មេប៉ុស្តិ៍ប្រចាំគោលដៅរោងចក្រ ហារតា (Harta Packaging Factory) ម្នាក់កាលថ្ងៃទី២៥ ខែមិថុនា ឆ្នាំ២០១៤ ម្សិល​ម៉ិញនេះ ត្រូវបានមេរដ្ឋបាលរោងចក្រ ដកនិងបញ្ឈប់ពីការងារ ព្រោះមិនបានអនុវត្ត និងធ្វើអ្វីទៅតាមគំនិត​ដែល​ប្រធានរដ្ឋបាលរោងចក្រនោះចង់បាន។

ភ្នាក់ងារសន្ដិសុខ ព្រាប សាវាត ដែលត្រូវបានបណ្ដេញចេញពីការងារ។ (រូបថត MONOROOM.info/ S.Tith)

បឈ្ឈប់ពីការងារ - មេប៉ុស្តិ៍ប្រចាំគោលដៅរោងចក្រហារតា ប្រចាំការពីម៉ោង៦ព្រឹក ដល់ម៉ោង៦ល្ងាច ត្រូវបាន​ប្រធានតំបន់ (មេរបស់ខ្លួន) ទទួលបញ្ជាពីប្រធានរដ្ឋបាលរោងចក្រហារតា បានសរសេរបញ្ឈប់​ការងាររបស់​លោក​ ព្រោះតែលោកមិនបានសរសេររបាយការណ៍មួលបង្កាច់កម្មករ ដែលធ្វើកូដកម្ម ទៅតាមចិត្តគំនិត នៃប្រធាន​រដ្ឋបាល​នោះចង់បាន។

លោក ព្រាប សាវាត ដែលត្រូវបានបញ្ឈប់ពីការងារនេះ កំពុងព្យាយាមស្វែងរកជំនួយ ដើម្បីជួយការពារនូវសិទ្ធិរបស់​លោកតាមផ្លូវច្បាប់។ លោកបានបន្ថែមថា ប្រធានរដ្ឋបាលរោងចក្រឈ្មោះ សូរ ភក្តី បានបង្ខំឲ្យសរសេរទម្លាក់កំហុស​ទៅលើកម្មកររោងចក្រដែលឈប់ និងធ្វើកូដកម្មនោះថា បានគប់ដបសាំងចូលរោងចក្រនា កាលពីវេលាម៉ោង១០យប់ ថ្ងៃទី២៣ ខែឧសភា ឆ្នាំ២០១៤។ តែលោកមិនបានធ្វើតាម ព្រោះមិនមែនជាការពិត ទើបប្រធានរដ្ឋបានលនោះ​បញ្ឈប់ ពីការងារនៅក្នុងថ្ងៃទី២៥ ខែមិថុនា ឆ្នាំ២០១៤តែម្តង។

ពាក់ព័ន្ធនឹងបញ្ហាចោទប្រកាន់ខាងលើទស្សនាវដ្តីមនោរម្យ.អាំងហ្វូ មិនអាចសុំការបំភ្លឺពីប្រធានរដ្ឋបាលរោងចក្រ ហារតា លោក សូរ ភក្តី បានទេ ដោយពុំមានអ្នកទទួលទូរស័ព្ទ។ តែកាលពីថ្ងៃទី២០ ខែមិថុនា កន្លងមក លោកបាន​បញ្ជាក់ថា រោងចក្ររបស់លោកកំពុងរិះគិតលើវិធីដែលត្រូវដោះស្រាយ ដែលអាចនឹងអនុវត្តតាមក្រុមប្រឹក្សា​អាជ្ញា​កណ្ដាល ឬតុលាការក្នុងបញ្ហាទំនាស់នេះ។

នាល្ងាចថ្ងៃទី២៥ ខែមិថុនាម្សិលម៉ិញនេះដែរ លោក ស៊ីវ៉ាតុម៉ា បានចេញមកសម្រុះសម្រួលជាមួយកម្មករ ដោយ​សន្យាថា នឹងដោះស្រាយបញ្ហានេះជូននៅថ្ងៃស្អែក តាមការបញ្ជារបស់ថៅកែរោងចក្រ។

សូមរំលឹកថា រោងចក្រហារតា (Harta Packaging Factory) ជារោងចក្រផលិតសម្ភារៈវេចខ្ចប់ ដែលមានទីតាំងស្ថិត​ក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ និងមានកម្មករសរុបជាង៥០០នាក់ ។

តាមការលើកឡើងរបស់កម្មករមួយចំនួន ថារោងចក្រហារតានេះ បានផ្លាស់ប្ដូរថៅកែ ជនជាតិម៉ាឡេស៊ី និងជំនួស​មកវិញនូវថៅកែជនជាតិជប៉ុន តាំងពីពេលនោះមកបញ្ហាក៏កើតមានជាបន្តបន្ទាប់។ ទំនាស់រវាងរោងចក្រ និងកម្មករ​នេះ បានអូសបន្លាយពេលវេលាជាងប្រាំខែមកហើយ នៅតែមិនមានដំណោះស្រាយ។ កាលពីថ្ងៃទី២០ ខែមិថុនា​កន្លងមក ក៏ធ្លាប់មានការចូលរួម ពិភាក្សា និងដោះស្រាយរវាងកម្មករ និងរោងចក្រដែរ ប៉ុន្តែការជួបនោះ គឺគ្រាន់តែជា​ការស្នើសុំ​ឲ្យភាគីកម្មករ ឈប់ធ្វើបាតុកម្មតែប៉ុណ្ណោះ៕

សូមទស្សនានូវកិច្ចសម្ភាស បរិយាយពីការបង្ខំរបស់ប្រធានរដ្ឋបាលរោងចក្រ ហារតាដូចខាងក្រោម៖

វីដេអូដទៃទៀត សូមចុចទស្សនា៖ http://monoroom.info/tv