បន្ទាប់ពីបាត់មុខរយៈពីពិភពសិល្បៈ ថ្មីនេះតារាចម្រៀង និងសម្តែងកញ្ញា វ៉ាឌី ភាលីង បានលេចមុខសារជាថ្មី នៅលើ​បណ្តាញសង្គមហ្វេសប៊ុក ជាមួយនឹងការបង្ហាញពីតម្រុយចង់វិលចូលសិល្បៈ និងយុទ្ធសាស្រ្តថ្មី មុនពេលដែលនាង​វិល​ត្រលប់ ចាប់ផ្តើមអាជីពជាអ្នកសិល្បៈជាថ្មី។

កញ្ញា វ៉ាឌី ភាលីង អតីតតារាចម្រៀង និងសម្តែង។ (រូបថត ហ្វេសប៊ុក)

តារា - កញ្ញា វ៉ាឌី ភាលីង បានលេចមុខត្រឡប់មកវិញ បន្ទាប់ពីបានបាត់មុខមួយរយៈធំ។ ការបាត់ខ្លួនរបស់នេះ បាន​រងនូវពាក្យចចាមអារ៉ាម ថានាងទៅលួចសម្ងំរស់នៅ ជាមួយបុរសណាម្នាក់។ ប៉ុន្តែព័ត៌មាននេះ ត្រូវបានក្រុម​គ្រួសារ​ចេញមុខច្រានចោល ដោយបានអះអាងបកស្រាយមកវិញថា ការបាត់មុខពី​សិល្បៈរបស់តារាចម្រៀង ដោយសារ​នាង​មាន​បញ្ហា​ខាង​សុខភាពធ្ងន់ធ្ងរ ទើបត្រូវផ្អាកការងារសិល្បៈ ទៅព្យាបាលជំងឺ។ ក្រុមគ្រួសារនាង​ធ្លាប់បានប្រាប់​ឱ្យដឹងទៀតថា ក្រោយពីស្ថានភាពធូរស្រាលវិញ នាងក៏គ្មានបំណងងាក មកបន្តអាជីពចាស់ជាអ្នកសិល្បៈវិញដែរ គឺនាងនឹងចំណាយទុនមួយចំនួន បើកហាងរកស៊ីផ្ទាល់ខ្លួន ។

ប៉ុន្តែថ្មីនេះ នៅក្នុងបណ្តាញទំនាក់ទំនងសង្គម ហ្វេសប៊ុករបស់នាង តារាសម្តែងមានស្បែកសខ្ចី ដើមទ្រូងសិចស៊ី​រូប​នេះ បានយករូបថតចាស់ថ្មីជាច្រើនសន្លឹក មកបង្ហោះក្នុងបំណងមកទាក់ទាញការចាប់អារម្មណ៍ និងបង្ហាញ​សញ្ញាណ​ ចង់បោះជំហានចាប់ផ្តើមអាជីពសិល្បៈជាថ្មីវិញ។ ហើយគោលបំណងមួយទៀត ​គឺចង់ស្ទាប​ស្ទង់ពីអ្នកគាំទ្ររបស់ខ្លួន ថាតើក្រោយពីនាងវិលត្រលប់ មកចាប់អាជីពសិល្បៈវិញ តើប្រជាប្រិយភាពរបស់នាងអាចនូវរក្សាដដែលឬទេ?

អមជាមួយរូបថតស្រស់ស្អាតៗជាច្រើនសន្លឹក តារាចម្រៀង និងសម្តែង វ៉ាឌី ភាលីង ធ្លាប់បានសរសេរសរនៅ​លើ​ទំព័រហ្វេសប៊ុករបស់ខ្លួនថា៖ «ខ្ញុំនឹងត្រឡប់មកវិញឆាប់! សង្ឃឹមថា​ មិត្តទាំងអស់​ នឹងនៅតែបន្តគាំទ្រ (I will came back soon ! Hope all friend stil supported)»។ ការពន្លេចសារបែបនេះ ទស្សនិក និងអ្នកដែលធ្លាប់គាំទ្រនាង​កន្លងមក ប្រាកដច្បាស់ណាស់ថា នាងច្បាស់ជាមានបំណងវិលចូលសិល្បៈវិញ បើទោះបីជានាងធ្លាប់​បង្ហាញ​សារ​ប្រតិកម្ម ជាមួយសារព័ត៌មានដែលចុះផ្សាយថា នាងវិលរកទ្រនំចាស់ក៏ដោយ។

ប្រភពដែលស្ថិតនឹងនាង ក៏បានបង្ហើបប្រាប់ដែរថា ការបង្កើតគណនីហ្វេសប៊ុកថ្មីរបស់ គឺកញ្ញា វ៉ាឌី ភាលីង មាន​ចេតនាចង់ថ្លឹងថ្លែង មើលទីផ្សារសិល្បៈរបស់ខ្លួនដែរថា តើពេលនេះនៅមានទស្សនិកជន អ្នកគាំទ្រនាង ច្រើន​កម្រិត​ណា។

គេនៅចាំបានថា បន្ទាប់ពីនាងបែកបាក់ស្នេហាជាមួយលោក អ៊ិន សុផាណូ តាំងពីនោះមក សកម្មភាពសិល្បៈរបស់ កញ្ញា វ៉ាឌី ភាលីង ហាក់មិនសូវគគ្រឹកគគ្រេង ប៉ុន្មានឡើយ ពោលគឺកាន់តែមានការថមថយបន្តិចម្តងៗ។ ស្របគ្នា​នឹង​ការថមថយសកម្មភាពសិល្បៈនេះ តារាចម្រៀងដែលធ្លាប់ស្រូបយកប្រជាប្រិយភាព ពីសំណាក់ទស្សនិកជន និងជា​សមាជិកក្រុមចម្រៀងរៃមាស តោមាសកញ្ញាវ៉ាឌី ភាលីង ក៏លេចលឺដំណឹងថា នាងជួបម្ចាស់ស្នេហ៍ ជាអ្នកមាន​ទ្រព្យ​ ហាមមិនឱ្យប្រឡូកសិល្បៈ ទើបធ្វើឱ្យនាងអាកខានក្នុងសកម្មភាពសិល្បៈ៕