ក្មេងស្រីជំទង់អាយុ១៣ឆ្នាំមួយរូប បានរងគ្រោះដោយមុខរបស់នាង ត្រូវបានឆេះរលាក បន្ទាប់ពីនាងបានផាត់ ដាក់​ពណ៌ឲ្យរោមភ្នែក និង​ចិញ្ចើមរបស់នាង។ ការរលាកស្បែកនេះ បានកើតឡើងដោយសារតែមានប្រតិកម្ម ពីផលិត​ផលដែលហាងកែសម្ផស្ស បានផ្ដល់យោបល់​ឲ្យប្រើ។

រូបជំនួស ស្ដីពីរោមចិញ្ចើម និងភ្នែកដ៏ស្រស់ស្អាត។ (រូបថត ឯកសារ)

កែសម្ផស្ស - នៅក្នុងការកែសម្ផស្ស មិនមែនឲ្យតែផលិតផលណាមួយ សុទ្ធតែត្រូវនឹងស្បែករបស់អតិថិជន ទាំង​ស្រុងនោះទេ។ នេះ​ជា​ករណីរបស់ នាងតូចជំទង់អាយុ១៣ឆ្នាំ ឈ្មោះ មីហ្គាន ប៊ីលីងស្លី (Megan Billingsley) ដែល​ព្រឹត្តិការណ៍នេះ បានបង្កឲ្យមាន​ការ​ភ័យ​ភិតមិនស្ទើឡើយ។

តាមការថ្លែងរបស់ម្ដាយនាង ប្រាប់សារព័ត៌មានអង់គ្លេស Daily Mail បានឲ្យដឹងថា មុននឹងចេញទៅវិស្សមកាល​រដូវក្ដៅ មេហ្គាន បាន​ចូលទៅដករោមចិញ្ចើម ជាមួយនឹងមិត្តរបស់នាង នៅក្នុងហាងកែសម្ផស្សមួយ នៃក្រុង ប៊ៀមីហ្គាម (Birmingham - ផ្នែកកណ្ដាល​នៃ​ប្រទេសអង់គ្លេស)។ ប៉ុន្តែក្ដីសុបិន្ដ ដែលចង់ធ្វើខ្លួនឲ្យស្អាត របស់​ក្មេង​ស្រីជំទង់ បានប្រែក្លាយជារឿងដ៏គួឲ្យរន្ធត់ ក្នុងជីវិតរបស់នាង។

ម្ដាយរបស់ មីហ្គាន បានថ្លែងថា៖ «បុគ្គលិកធ្វើការ នៅក្នុងហាងកែសម្ផស្ស បានផ្ដល់យោបល់ឲ្យនាង លាបពណ៌​រោមចិញ្ចើម ហើយនាង​បានយល់ព្រម។ ប៉ុន្តែបុគ្គលិកទាំងនោះ មិនមានព្រមព្រៀងណាមួយ ពីអាណាព្យាបាល​របស់ មីហ្គាន ឬមនុស្សគ្រប់វ័យតាមច្បាប់ ពី​ករណីនេះទេ។»

បន្ទាប់ពីនោះមក មីហ្គាន បានរងនូវប្រតិកម្មដ៏ខ្លាំងក្លាមួយ ពីថ្នាំពណ៌ទាំងនោះ។ រោមចិញ្ចើមរបស់នាង បានរលួយ​រលេះ និងធ្វើឲ្យស្បែក​មុខរបស់នាង រលាកបន្តិចម្ដងៗ។ នៅពេលវិលត្រឡប់ទៅផ្ទះវិញ ក្មេងជំទង់រូបនេះ បានយំ​ទឹកភ្នែកឲ្យរហាម ជាមួយនឹងភ្នែកដែល​រងគ្រោះ​នឹងប្រតិកម្មថ្នាំពណ៌ កាន់តែខ្លាំង។

បន្ទាប់ពីត្រូវបានគ្រួសារបញ្ជូនទៅកាន់មន្ទីរពេទ្យ ដើម្បីសង្គ្រោះជាបន្ទាន់មក សភាពជំងឺរបស់ មីហ្គាន បានគ្រាន់​បើ​ឡើងវិញ តែស្លាក​ស្នាមដែលកើតឡើង ចំពោះរោមចិញ្ចើមរបស់នាង នឹងមិនត្រូវលប់បំបាត់ទៅវិញទេ។ មីហ្គាន និយាយថា៖ «ខ្ញុំឈប់ឈានជើង ចូល​ទៅ​ក្នុងហាងនោះទៀតហើយ។ (...) ខ្ញុំសង្ឃឹមថា រោមចិញ្ចើមរបស់ខ្ញុំ នឹងដុះ​ដូចធម្មតាឡើងវិញ តែខ្ញុំខ្លាចក្រែងតែរឿងនេះ នៅតែអញ្ចឹងរហូត ពេញមួយជីវិតរបស់ខ្ញុំ។»

សម្រាប់ម្ដាយ របស់ មីហ្គាន វិញ បានសម្រេចចិត្ត ប្ដឹងហាងកែសម្ផស្សនោះឡើងតុលាការ ដើម្បីជាការព្រមាន​ពី​ភាព​គ្មានវិជ្ជាជីវះ និង​ប្រាប់ឲ្យម្ដាយឪពុកដទៃទៀត ធ្វើការប្រុងប្រយ័ត្នចំពោះកូនចៅរបស់ពួកគេ៕