ចម្រៀង - យុវជនម្នាក់ឈ្មោះ Chan Seyha (ចាន់ សីហា) បានយកចម្រៀង«ជាតិខ្មែរមិនមែនល្ងង់ខ្លៅ»នេះ មក​ដាក់​ផ្សាយនៅ​លើ​ទំព័រវីដេអូរបស់ខ្លួន ជាមួយនឹងពាក្យពេជន៍មួយឃ្លារៀបរាប់ថា៖ «ខ្ញុំបាទសង្ឃឹមថា បងប្អូនរួមឈាមខ្មែរ មេត្តា​គិត​និងពិចារណា សូមមេត្តាកុំជឿ តាមការញុះញ៉ុង ព្រមទាំងការបំបែកបំបាក់។ ជាតិយើងរស់ព្រោះយើង​ចេះ​ការពារ ជាតិ​យើងវេទនាព្រោះ ព្រោះអ្នកមានលក់ ឧត្តមគតិ ឲ្យជនផ្តាច់ការ។»។

ចម្រៀងដែលបានចេញជាថាសចម្រៀង តាំងពីទស្សវត្សឆ្នាំ៧០នោះ ត្រូវបានបក​ស្រាយ​ឡើងដោយ អ្នកចម្រៀង​កំពូលអ្នកកំប្លែងដ៏ល្បី លោក មាស សាម៉ន ដែលបានស្លាប់ក្នុងរបបអាវខ្មៅប្រល័យពូជសាសន៍  និងអ្នកស្រី សូ សាវឿន ដែលសព្វថ្ងៃរស់នៅក្នុងប្រទេសបារាំងនៅឡើយ។

ក្នុងបទចម្រៀង មានការលើកឡើងនូវទឹកចិត្តនៃការរួមសាមគ្គីគ្នា ចេះជួយទុក្ខធុរៈគ្នាវាងខ្មែរនិងខ្មែរ។ ជាតិ​ខ្មែរ មាន​ទឹកចិត្តសណ្តោសប្រណី និងហ៊ានស៊ូស្លាប់ខ្លួនព្រោះជាតិ និងក៏​មិន​ចាញ់បោកជនណា ឬជាតិសាសន៍​ណា​ឡើយ។

លោក មាស សាម៉ន ច្រៀងថា៖ «បងប្អូនជាតិខ្មែរចិត្តមិនមែនខ្មៅ មិនមែនល្ងង់ខ្លៅដេកចាំតែស្លាប់ ឃើញខ្មែរ​មាន​ទុកចិត្តខ្មែរឈឺចាប់ច្រើនហួស រៀបរាប់ប្រាប់ក៏មិនអស់»។ រីឯអ្នកស្រី សូ សាវឿន បានបន្តសំនៀងតាមក្រោយថា៖ «ជាតិខ្មែរមានពណ៌ឈាមជ័រតែមួយ បើខ្មែរទុក្ខព្រួយរួមគ្នាស្រណោះ អាល័យអាណិត្តដោយចិត្តស្ម័គ្រស្មោះ សុខចិត្ត​ស្លាប់រស់ព្រោះតែជាតិឯង»។

«ក្តិចចុងច្រមុះ វាហូរទឹកភ្នែក?»

ម្ចាស់គណនេយ្យហ្វេសប៊ុកម្នាក់ទៀតឈ្មោះ Ponloeur Kem (គឹម ពន្លឺ) បានលើកឡើងថា៖ «ដោយសារអ្នកសិល្បះ​ខ្មែរ​ជំនាន់ដើម មានឆន្ទះបំរើជាតិ អញ្ចឹងហើយទើបដឹងថា ហេតុអីក្នុងរបបប៉ុលពត ពួកនេះសម្លាប់អ្នកសិល្បៈខ្មែរ​អស់ មិនដូចតារាអ្នកចំរៀងក្នុងរបបមិត្តសែនទេ លឺតែច្រៀងបទលើកជើងពួកអាក្បត់ជាតិ ដើម្បីចង់ល្បី និងបាន​សក្តិ​ពាក់!»។

លោក មាស សាម៉ន បានបន្តនៅក្នុងល្បៈថ្មីទៀតថា៖ «ក្តិចចុងច្រមុះវាហូរទឹកភ្នែក ហូរដោយសង្វែក​ ព្រោះក្តី​ចម្បែង ខ្មែរប្រុសស្រីគ្រប់ទីកន្លែង អាណិតឈាមឯង ជាតិខ្មែរតែមួយ»។ បន្ទាប់មកទៀត អ្នកស្រី សូ សាវឿន បាន​ចូល​មក​បញ្ចប់ឃ្លាចុងក្រោយថា៖ «ខ្មាំងចាក់រុកខ្មែរ ឲ្យបែក​សាមគ្គីនៅគ្រប់ទិសទី ធ្វើកម្មធ្វើពារ ឲ្យខ្មែរស្អប់ខ្មែរទៅ​ស្រឡាញ់ “វា” សណ្តាណខុសគ្នាស្រលាញ់ម្តេចបាន។»

ចម្រៀងនេះ ត្រូវបាននិពន្ធនិងច្រៀង នៅក្នុងសម័យកាលមួយ ដែលប្រទេសកម្ពុជាកំពុងធ្លាក់ខ្លួន ទៅក្នុងសង្គ្រាម​យ៉ាងខ្លាំងក្លារវាងរបបសាធារណៈរដ្ឋខ្មែរ និងក្រុមទ័ពព្រៃខ្មែរក្រហម។ ប៉ុន្តែក្រុមអ្នកប្រើប្រាស់បណ្ដាញហ្វេសប៊ុក ដែលភាគច្រើនមិនសូវជាចូលចិត្ត ការដឹកនាំរបស់រដ្ឋាភិបាលលោក ហ៊ុន សែន សព្វថ្ងៃ បានយកចម្រៀងនេះ មក​ស្ដាប់និងចែកផ្សាយ ហើយបានធ្វើការផ្ដល់វាចា ដាក់យោបល់តែរៀងៗខ្លួន ក្នុងន័យចំអកឡកលើយដាក់ការដឹកនាំ​ជិត៣០ឆ្នាំមកនេះ។ ម្នាក់ពីក្នុងនោះ បានសរសេរថា៖ «ខ្មែរដឹងល្បិចចោរយូរហើយ តែរើមិនទាន់​រួច​សោះ»៕

សូមស្ដាប់ចម្រៀងនេះឡើងវិញ ដូចតទៅ៖