ចំនួនប្រជាពលរដ្ឋ ដែលមកទាមទារឲ្យដោះលែង បេក្ខជនតំណាងរាស្រ្តជាប់ឆ្នោត របស់គណៈបក្សសង្គ្រោះជាតិ នៅខាងមុខសាលាដំបូងរាជធានីភ្នំពេញ មានចំនួនកាន់តែកើនឡើង ពីមួយថ្ងៃទៅមួយថ្ងៃ។ តើឆន្ទះរបស់ពួកគេ ចង់បានអ្វីខ្លះ និងអាចមាននរណាស្ដាប់ឮឬទេ?

ពលរដ្ឋអ្នកតវ៉ា នៅមុខសាលាដំបូងរាជធានី ថ្ងៃទី១៨ ខែកក្កដា ឆ្នាំ២០១៤។ (រូបថត MONOROOM.info/ S. Tith)

សិទ្ធិ - បើគិតមកដល់ពេលនេះ មានរយៈពេល ៤ ថ្ងៃហើយ ដែលការចាប់ខ្លួន បេក្ខជនជាប់ឆ្នោតជាតំណាងរាស្រ្ត​របស់ គណៈបក្សសង្រោះជាតិ ត្រូវបានធ្វើឡើងជាបន្តបន្ទាប់ ដោយអាជ្ញាធររដ្ឋាភិបាល និងតុលាការសាលាដំបូង​រាជធានី​ភ្នំពេញ។ យ៉ាងហោចណាស់ មន្ត្រីជាន់ខ្ពស់ចំនួន៧រូប និងយុវជនមួយរូប ត្រូវបានតុលាការសម្រេចឲ្យឃុំខ្លួន នៅពន្ធនាគារព្រៃសរ ដោយចោទប្រកាន់ ពីបទផ្តើមគំនិតបង្កហិង្សា និងញុះញង់ឲ្យប្រព្រឹត្តបទឧក្រិដ្ឋ នៅក្នុងកំឡុង ពេលក្រុមមន្ត្រីទាំងនោះទាំងនោះ ដឹកនាំបាតុករទាមទារឲ្យមានការដករនាំងដែកចេញ ឫដោះលែង​ទីលាន​ប្រជា​ធិបតេយ្យកាលពីថ្ងៃទី ១៥ ខែ កក្កដា កន្លងទៅនេះ។

លោក ប្រាក់ សាវឿន សកម្មជនបក្សសង្រោះជាតិ ដែលបានមកតវ៉ាទាមទារ ឲ្យមានការដោះលែង​មន្ត្រីបេក្ខជន​តំណាងរាស្រ្តជាប់ឆ្នោត នៅមុខសាលាដំបូង នាព្រឹកថ្ងៃទី ១៨ ខែកក្កដានេះបាននិយាយថា លោកមានការ​ឈឺចាប់​ណាស់ចំពោះ ការចាប់ខ្លួនមន្ត្រីទាំងនេះ។ លោកបានបន្តទៀតថា បើគ្មានការដោះលែង តំណាងរាស្ត្រនោះទេ គាត់​នឹងធ្វើបាតុកម្មបន្តទៀត ដោយមិនខ្លាចស្លាប់ នឹងមិនរត់គេចឡើយ សុខចិត្តឲ្យគេវាយ ប៉ុន្តែថាបាតុកម្មនេះ អាចនឹង​រាលដាលធ្វើទូទាំងប្រទេស។

ពលរដ្ឋម្នាក់ទៀត មកពីខេត្តបាត់ដំបង អ្នកស្រី សូ នី  បានស្រែកខ្លាំងៗ ថ្លែងប្រាប់ទស្សនាវដ្តីមនោរម្យ.អាំងហ្វូ ថា៖ «ខ្ញុំមិនសុខចិត្តទេ ខ្ញុំជាប្រជាពលរដ្ឋខ្ញុំ នឹងនាំគ្នាមកធ្វើមហាបាតុកម្ម គឺថាប្រជាពលរដ្ឋមិនខ្លាចស្លាប់ទេ ព្រោះ​ហេតុ​អី​បានជាចាប់ តំណាងរាស្រ្តទៅដាក់គុក តើច្បាប់យុត្តិធម៍នៅត្រង់ណា រដ្ឋធម្មនុញនៅត្រង់ណាដែល ចាប់តំណាង​រាស្រ្ត​​ដាក់គុក​នេះ»។

រីឯលោក មួង ម៉េង អាយុ ៥៥ឆ្នាំ មកពីស្រុកកោះធំ ខេត្តកណ្តាលបានមកធ្វើការទាមទារ នៅមុខសាលាដំបូង​រាជធានី​ភ្នំពេញដែរ បាននិយាយថា៖ «ខ្ញុំមានការសោកស្តាយ តំណាងរាស្ត្រខ្ញុំ បានខ្ញុំមកតស៊ូយកវិញនឹង បើគេមិនដោះលែ ងខ្ញុំនឹងតធ្វើបាតុកម្ម ទៅមុខទៀត នៅថ្ងៃទី ២២នឹង ដល់២៥លុះត្រាដល់គាត់រួចបានឈប់»។

សូមបញ្ជាក់ថាមកដល់ម៉ោងនេះ មន្ត្រីជាន់ខ្ពស់របស់គណបក្សសង្គ្រោះជាតិ ៧រូប ដែលសុទ្ធសឹង​ជា​បេក្ខជនជាប់​ឆ្នោតជាតំណាងរាស្ត្រ និងយុវជន១រូប ត្រូវបានតុលាការសាលាដំបូង បង្គាប់ឲ្យធ្វើការឃុំខ្លួន នៅក្នុង​រយៈពេលនៃការ​រងចាំថ្ងៃឡើងសវនាការ។ ពីក្នុងចំណោមមន្ត្រីទាំង៧រូប លោកស្រី មូរ សុខហួរ ត្រូវបានតុលាការ​សម្រេចឃុំខ្លួន នៅ​មណ្ឌលអប់រំកែប្រែ«ម២» ដែលជាកន្លែង​អ្នកទោសជាស្ត្រី និងអនីតិជន។ ឯលោក ហូរ វ៉ាន់ លោក មែន សុថាវរិន្ទ្រ លោក រៀល ខេមរិន្ទ្រ លោក កែវ ភីរម្យ លោក នុត រំដួល លោក ឡុង រី និងយុវជន អឿ ណារិត ត្រូវ​បានឃុំ​ខ្លួន​នៅ​មណ្ឌលអប់រំកែប្រែ «ម១»។

ដំណឹងដែលទម្លាយឲ្យដឹង ពីក្រុមអ្នកស្និតនឹងប្រព័ន្ធយុត្តិធម៌របស់ប្រទេសកម្ពុជា បានអះអាងថា មន្ត្រីគណបក្ស​សង្គ្រោះជាតិផ្សេងទៀត រួមនឹងក្រុមសកម្មជនលេចធ្លោជាច្រើននាក់ទៀត របស់គណបក្សប្រឆាំង ក៏អាចនឹងត្រូវ​តុលាការ​​សាលា​ដំបូងមួយនេះ សម្រេចឲ្យចាប់ខ្លួន ដូចគ្នាដែរ៕