កិច្ចប្រជុំដែលធ្វើឡើង​ដោយ​បិទ​ទ្វារ ក្នុង​សាល​ប្រជុំ​អន្តរជាតិ នា​វិមាន​រដ្ឋសភា ថ្ងៃទី០៩ ខែ​តុលា​ម្សិលម៉ិញ​នេះ រដ្ឋមន្ដ្រី​ក្រសួង​ធម្មការ និង​សាសនា លោក មិន ឃិន បាន​បង្ហាញ​ពី​ជំហរ​របស់​លោក​ថា៖ «ពុទ្ធ​សាសន​បណ្ឌិត្យ​នេះ អត់​មាន​ជួល ឬ​លក់ ឬ​ធ្វើការ​អភិវឌ្ឍន៍​អ្វី​ទេ។ យើង​កំពុង​តែ​ទំនាក់ទំនង រក​នីតិវិធី​យ៉ាង​ណា ដើម្បី​រុះរើ​សម្ភារៈ​នោះ​ចេញ ឲ្យ​បាន​កាន់​តែ​ឆាប់​កាន់​តែ​ល្អ។ (…) ការ​សាងសង់​របស់​ក្រុមហ៊ុន​ណាហ្គា​នោះ គេ​ទើប​តែ​ធ្វើ​មិន​ទាន់​បាន​អ្វី​នោះ​ទេ។ បន្ទាប់​ពី​លឺ​ព័ត៌មាន​ថា មាន​ការ​សាងសង់​អនុស្ថានីយ​នៅ​ទី​នោះ ក្រសួង​បាន​បញ្ឈប់​មិន​ឲ្យ​ធ្វើអ្វី​ទាំង​អស់។ (…) ពុទ្ធ​សាសន​បណ្ឌិត្យ​នេះ ជា​កន្លែង​ធ្វើការ​មួយ​នៅ​ក្រោម​ក្រសួង​ធម្មការ និង​សាសនា ហើយ​គ្មាន​ប៉ះពាល់​ទេ ដោយ​សារ​គេ​វិនិយោគ​ផ្លូវ​ក្រោម​ដី។ (…) ក្រុមហ៊ុន​ណាហ្គា​បើក​ការដ្ឋាន​នោះ មាន​កិច្ចសន្យា​សុំ​ខ្ចី​ជា​មួយ​ក្រសួង​ធម្មការ និង​សាសនា តែ​មិន​ទទួល​បាន​កំរ៉ៃ​អ្វី​ពី​ណាហ្គា​ទេ។ ចាប់​ពី​ពេលនេះ​ទៅ គឺ​បញ្ឈប់​តែ​ម្ដង ហើយ​ក្រសួង​កំពុង​តែ​ឲ្យ​ណាហ្គា រុះ​រើ​ចេញ។»

ទោះជាមានការធានាអះអាងយ៉ាងនេះក្តី ប្រធានគណៈកម្មាធិការ អប់រំ យុវជន កីឡា ធម្មការ កិច្ចការ សាសនា វប្បធម៌ និងទេសចរណ៍ នៃរដ្ឋសភា លោក យ៉ែម បុញ្ញឫទ្ធិ បានថ្លែងក្នុងលក្ខណៈមិន​ទុកចិត្ត​យ៉ាង​ដូច្នេះថា លោកនឹងចាត់ឲ្យក្រុមអ្នកតំណាងរាស្ត្រ តាមឃ្លាំមើល ហើយក្នុងនាមគណៈកម្មាធិការទីប្រាំពីរ នៃ​រដ្ឋសភា លោកនឹងស្នើលិខិតទៅប្រធានរដ្ឋសភា លោក ហេង សំរិន ក្នុងការចុះពិនិត្យទីតាំង វិទ្យាស្ថាន​ពុទ្ធ​សាសន​បណ្ឌិត្យ ជាក់ស្តែងតែម្តង។

ការថ្លែងរបស់លោក យ៉ែម បុញ្ញឬទ្ធិ មានលក្ខណៈ«វៃផង អង្អែល»ផង។ លោកបាននិយាយទៀតថា ក្រុម​ការងាររបស់លោក នឹងរៀបចំកញ្ចប់ថវិកា ដើម្បីជួយក្រសួងធម្មការកិច្ចការសាសនានេះ ក្នុងការរៀបចំ​ឡើង​វិញ នូវទីតាំងវិទ្យាស្ថានពុទ្ធសាសនបណ្ឌិត្យ។

ទាក់ទងនឹងករណីនេះដែរ លោកនាយករដ្ឋមន្រ្តី ហ៊ុន សែន ធ្លាប់បានទូលថ្វាយព្រះមហាក្សត្រ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ថាគ្មានការលក់ ជួល ឬដោះដូរពុទ្ធសាសនាបណ្ឌិត្យ​ឡើយ។ យោងតាមលិខិតថ្ងៃទី៦ ខែតុលា ឆ្នាំ២០១៤ របស់លោកនាយករដ្ឋមន្រ្តី បានទូលថ្នាយ​ព្រះ​មហាក្សត្រ ថា ក្រសួងធម្មការ និងសាសនា ក៏បានចេញសេចក្តីថ្លែងការណ៍ ក្នុងការបដិសេធលើការចោទ​ប្រកាន់​ទាំង​នោះ​ដែរ។

សូមរំលឹកថា កន្លងមក មានប្រជាពលរដ្ឋមួយ សិស្ស និស្សិត និងព្រះសង្ឃចំនួនធំ បានបង្ហាញការមិន​សប្បាយ​ចិត្ត និងក្តីព្រួយបារម្មណ៍របស់ពួកគេ ក្នុងការបាត់បង់ទីតាំង វិទ្យាស្ថានពុទ្ធសាសនបណ្ឌិត្យ ដែលជា​ឃ្លាំង​ចំណេះ​ដឹង​សកល នៃប្រជាជាតិខ្មែរពីដូនតា តែបែរជាជំនួសមកវិញ ដោយសណ្ឋាគារ, កាស៊ីណូ (កន្លែង​ស្រីស្រា និង​ល្បែង​ស៊ី​សង​ទៅវិញ)។

សូមទស្សនាកិច្ចសម្ភាសរបស់លោក មិន ឃិន និងលោក យ៉ែម បុញ្ញឫទ្ធិ នៅវិមានរដ្ឋសភា ជាមួយអ្នក​សារព័ត៌មាន​ដូចខាងក្រោម៖