អតីតទីប្រឹក្សា របស់ព្រះអង្គម្ចាស់ហ្វីលីព (Philip) ស្វាមីរបស់ព្រះមហាក្សត្រី នៃប្រទេសអង់គ្លេស នឹងត្រូវចូលខ្លួន ទៅឲ្យតុលាការ​កាត់ទោស ចាប់ផ្ដើមពីថ្ងៃច័ន្ទស្អែកនេះទៅ។ បុរសចំណាស់រូបនេះ ត្រូវបានចោទប្រកាន់ ពីបទ​បំពារ​បំពាន លើរូបរាងកាយកុមារីអាយុ១២ឆ្នាំមួយរូប នៅពេលដែលលោកបានធ្វើការបម្រើព្រះញាតិវង្ស កាលពីដើម​ទស្សវត្តឆ្នាំ៧០។

ព្រះមហាក្សត្រីយ៉ានី អេលីហ្សាប៊ែត ទី២ នៃចក្រភពអង់គ្លេស។

សេពសន្ធវៈលើអនិតិជន - ប្រព័ន្ធយុត្តិធម៌នៅបស្ចឹមលោក ពិតជាមិនអាចត្រូវលេងសើចជាមួយបានទេ បើទោះ​ជាហេតុការណ៍ បានកន្លងទៅជិត៥០ឆ្នាំ ទៅហើយក្ដី។ លោក ប៊េនចាមេន ហើរមេន (Benjamin Herman) ដែល​ពេលនេះមានអាយុ៧៩ឆ្នាំ  ត្រូវបានប្រព័ន្ធយុត្តិធម៌អង់គ្លេស ចោទប្រកាន់ពីបទបំពានផ្លូវភេទ ទៅលើកុមារីអាយុ​១២​ឆ្នាំ​មួយរូប នៅអំឡុងទស្សវត្តន៍ឆ្នាំ៧០ ពេលដែលលោកបានធ្វើការក្នុងព្រះរាជវាំង។ លោកនឹងត្រូវបង្ហាញវត្តមាន នៅ​មុខចៅក្រមចាប់ពីថ្ងៃចន្ទទី០៤ ខែសីហានេះតទៅ ដើម្បីឆ្លើយតបនឹងបទចោទប្រកាន់ទាំងឡាយ ដែលបានលើក​ឡើង​ប្រឆាំងរូបលោក។

ស្ត្រីដែលប្រកាសខ្លួនជាកុមារីរងគ្រោះនោះ មានអាយុច្រើនជាង៥០ឆ្នាំហើយនៅថ្ងៃនេះ។ អ្នកស្រីបានសម្រេចចិត្ត​ដាក់​ពាក្យបណ្ដឹង បន្ទាប់ពីមានការបែកធ្លាយករណីរំលោភបំពានផ្លូវភេទ លើជនមិនទាន់គ្រប់អាយុ នៅឆ្នាំ២០០២ ទាក់​ទងនឹងពិធីកររបស់បណ្ដាញទូរទស្សន៍ ប៊ីប៊ីស៊ី មួយរូប លោក ជីមី សាវិល (Jimmy Savil) ដែលជាប់សង្ស័យ ជា​ព្រាន​មួយរូប ក្នុងចំណោមព្រានចាប់រំលោភដ៏អាក្រក់ជាងគេ នៅប្រទេសអង់គ្លេស។

រវាងពីឆ្នាំ១៩៧១ មកដល់១៩៧៤ លោក ប៊េនចាមេន ហើរមេន មានតួនាទីជាអ្នកកាន់សំនុំរឿងផ្ទាល់ខ្លួន របស់​ព្រះអង្គម្ចាស់ហ្វីលីព ស្វាមីនៃព្រះមហាក្សត្រី អេលីហ្សាប៊េត (Elisabeth) ស្ដេចស្រីនៃចក្រភពអង់គ្លេស។ ប៉ុន្មាន​ឆ្នាំ​ក្រោយមក លោកបានក្លាយជាអ្នកមើលការខុសត្រូវលើ ម្ចាស់ក្សត្រី អាន (Anne) បុត្រីរបស់ក្សត្រទាំងពីរខាងលើ។

ដើម្បីស៊ើបអង្កេតលើករណីនេះ ក្រុមនគរបាលនៃចក្រភពអង់គ្លេស បានចូលទៅពិនិត្យសៀវភៅកំណត់ហេតុ របស់​ព្រះរាជវាំង និងបានសាកសួរមនុស្សជាច្រើន ដែលសុទ្ធសឹងធ្លាប់បម្រើការ នៅរាជវាំង។ មកដល់ពេលបច្ចុប្បន្ន នៅ​មិនទាន់មាននរណាម្នាក់ដឹងនៅឡើយថា ក្រុមមនុស្សទាំងនោះបាននិយាយរឿងនេះ ថ្វាយព្រះអង្គម្ចាស់ហ្វីលីព ឲ្យទ្រង់ឆ្វេងយល់ឬយ៉ាងណាទេ។ ប៉ុន្តែយ៉ាងណាក៏ដោយ សម្រាប់ជនជាប់ចោទវិញ បានថ្លែងពីការតស៊ូរបស់លោក ប្រឆាំងនឹងអ្វីដែលលោកនិយាយថា ជាការប្រឌិតរឿងដ៏អាក្រក់មួយ៕