំណឹងនេះ ជាដំណឹងមួយដ៏តក់ស្លុត សម្រាប់ប្រជាជនខ្មែរ។»

យ៉ាងណាក៏ដោយ កញ្ញា ធី សុវណ្ណថា តារាហ្វេសប៊ុកវ័យ១៩ឆ្នាំ នៅតែជឿជាក់ថា ឃាតករដែលសមត្ថកិច្ច កំពុងតែស្វែងរកចាប់ខ្លួនមកដាក់ទោសនោះ គឺជាឃាតករពិតប្រាកដ ព្រោះវាផ្ដល់រូបភាពល្អច្រើនដល់​រដ្ឋាភិបាល ហើយវាមិនដូចជាករណីឃាតកម្មពីមុនៗនោះទេ។

កញ្ញា ធី សុវណ្ណថា ពន្យល់បន្ថែមថា៖ «ព្រោះករណីនេះ ឃាតកម្មនេះមានការចាប់អារម្មណ៍ ពីមហាជនក្នុង​ហ្វេសប៊ុក ដោយសារតែពួកគាត់មានប្រព័ន្ធទំនើប អញ្ចឹងសូម្បីតែឃាតករម៉េចក៏ គាត់ជួយវិភាគមុនប៉ូលិស​ទៀត គឺគាត់បានធ្វើការវិភាគ គាត់ឃើញវិដេអូអី គឺគាត់ធ្វើការវិភាគហ្មង ថាឃាតករហ្នឹងមានអីខ្លះៗតាម​កុំព្យូទ័រ ឬស្មាតហ្វូនរបស់ពួកគាត់។ អញ្ចឹងខ្ញុំគិតថា បើប៉ូលីសលើកណ្នឹង ចាប់ខុសចំឃាតករសុប្បនិមិត្តមែន នឹងធ្វើឱ្យមហាជន ឬប្រជាពលរដ្ឋហ្នឹង បាក់ទឹកចិត្តលើប៉ូលីសកាន់តែខ្លាំងជាងមុន។»

បើទោះបីជា ប្រាក់រង្វាន់១០០ដុល្លានេះ ជាការលើកទឹកចិត្តមិនច្រើនដល់សមត្ថកិច្ច ប៉ុន្តែក្រុមអ្នកប្រើប្រាស់​បណ្តាញសង្គមហ្វេសប៊ុកមួយចំនួន បានធ្វើការរិះគន់ និងលើកឡើងទាំងមិនយល់ ពី«អ្វីជាអំពើពុករលួយ»​ថា នាងកំពុងទិញទឹកចិត្តរបស់សមត្ថកិច្ច និង​ប្រព្រឹត្តអំពើពុករលួយ។ មនុស្សមួយចំនួនបានសរសេរថា សន្តាន​ចិត្តដែលកញ្ញាធី សុវណ្ណថា ដែលបានធ្វើ​ការ​សន្យាចំពោះសមត្ថកិច្ចបែបនេះ មិនមែនជាសញ្ញាណល្អទេ។ នេះ​សរបញ្ជាក់ឱ្យឃើញថាភាពស្អាតស្អំ របស់​សមត្ថកិច្ចត្រូវបានបាត់បង់ ការបំពេញតួនាទីនិងភារកិច្ចរបស់​ពួក​គាត់ គឺដើម្បីប្រាក់មិនមែនជាកាត្វកិច្ច។ អ្នក​ប្រើប្រាស់ហ្វេសប៊ុកមួយរូប បានសរសេរថា៖ «ចង់ឲ្យ​សមត្ថកិច្ច​បង្ហាញពីជំនាញពិតប្រាកដ និងភាពទទួល​ខុស​ត្រូវ ក្នុងនាមជាមន្រ្តីរបស់រដ្ឋ ការពាប្រជាពលរដ្ឋ»។

ប៉ុន្តែសម្រាប់មនុស្សមួយចំនួនទៀត បានគាំទ្រ សុវណ្ណថា តារាក្មេងថា៖ «ប្រើលុយ១០០ដុល្លារ ដើម្បីលើក​ទឹកចិត្ត​ប៉ូលីស បែរជាថា ជាទង្វើពុករលួយទៅវិញ។ ខ្ញុំសូមឆ្លើយថា ១០០ដុល្លារ របស់នាង ទោះបីជា​អំពើ​ពុក​រលួយ​ក៏​ដោយ ប៉ុន្តែវាអាចជំរុញទឹកចិត្តប៉ូលីសឲ្យចាប់ឃាតករ មិនដូចបុគ្គលខ្លះ បានតែរិះគន់ ហើយបុគ្គល​មួយ​​ចំនួន​ទៀត ប្រើលុយទឹកចិត្តមនុស្សឲ្យប្រព្រឹត្តអំពើថោកទាប ដួចបុគ្គលដែលបានបាញ់សម្លាប់​លោក​ឧកញ៉ា​​អញ្ចឹង។»

ចំណែកម្ចាស់គណនីម្នាក់ទៀត បានសរសេរគាំទ្រទឹកចិត្តតារាហ្វេសប៊ុកដែរ និងហៅក្រុមអ្នករិះគន់ថា ជា«អ្នក​ដែលចាំតែចាប់កំហុសគេ ចេះតែនិយាយអត់ចេះគិតអីសោះ»។

សម្រាប់កញ្ញា ធី សុវណ្ណថា វិញ បានសរសេរតបថា៖ «លើកទឹកចិត្តប៉ូលីសចាប់ឃាតករខុសដែរឬ? ហេតុអ្វី​រិះគន់ខ្ញុំ? ការឲ្យរង្វាន់ប៉ូលីសចាប់ឃាតករ គឺប្រឈមមុខនឹងកំហឹងឃាតករ តើខ្ញុំចង់បានមុខមាត់ ដោយយក​ជីវិត​ខ្លួនឯងទៅប្រថុយឬ?»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...