ក្រោយពីបានសងសឹក លើកីឡាករ ឡៅ ស៊ីណាត បានសម្រេច និងក្លាយជាម្ចាស់ពានកិត្តិយស​ របស់​ក្រុមហ៊ុន​គូប៊ូតា កាលពីរសៀលថ្ងៃអាទិត្យ ទី១៧ ខែសីហា ភ្លាម កីឡាករជើងខ្លាំង វង្ស ណយ បានប្រកាស​លាឈប់ពីអាជីពប្រដាល់តែម្ដង ដោយគ្មានការកែប្រែ។ ការប្រកាសលាឈប់នេះ ត្រូវបានកីឡាករប្រដាល់​ដ៏ល្បីល្បាញក្នុងប្រទេសកម្ពុជារូបនេះ ប្រាប់ឱ្យដឹងថា ដោយសារតែលោកមានភាពនឿយណាយ និងធុញ​ទ្រាន់ជាមួយកីឡាប្រដាល់នេះ។

កីឡាករ វង្ស ណយ បានបញ្ជាក់ទស្សនាវដ្ដីមនោរម្យ.អាំងហ្វូ ឱ្យដឹងបន្ត នៅថ្ងៃទី១៨ ខែសីហានេះថា៖ «ដោយ​សារតែខ្ញុំ គឺជាកីឡាករដ៏ល្បីម្នាក់ ប៉ុន្តែជីវភាពរស់នៅរបស់ខ្ញុំ គឺរស់នៅខ្វះខាត មុខក្រោយៗ»។ លោកបន្តថា ការដែលលោកលាឈប់ភ្លាមដូច្នេះ លោកក៏មានការសោកស្តាយណាស់ដែរ ប៉ុន្តែ​កីឡាករ​ជើងខ្លាំងវ័យ២៨ឆ្នាំរូបនេះអះអាងថា ការលាឈប់របស់លោកក្នុងពេលនេះគឺជាការល្អបំផុត ដើម្បីអនាគត​លោកក៏ដូជាក្រុមគ្រួសារលោក។

កីឡាករ ដែលមានកូនប្រុសវ័យជាងកន្លះឆ្នាំរូបនេះបន្តថា៖ «អញ្ចឹងប្រសិនបើខ្ញុំទ្រាំនៅវ៉ៃ បានកម្រៃខ្លួនតិច ហើយបើខ្ញុំពិការដៃពីការជើង តើអ្នកណាចិញ្ចឹមខ្ញុំ ចិញ្ចឹមកូនរបស់ខ្ញុំ។ ប្រដាល់មិនដែលបានលុយច្រើនទេ ឈ្នះក៏បានតែការសរសើរតិចតួច ហើយបើចាញ់ក៏មានតែការស្តីបន្ទោស ហើយគ្មានអ្វីជាដុំកំភួននោះទេ។» លោកបន្ថែមថា ក្រោយពីលាឈប់ពីការប្រដាល់នេះ លោកនៅមិនទាន់មានគម្រោងប្រកបមុខអ្វីផ្សេងទេ ប៉ុន្តែការងារណា ដែលលោកយល់ថា មានភាពងាយស្រួលជាងការប្រដាល់ ដូចជាធ្វើជាកម្មករជាដើម លោក​នឹងធ្វើព្រោះលោកក៏នៅមានកម្លាំងខ្លាំង។

ភា្លមៗនៃការប្រកាសឈប់ប្រកួតរបស់កីឡាកររូបនេះ បានធ្វើមហាជនភាគច្រើនស្លុតចិត្ត និងមាន​ការ​សោក​ស្តាយជាខ្លាំងនូវកីឡាករដែលមានរហ័សនាមល្បីក្នុងក្នុងប្រទេស ខណៈដែលអ្នកគាំទ្រទាំងនេះ បានទទូច​លោកប្ដូរជំហរវិញដែរ ប៉ុន្តែលោក វង្ស ណយ នៅតែរក្សាជំហរថា លោកមិនអាចងាកក្រោយបានទេ។ វង្ស ណយ បញ្ជាក់យ៉ាងដូច្នេះថា៖ «បើសិនជាការសំណូមពររបស់ប្រជាពលរដ្ឋ គឺខ្ញុំអត់ដឹងថា ខ្ញុំអាចទទួល​នូវ​សំណើរនេះបានទេ ប៉ុន្តែគ្រាន់តែថា ប្រសិនបើមានក្រុមហ៊ុនណាចង់ឧបត្ថម្ភខ្ញុំ ខ្ញុំនឹងវាយឱ្យ»៕