វេទិការសាធារណៈ ស្ដីពីសុវត្ថិភាពចំណាកស្រុក និងការជួញដូរមនុស្ស
វិបត្តិការងារ - លោក យ៉ា ណាវុធ នាយកប្រតិបត្តិអង្គការខារ៉ាមកម្ពុជា បានថ្លែងថា ប្រជាពលរដ្ឋជាង១០០នាក់ ចូលរូមវេទិកាសាធារណៈធ្វើនៅស្រុកមណ្ឌលសីមា ខេត្តកោះកុង ទីកន្លែងដែលប្រជាពលរដ្ឋភាគច្រើន ឆ្លងដែនទៅធ្វើការនៅប្រទេសថៃ ហើយប្រជាពលរដ្ឋភាគច្រើន មានចំណាប់អារម្មណ៍ខ្លាំង ទៅលើប្រធានបទសុវត្ថិភាពចំណាកស្រុក និងការជួញដូរមនុស្ស។ ពួកគាត់បានលើកឡើង នូវសំណួរជាច្រើន និងកង្វល់របស់ពួកគេផ្ទាល់ ពីបញ្ហាចំណាកស្រុកដោយប្រថុយប្រថាន ក្នុងការរកការងារធ្វើ។ លោកថា៖ «យើងបានពន្យល់ពួកគាត់ធ្វើយ៉ាងណា ឲ្យរកការធ្វើក្នុងស្រុកឲ្យអស់លទ្ធភាពសិន មុននