ពីនេះពីនោះ - ឱ្យតែពេលមានភ្លៀងធ្លាក់ម្តងៗ នៅរាជធានីភ្នំពេញ មិនថាជាភ្លៀងត្រឹមតែមួយមេតូចនោះទេ នៅ​តាមផ្លូវតូចធំមួយចំនួន ឬនៅតាមតំបន់ខ្លះទាំងមូលតែម្ដង ត្រូវបានជន់ជោរទៅដោយទឹកល្ហាចល្ហឹម។ នៅ​កន្លែងខ្លះ គេមិនអាចធ្វើដំណើរបានទេ ដោយសារជម្រៅទឹកជន់ជ្រៅពេក ដែលអាចបណ្តាលឱ្យយាន្ត​ជំនិះ​រលត់។ រីឯអ្នករស់​នៅក្នុងរាជធានី ក្នុងតំបន់ខ្លះទៀត ត្រូវសម្របជីវិតរបស់ពួកគេ ទៅនឹងភាពស្មោគរោគ ព្រោះ​តែទឹកភ្លៀងលាយ​នឹង​ទឹកលូ បន្ថែមដោយសម្រាម បានចូលទៅ​ដល់ក្នុងលំនៅដ្ឋានរបស់ពួកគេនោះ​ផង​ទៀត។

មនុស្សកាន់តែច្រើនឡើងៗ បានសម្ដែងភាពធុញទ្រាន់ និងការត្អូញត្អែរនឹងទឹកជំនន់ ហើយបានធ្វើការចំអក និងខ្លះ​ទៀតបានទាំងរិះគន់យ៉ាងចាស់ដៃ ទៅលើរដ្ឋាភិបាល ដែលជាអ្នកទទួលខុសត្រូវ ទៅលើបញ្ហានេះ។ ការរអ៊ូរទាំ​នេះ​ មិនមែនកើតមានឡើង តែនៅលើដងផ្លូវប៉ុណ្ណោះទេ តែនៅលើបណ្ដាសង្គមហ្វេសប៊ុកឯណេះវិញ ក៏ការជជែកគ្នាមាន​ភាពផុលផុសខ្លាំងក្លាណាស់ដែរ។

ម្ចាស់គណនីម្នាក់ឈ្នោះ Sunnry Bou បានលើកឡើងថាថ្នមៗ ដើម្បីកំដៅសាច់ដុំថា៖ «តាំងពីចូលខែពិសាខ ជិត​មួយខែហើយខានភ្លៀង ទើបតែចាប់ផ្ដើមទេប៉ុណ្ណឹង ចុះទំរាំតែភ្លៀងខ្លាំងនោះ យ៉ាងណាទៅ?»។

អ្នកខ្លះ បានលើកយកមូលហេតុមួយមកបកស្រាយថា បញ្ហានេះដោយសារតែរដ្ឋាភិបាលលុបបឹងនានា នៅ​រាជ​ធានី​ភ្នំពេញទើបបានជាភ្លៀងម្តង២ ក្រុង«គុជ»មួយនេះត្រូវលិចទឹក។ ម្ចាស់គណនីឈ្មោះ Chi Hun បាន​បញ្ចេញ​​យោបល់​របស់ខ្លួនថា៖ «ចង់ធ្វើលូ ឪលូ ម៉ែលូទៀត ក៏រកទំនាបសំរាប់ទឹកហូរទៅមិនបានដែរ បើបឹង​ទំពុន ហ៊ុនសែន លក់បាត់​ទៅហើយៗ គេបូមខ្សាច់បំពេញអស់ តើទឹកត្រូវហូរទៅទីណា?»

