សេចក្តីស្នើច្បាប់ស្តីពី គ.ជ.ប បានបញ្ចប់ជាផ្លូវការ កាលពីថ្ងៃទី១០ ខែវិច្ឆិកា
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី១០ វិច្ឆិការ ២០១៤
- កែប្រែចុងក្រោយ: November 11, 2014
- ប្រធានបទ: បោះឆ្នោត
- អត្ថបទ: មានបញ្ហា?
- មតិ-យោបល់
-
តំណាងគណបក្សប្រជាជនកម្ពុជា (CPP) និងតំណាងគណបក្សសង្រ្គោះជាតិ (CNRP) ជួបគ្នានារសៀលថ្ងៃទី១០ ខែវិច្ឆិកានេះ នៅវិមានរដ្ឋសភា បន្តពិភាក្សាលើសេចក្ដីស្នើច្បាប់ ស្ដីពីការកែទម្រង់ច្បាប់ ស្ដីពីការបោះឆ្នោត ដែលនៅមានភាពប្រទាំងប្រទើសគ្នា លើ១០ចំណុច ស្មើនឹង១០ភាគរយ នាពេលកន្លងមកនោះ។
កន្លងមកក្រុមការងារនៃគណបក្សទាំងពីរនេះ ធ្លាប់បានជួបពិភាក្សាគ្នាជាច្រើនលើកច្រើនសារមកហើយ លើបញ្ហានៃកំណែទម្រង់ប្រព័ន្ធបោះឆ្នោត ពិសេសលើច្បាប់បោះឆ្នោតតែម្តង ដែលសម្រេចបានជាង ៩០ភាគរយទៅហើយនោះ។ ហើយចំណុចសេសសល់នាពេលនេះ នៅត្រង់ការកំណត់ សមាសភាព និងសញ្ជាតិ នៃអគ្គលេខាធិការគណៈកម្មាធិការជាតិ រៀបចំការបោះឆ្នោត។
ជំនួបនាល្ងាចថ្ងៃទី១០ ខែវិច្ឆិកានេះ រួមមានក្រុមការងារខាង គណបក្សប្រជាជនកម្ពុជា មានចំនួន៨នាក់ ដឹកនាំដោយលោក ប៊ិន ឃិន និងសមាជិកចូលរួមមានលោក ជាម យៀប, លោក កើត រិទ្ធិ, លោកព្រុំ សុខា, លោក សក់ សេដ្ឋា, លោកស្រីក្រូច សំអាន, លោក ស៊ិក ប៊ុនហុក និងលោកហ៊ី សោភា។ ឯខាងគណបក្សសង្គ្រោះជាតិ ដឹកនាំដោយលោក កួយ ប៊ុនរឿន និងមានសមាជិកចូលរួមលោក ញ៉ែម បុញ្ញឬទិ្ធ, លោកអេង ឆៃអៀង, លោក គឹម សួរភារិន្ទ, លោក ស៊ុន ឆ័យ, លោក ហូរ វ៉ាន់, និងលោក អ៊ូ ចាន់រិទ្ធិ។
នេះជាជំនួបលើកទី៨ហើយ នៃក្រុមបច្ចេកទេសរបស់គណបក្សនយោបាយ ដែលមានអសនៈក្នុងរដ្ឋសភា រឿងច្បាប់ពាក់ព័ន្ធនិង គ.ជ.ប។ ខណៈនេះ គ.ជ.ប. ចាស់ នឹងនៅបន្តសុពលភាពរបស់ខ្លួន រហូតដល់មានការបង្កើតអង្គការរៀបចំការបោះឆ្នោត ជា«ថ្មី»និងជាផ្លូវការនោះ។ នេះបើយោងតាមកិច្ចព្រមព្រៀង នៃគណបក្សទាំងពីរចុះថ្ងៃទី២២ ខែកក្កដា ឆ្នាំ២០១៤។
តាមការបញ្ជាក់ របស់មន្ត្រីជាសមាជិកម្នាក់ ដែលមានវត្តមានក្នុងកិច្ចប្រជុំនេះ តែសុំមិនបញ្ចេញឈ្មោះ និងបក្ស បានបញ្ជាក់ប្រាប់ទស្សនាវដ្តីមនោរម្យ.អាំងហ្វូក្នុងល្ងាចថ្ងៃទី១០ ខែវិច្ឆិកានេះថា ជំនួបពិភាក្សាថ្ងៃទី១០ ខែវិច្ឆិកានេះ ជាជំនួបលើកចុងក្រោយ មានន័យថា ជាជំនួនផ្តាច់ព្រ័ត្រ បើទោះជាត្រូវគ្នា ឬមិនត្រូវក៏ដោយក៏នឹងបញ្ចប់បញ្ហាក្នុងថ្ងៃនេះតែម្តងដែរ។ បន្ទាប់មក នឹងដាក់លទ្ធផលសរុបទាំងអស់នេះ ជូនថ្នាក់ដឹកនាំទាំងសងខាង ដើម្បីធ្វើការសម្រេចជាចុងក្រោយ។
មន្ត្រីរូបនោះ បានថ្លែងទៀតថា៖ «ការពិតទៅ លទ្ធផលនៃចំនួនប្រជុំស្តីពីច្បាប់បោះឆ្នោតនេះ បានសម្រេចទៅដល់៩០ភាគរយទៅហើយ ក្នុងជំនួបមុននោះ។ នៅតែ១០ភាគរយទេ ដែលត្រូវធ្វើការពិភាក្សាបន្តថ្ងៃនោះ។ យ៉ាងហោចណាស់ក្នុងដប់នេះ ក៏នឹងអាចមានចំណុចមយួយចំនួនទៀត ដែលនឹងត្រូវឯកភាពគ្នា។ (…) អាចបញ្ចប់នៅថ្ងៃនេះ ហើយភាគីទាំងសងខាងនឹងសរុបលទ្ធផល ដាក់ទៅកាន់ថ្នាក់ដឹកនាំរៀងៗដើម្បីពិនិត្យ និងសម្រេច។»៕