សំនុំរឿង​អូហ្វេលី​ស្លាប់​នៅ​កម្ពុជា៖ ក្រុម​គ្រួសារ​ចង់​បាន​ពន្លឺ​យុត្តិធម៌

នាង អូហ្វេលី ប៊េនីស (Ophélie Bégnis) ទេសចរណ៍បារាំងវ័យក្មេង ដែលត្រូវបានគេឃើញស្លាប់អណ្ដែតទឹក ទាំង​កាយ​ននល​គក កាលពីខែកុម្ភះឆ្នាំ២០១៣ នៅក្នុងស្ទឹងកំពតនោះ កំពុងត្រូវបានគ្រួសាររបស់នាង ទាមទារឲ្យរក​យុត្តិធម៌ ដោយ​ពួក​គេ​បាន​សម្រេច​ចិត្ត ធ្វើដំណើរទៅប្រទេសកម្ពុជា ដើម្បីគាស់កកាយរឿងនេះជាថ្មី។
Loading...
  • ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស​ ថ្ងៃទី១១ វិច្ឆិកា ២០១៤
  • កែប្រែចុងក្រោយ: November 12, 2014
  • ប្រធានបទ: ​មនុស្សឃាត
  • អត្ថបទ: មានបញ្ហា?
  • មតិ-យោបល់

សំនុំរឿងដែលកន្លងផុតទៅ ច្រើន​ខែ ច្រើន​ឆ្នាំ អាច​នឹង​ធ្វើ​ឲ្យ​អ្នក​ផង​ភ្លេច ជា​ពិសេស​សម្រាប់​អាជ្ញាធរ​កម្ពុជា ដែល​តែង​រង​ការ​រិះគន់​ថា «គ្មាន​សមត្ថភាព​នឹង​រក​ជន​ល្មើស​ពិត​ប្រាកដ មក​ផ្តន្ទា​ទោស»។ ប៉ុន្តែ​ក្រុម​គ្រួសារ​ជន​រង​គ្រោះ ដែល​អង្គុយ​រងចាំ​យុត្តិធម៌​នោះ នឹង​មិន​ងាយ​ភ្លេច​រឿង​នេះ ជា​មួយ​នឹង​ភាព​ស្ងាត់​ស្ងៀម ធ្វើ​មិន​ដឹង​មិន​លឺ ឬ​ទៅ​ដើរ​ចាប់​ជន​ល្មើស​សិប្ប​និមិត្ត យក​មក​ឲ្យ​ទទួល​ទោស ជំនួស​ឃាតករ​ពិត​នោះ​ឡើយ។

ជាការរំលឹកឡើងវិញ នាងកញ្ញា អូហ្វេលី ប៊ែនីស នាដការិនី និង​ជា​អ្នក​រស់​នៅ​ក្នុង​ក្រុង​លីយ៉ុង (Lyon - ផ្នែក​​ខាង​ត្បូង​នៃ​ប្រទេស​បារាំង) បាន​ចាក​ចេញ​ពី​ប្រទេស​បារាំង នៅ​ចុង​ខែ​មករា ឆ្នាំ​២០១៣ ជា​មួយ​នឹង​មិត្តភ័ក្រ​របស់​នាង​បី​នាក់​ទៀត សំដៅ​ធ្វើ​ដំណើរ​ទេសចរណ៍​វប្បធម៌​មួយ នៅ​ក្នុង​ប្រទេស​កម្ពុជា។ ក្លើ​ម្រាក់​ទាំង​បួន​នាក់ បាន​ទៅ​ដល់​ក្រុង​កំពត នៅ​ថ្ងៃ​ទី៤ ខែ​កុម្ភះ ហើយ​បាន​ស្នាក់​ក្នុង​ផ្ទះ​សំណាក់​មួយ។