សម្រាប់អ្នកដែលមានទំនោរទៅរករដ្ឋាភិបាល មិនសូវជាមានមុខចូលមក ធ្វើការជជែកតតាំងជាមួយ ក្រុម​ដែល​ពូកែ​វិភាគ ឬខ្លាំងខាងរអ៊ូរទាំទាំងនេះទេ។ គណនីមួយរបស់ដាក់ឈ្មោះ អង្គភាពប្រតិកម្មរហ័ស ដែលគេ​ជឿថា ជារបស់​លោក ផៃ ស៊ីផាន មន្ត្រីអ្នកនាំពាក្យទីស្ដីការគណរដ្ឋមន្ត្រីនោះ បានវាយបកវិញថា ទាំងនេះជាការ«វាយ​ប្រហារកេង​ចំណេញនយោបាយ»។ «អង្គភាពប្រតិកម្មរហ័ស» បានសរសេរទៀតថា ទីណាក៏​មាន​ទឹក​លិច​ដែរ សូម្បីតែទីក្រុងនៅ​អាមេរិក បារាំង ជប៉ុន។ «យើងមិនគួរបដិសេធ មិនទទួលស្គាល់ភាពរីកចំរើន និងភាព​ស្អាត​ស្អំ នៃទីក្រុងនេះ​បាន​ឡើយ ព្រោះ​រាជរដ្ឋាភិបាលបានខិតខំកសាង ចាប់តាំងពីបាតដៃទទេមកម្លេះ»។

ទំនងជាការលើកឡើងរបស់ «អង្គភាពប្រតិកម្មរហ័ស» មិនបានធ្វើឲ្យខ្លួនពេញចិត្តនោះ Vothey CT បាន​ធ្វើការ​ឆ្លង​ឆ្លើយថា៖ «ខ្ញុំឆ្ងល់ ឃើញតែធ្វើអើយធ្វើ ហេតុអ្វីនៅតែលិចដូច្នេះ នៅពេលណាឈប់លិចទៀត ប្រហែល​មក​ពី​កំពុង​អភិវឌ្ឍទេដឹង ហា៎ហា៎អត់ចេះខ្មាសគេ»។

រីឯក្រុមអ្នកពូកែឌឺដងដាក់ផ្លែដាក់ផ្កានោះ បាននាំគ្នានិយាយបញ្ឆិតបញ្ឆៀង ដាក់សមិទ្ធផលជាង៣០ឆ្នាំ ដែល​កាន់តែ​ខំអភិវឌ្ឍន៍ កាន់តែ«ជួបការលិចទឹក»ទ្វេឡើង។ SP Khmer បានក្លែមសំដីថា៖ «អស់លោកកុំចេះតែ​ថា សម្បូរបែប​ប៉ុណ្ណឹង នៅមិនទាន់គ្រប់គ្រាន់ទៀតឬ ពេលរាំងក្ដៅហែង ហើយមិនថានៅជាយក្រុងទេ គឺនៅក្នុង​ក្រុង​តែម្ដង។ ហើយ​ពេលមានភ្លៀងលិចថ្នល់ ស្ទះផ្លូវរាប់ម៉ោង អភិវឌ្ឍន៍ប៉ុណ្ណឹង ចង់បានប៉ុណ្ណាទៀត? មើល​មាន​ប្រទេសណាដូចទេ?»។

ម្នាក់ទៀតដាក់ឈ្មោះ Pao Bo បានចូលរួមផ្លែផ្កានឹងគេដែរថា៖ «ពួកនេះល្ងង់ណាស់ ផ្លូវសម្តេចធ្វើម៉ាគគោក មិន​ទៅ​ជិះទេ ឆ្ងាញ់តែក្នុងប្រឡាយទឹក ហើយតាំងរិះគន់សម្តេច ថាមិនធ្វើផ្លូវ ពិតជាយ៉ាប់ ហើយសម្តេចមាន​ប្រជា​រាស្រ្ត​​បែប​នេះ នៅក្នុងស្រុក សម្តេចពិតជាឈឺក្បាលស្លាប់ហើយ»។

អ្នកខ្លះទៀតបានបន្ថែមប៊ីចេងចូលជាមួយថា៖ «ដូចជាយ៉ាប់ពេកហើយ អ្នកភ្នំពេញត្រូវទិញទូក ហើយវាពិបាក​រក​កន្លែង​ចត​ទូកទៅទៀត ការពារសុខភាពផង អ្នកនៅភ្នំពេញ»។ រួច Piseth Ly បានបញ្ជោះឲ្យថា៖ «មានអី លិចទឹក​អញ្ចឹង ស្អាតម្យ៉ាងដែរ។ ប៉ុន្តែសូមផ្តាំទៅសាលាក្រុងភ្នំពេញថា យកល្អដាក់ទូកដរ រត់ឈ្នួលកន្លែងដែល​មានទឹក​លិច។»៕