ប្រធានគណបក្សសង្គ្រោះជាតិ លោក សម រង្ស៊ី បានថ្លែងធានាអះអាងថា គណបក្សរបស់លោកមាន​លទ្ធភាព​គ្រប់គ្រាន់ ក្នុងការចូលរួម កសាងប្រទេសជាតិ ក្រោយកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤។ កិច្ច​ព្រមព្រៀងដ៏ទាន់ហន់មួយ ដែលគណបក្សសង្គ្រោះជាតិ បានធ្វើជាមួយ​គណបក្សប្រជាជន​កម្ពុជា ក្នុង​ជំនួប​កំពូល ហ៊ុន សែន-សម រង្ស៊ី នៅថ្ងៃនោះ។ លោក សម រង្ស៊ី បានបន្តថា ការចូលរួមនេះ មាន​ការ​គាំទ្រ​ច្រើន​ពី​បណ្តា​ប្រជាពលរដ្ឋខ្មែរ និងបរទេស ពិសេសប្រជាពលរដ្ឋខ្មែរក្រៅប្រទេស ដែលមានជំនឿ​មុតមាំ ទៅ​លើ​ដំណើរការ​ការងារ របស់គណបក្សសង្គ្រោះជាតិ ដែលអាចអនុវត្តទៅបាន ដោយមាន​ប្រសិទ្ធិភាព និង​អាច​ជួយ​ប្រជា​ពលរដ្ឋ​ងាយរងគ្រោះ។

ប្រធានគណបក្សដ៏ល្បីឈ្មោះ បានថ្លែងបញ្ជាក់ដូច្នេះថា «ពីមុនយើងគ្មានលទ្ធភាពជួយ តែឥឡូវ​យើងមាន​លទ្ធភាពជួយ។ ហើយលទ្ធផលឃើញមាន ជាវិជ្ជមានបណ្តើរៗហើយ។»

ការលើកឡើងខាងលើរបស់លោក សម រង្ស៊ី បានធ្វើនៅចំពោះមុខអ្នកសារព័ត៌មាន នាព្រលានយន្តហោះ​អន្តរជាតិភ្នំពេញ នាព្រឹកថ្ងៃទី១៨ ខែកញ្ញា ឆ្នាំ២០១៤ បន្ទាប់ពីលោកបានវិលមកពីក្រៅប្រទេសវិញ។ លោក​បានបន្ថែមទៀតថា សហគមន៍អន្តរជាតិ បានលើកទឹកចិត្តដល់គណបក្សសង្គ្រោះជាតិ បន្ទាប់ពីបានចូល​អង្គុយក្នុងរដ្ឋសភា ដែលអាចមានលទ្ធភាពរកដំណោះស្រាយដោយសន្តិវិធី ជូនប្រជាពលរដ្ឋ និងប្រទេស​ជាតិ ដែលកំពុងតែប្រឈមនឹងបញ្ហាជាច្រើននោះ។

ទាក់ទងនឹងសំនួរ ដែលអ្នកសារព័ត៌មានបានសួរថា តើគណបក្សសង្គ្រោះជាតិនឹងធ្វើយ៉ាងណា ចំពោះការ​គំរាមបោះឆ្នោតទម្លាក់លោក កឹម សុខា អនុប្រធានគណបក្សសង្គ្រោះជាតិ ចេញពីតំណែងជាអនុប្រធាន​នៃ​រដ្ឋសភា ដោយលោកនាយករដ្ឋមន្រ្តីហ៊ុន សែននោះ? លោក សម រង្ស៊ី បានឆ្លើយទាំងទើសទាល់ មិន​ត្រូវ​សំនួរ និងយ៉ាងប្រញ៉ាប់ប្រញ៉ាល មុននឹងឡើងរថយន្ដថា៖ «អ្វីដែលត្រឹមត្រូវគឺយើងជំរុញឲ្យបន្ត អ្វីដែល​មិន​ត្រឹមត្រូវ គឺយើងត្រូវដាស់តឿន គ្នាទៅវិញទៅមក»។

សំណួររបស់អ្នកសារព័ត៌មាន ទាក់ទងនឹងលើកឡើង របស់លោកនាយករដ្ឋមន្ដ្រី ហ៊ុន សែន ដែលបាន​ថ្លែង​ក្នុងពិធីបើកការដ្ឋាន ស្ពានអាកាសទី៤ (សាលាតិចណូ) កាលពីថ្ងៃទី៩ ខែកញ្ញា ដោយបានព្រមាន លោក កឹម សុខា អនុប្រធានទី១ នៃរដ្ឋសភា មកពីគណបក្សសង្គ្រោះជាតិ ថានឹងប្រមូលតំណាងរាស្ត្រ ពីគណបក្ស​ប្រជាជនកម្ពុជា ឲ្យបោះឆ្នោតទម្លាក់ អនុប្រធានទីមួយ នៃរដ្ឋសភារូបនេះ ប្រសិនណាជាលោក កឹម សុខា ចង់​ប្រើយន្ដការសភា ដើម្បីទម្លាក់នាយករដ្ឋមន្ត្រី ឬរដ្ឋមន្ត្រីណា ដែលប្រព្រឹត្តអំពើពុករលួយ៕