ប្រព័ន្ធយុត្តិធម៌ - មន្រ្តីសហជីព សម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជា ហៅកាត់ថាស៊ីខាវឌូ ត្រូវ​បាន​តុលាការដោះលែងវិញ កាលពីថ្ងៃទី២៥ ខែឧសភា ឆ្នាំ២០១៤ នៅវេលាម៉ោង៧ និង១៥នាទីយប់ បន្ទាប់ពីពួកគេ ត្រូវ​បានចាប់ខ្លួនកាលពីថ្ងៃទី២៣ ខែឧសភាកន្លងមក។ នេះបើតាមសេចក្តីថ្លែងការណ៍រួម របស់សហព័ន្ធសហជីព​ចំនួន​៤។

សេចក្តីថ្លែងការណ៍បានបន្តថា ទន្ទឹមនឹងការដោះលែងមន្រ្តីសហជីពទាំង៨នេះ សហព័ន្ធសហជីពក៏ស្នើ​ទៅឱ្យ​សាលាដំបូងខេត្តកំពង់ស្ពឺ និងខេត្តកណ្តាលពិនិត្យ និងពីចាររណាតាមផ្លូវច្បាប់ ដើម្បីឱ្យមន្រ្តីសហជីព ៩រូបផ្សេង​ទៀត ដែលមកពីសហព័ន្ធសហជីពអំណាចកម្មករខ្មែរ សហព័ន្ធសហជីពសាមគ្គីភាពការងារកម្ពុជា និងសហព័ន្ធ​សហជីពសេរីកម្មករ ឱ្យមានសេរីភាពឡើង បន្ទាប់ពីបានចាប់ខ្លួន កាលពីដើមខែឧសភា ឆ្នាំ២០១៤ កន្លងទៅ ក្នុង​ពេលធ្វើបាតុកម្មបិទផ្លូវផ្លូវជាតិលេខ៣ និងផ្លូវលេខ៤។

សូមបញ្ជាក់ថា មន្រ្តីសហជីព សម្ព័ន្ធសហជីពប្រជាធិបតេយ្យ កម្មករកាត់ដេរកម្ពុជា ចំនួន៨រូប ត្រូវបានចាប់ខ្លួន​កាលពីថ្ងៃទី២៣ ខែឧសភា ដោយអាជ្ញាធរខេត្តតាកែវ។ ការចាប់ខ្លួនមន្រ្តីសហជីពទាំង៨នេះ ធ្វើឡើងនៅក្នុងពេល​ទៅសម្របសម្រួល កម្មករនៅរោងចក្រជេអេសឌី ដែលបានធ្វើកូដកម្មជាង១សប្តាហ៍ ដើម្បីទាមទារលក្ខខណ្ឌ​ការងារ១៨ចំណុច។ ក្នុងនោះ រួមមាន ទាមទារប្រាក់បាយថ្ងៃត្រង់៤០០០រៀល ប្រាក់រង្វាន់ទៀងទាត់ ១៥ដុល្លារ និងទាមទារមិនគុំគួន ឬ រើសអើងមន្ត្រីសហជីព និងកម្មករដែលចូលរួមតវ៉ាជាដើម។

កាលពីថ្ងៃអាទិត្យទី២៥ ខែឧសភា ម្សិលម៉ិញដដែលនេះដែរ តំណាងអយ្យការអមសាលាដំបូងខេត្តតាកែវ បាន​សម្រេចចោទប្រកាន់លើមន្ត្រីសហជីព ស៊ីខៅឌូ ទាំង៨រូបដែលចាប់ខ្លួន ចំនួន០៤ករណី បន្ទាប់ពីបើកការ​សាកសួរ​ជាថ្មីម្តងទៀត។ បទចោទទាំង៤នោះមាន ទី១. ចោទពីបទញុះញង់ឲ្យប្រព្រឹត្តបទល្មើស តាមមាត្រា ៤៩៥ - ទី២. គំរាមកំហែងនិងធ្វើឲ្យខូចខាតដោយចេតនា តាមមាត្រា៤២៣ - ទី៣. ផ្តើមគំនិតក្នុងអំពើ ធ្វើឲ្យខូចខាតដោយចេតនា មាត្រា២៨ និងទី៤ មិនអនុវត្តន៍សេចក្តីសម្រេចតុលាការ មាត្រា៥២៣ នៃក្រុមព្រហ្មទណ្ឌ។

តែបន្ទាប់ពីបានចោទ​ប្រកាន់នេះហើយ មន្ត្រីសហជីពទាំងនេះ ត្រូវបានដោះលែងវិញនៅពេលយប់។ មូលហេតុ​ដែលឈានទៅដល់ ការដោះលែងឲ្យនៅក្រៅឃុំនេះ នៅមិនទាន់ឲ្យដឹងនៅឡើយ៕