ហេតុការណ៍ដ៏សោកស្ដាយបានកើតឡើង នៅប្រាំថ្ងៃបន្ទាប់មក៖ នោះគឺការបាត់ខ្លួនរបស់ អូហ្វេលី ដ៏ស្រស់​ប្រិម​ប្រិយ សូន្យឈឹងតែម្ដង។ ប៉ុន្តែរឿងនេះ កាន់តែធ្វើអ្នកតាមដានសំនុំរឿងមានការតក់ស្លុតខ្លាំងឡើង បន្ទាប់​ពីរូប​រាងការយរបស់ អូហ្វេលី បានអណ្ដែតឡើងក្នុងស្ទឺងកំពត ចម្ងាយប្រមាណជា៣ឬ៤គីឡូម៉ែត្រពីផ្ទះសំណាក់ នៅ​ថ្ងៃទី១០ ខែកុម្ភះ ប៉ុន្តែនាងគ្មានជីវិតទៀតទេ។ អ្នកនេសាទ បានរកឃើញសាកសពរបស់នាង គ្មានសម្លៀក​បំពាក់ ហើយមានរបួសនៅពីលើខ្លួននោះផង។

ជាងពីរខែក្រោយមក ពោលគឺនៅចុងខែមេសាឆ្នាំ២០១៣ បុរសជាតិប៊ែលហ្សិកមួយរូប ត្រូវបានចាប់ខ្លួន និង​ចោទប្រកាន់ដោយអាជ្ញាធរកម្ពុជា ដែលបានចេញមុខប្រកាស នៅតាមប្រព័ន្ធផ្សព្វផ្សាយថា នេះជាលទ្ធផល នៃការតាមចាប់ជនល្មើសមកផ្ដន្ទាទោស។ ប៉ុន្តែការចាប់ខ្លួននេះ មិនមានភស្ដុតាងច្បាស់លាស់ណាមួយផ្សេង ក្រៅតែពីចម្លើយសារភាពរបស់សាក្សីមួយរូប ដែលថាបានឃើញបុរសនោះ បានគ្រវាត់ចោលកង់មួយគ្រឿង ដែលទំនងជាកង់របស់ អូហ្វេលី ជិះនៅមុខពេលបាត់ខ្លួន។

ប៉ុន្តែអវត្តមាននៃភស្ដុតាងដាក់បន្ទុកផ្សេងទៀត បានតម្រូវឲ្យតុលាការចាំបាច់ ត្រូវធ្វើការដោះលែងបុរសជាតិ​ប៊ែលហ្សិកនោះ ជាបណ្ដោះអាសន្ន នៅក្នុងសវនាការថ្ងៃទី១០ ខែមេសាឆ្នាំ២០១៤កន្លងទៅនេះ។ បន្ទាប់​មក​ទៀត បុរសនេះ បានចាកចេញពីប្រទេសកម្ពុជា មកកាត់មាតុភូមិវិញ នៅខែមិថុនា ហើយនៅតែបានប្រកែក នៅ​ចំពោះប្រព័ន្ធផ្សព្វផ្សាយនានារបស់អ៊ឺរ៉ុបថា ខ្លួនមិនមានជាប់ពាក់ព័ន្ធអ្វី នឹងឃាតកម្មលើ អូហ្វេលី នោះទេ។ អញ្ចឹង តើនរណាទៅជាឃាតករ? តើការស៊ើបអង្កេត របស់អាជ្ញាធរមានសមត្ថកិច្ចកម្ពុជា ធ្វើដំណើរ​ទៅដល់ណា​ហើយ? គ្មាននរណាម្នាក់បានដឹងឡើយ។

សម្រាប់គ្រួសាររបស់ អូហ្វេលី ដែលរស់នៅក្រុង លីយ៉ុង ប្រទេសបារាំងឯណោះវិញ ការសង្ស័យមាន​ច្រើន​ករណី។ នេះជាអ្វីដែលជំរុញឲ្យពួកគេ ត្រូវធ្វើដំណើរមកកាន់ប្រទេសកម្ពុជា ដោយផ្ទាល់ជាថ្មីម្ដងទៀត ដើម្បី​គាស់​កកាយសំនុំរឿងនេះឡើងវិញ និងឲ្យខាងតែបាន។ រីឯការស៊ើបអង្កេតរបស់អាជ្ញាធរ ថានឹងអាច​មាន​ភាព​វិវត្តន៍ទៅមុខ ឬយ៉ាងណានោះ ទស្សនាវដ្ដីមនោម្យ.អាំងហ្វូ នឹងព្យាយាមស្វែងរកការបកស្រាយ ពីមន្ត្រីអាជ្ញាធរ​កម្ពុជា មកជម្រាបជូនក្នុងអត្ថបទលើកក្រោយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...