សិទ្ធិ - ក្នុងឱកាសដែលលោកបានអញ្ជើញជាអធិបតី បើកកិច្ចប្រជុំគណៈបញ្ជាការឯកភាព រាជធានីភ្នំពេញ នៅថ្ងៃ​ទី២៩ ខែមេសា ឆ្នាំ២០១៤ នេះលោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានលើកឡើងថា ពេលឃោសនាបោះឆ្នោត ជ្រើសរើសសមាជិក ក្រុមប្រឹក្សារាជធានី-ខេត្ត ស្រុក-ខណ្ឌ ទីតំាងទីលានប្រជាធិបតេយ្យ ក្បែរវត្តភ្នំ និងបរិវេណមុខវត្តបុទុមវតី គឺ«មិនត្រូវបាន»អនុញ្ញាត ឲ្យមានការប្រមូលផ្តុំជួបជុំ និង ហែក្បួនអ្វីទាំងអស់។

លោក ប៉ា សុជាតិវង្ស បានព្រមានថា រហូតមកដល់ពេលនេះ ដោយមានការឯកភាពពីក្រសួងមហាផ្ទៃផងនោះ អាជ្ញាធរមានសមត្ថកិច្ចគ្រប់ប្រភេទ ដែលពាក់ព័ន្ធ បានត្រៀមចាត់វិធានការក្តៅរួចរាល់អស់ហើយ ដើម្បីបង្រ្កាប និង​បោសសំអាត ចំពោះសកម្មភាពគណបក្សនយោបាយណាមួយ ដែលមិនគោរព តាមការណែនំា របស់អាជ្ញាធរ​ក៏ដូចជាក្រសួងមហាផ្ទៃ។

កាលពីថ្ងៃទី១៨ ខែមេសា ឆ្នាំ២០១៤ គណបក្សសង្រ្គោះជាតិ បានដាក់លិខិតស្នើសុំទៅសាលារាជធានីភ្នំពេញ ដោយ​សុំយកទីលានប្រជាធិបតេយ្យ ឬសួនការ៉ូឡាខាងត្បូងវត្តបុទុមវត្តី ដើម្បីជួបជុំធ្វើការឃោសនាបោះឆ្នោតជ្រើសរើស ក្រុមប្រឹក្សារាជធានី ក្រុង ស្រុក ខណ្ឌ អាណត្តិទី២ ដូចដែលមានចែងក្នុងបទបញ្ជា និងនីតិវិធីបោះឆ្នោត។ តែសាលា​រាជធានីភ្នំពេញ មិនបានឆ្លើយតបជាផ្លូវការ ចំពោះលិខិតរបស់គណបក្សសង្រ្គោះជាតិនោះទេ រហូតមកទល់នឹង​ការ​បញ្ជាក់របស់លោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ នៅថ្ងៃទី២៩ ខែមេសា ឆ្នាំ២០១៤​នេះ។

គណបក្សសង្គ្រោះជាតិ នឹងនៅតែរៀបចំការជួបជុំនៅទីលានប្រជាធិបតេយ្យ

បើទោះជាលោក ប៉ា សុជាតិវង្ស បានព្រមានយ៉ាងដូច្នេះហើយក៏ដោយ ក៏គណបក្សសង្រ្គោះជាតិ បានអះអាងថា គណបក្សខ្លួននឹងធ្វើការប្រមូលផ្តុំនៅទីលានប្រជាធិបតេយ្យ។ ក្នុងសេចក្តីថ្លែងការណ៍ចុះថ្ងៃទី២៩ ខែមេសា ឆ្នាំ២០១៤ នេះ គណបក្សសង្រ្គោះជាតិ បានបញ្ជាក់ថា៖ «ក្រោមការដឹកនាំដោយលោកប្រធានសម រង្ស៊ី និងលោកអនុប្រធាន​កឹម សុខា គណបក្សសង្រ្គោះជាតិ នឹងរៀបចំយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នៅថ្ងៃសុក្រ ទី០២ ខែឧសភា ឆ្នាំ២០១៤ នៅទីលានប្រជាធិបតេយ្យ រាជធានីភ្នំពេញ។»

គួរកត់សម្គាល់ថា ការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ នឹងប្រព្រឹត្តទៅ នៅថ្ងៃទី១៨ ខែឧសភា ខាងមុខនេះ។ ហើយដំណើរការ នៃការបោះឆ្នោតនេះ ត្រូវបានគេមើលឃើញថា កើតឡើងក្នុងពេលដែលវិបត្តិ​នយោបាយ ដែលកើតចេញពីភាពមិនចុះសម្រុងគ្នា រវាងគណបក្សប្រជាជនកម្ពុជា និងគណបក្សសង្រ្គោះជាតិ តាំង​ពីក្រោយការបោះឆ្នោតជ្រើសតាំង តំណាងរាស្រ្តអាណត្តិទី៥ កាលពីថ្ងៃទី២៨ ខែកក្កដា ឆ្នាំ២០១៣ បន្តជាប់​គាំង​នៅ​ឡើយ រហូតមកទល់ពេលនេះ៕

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៩ មេសា ២០១៤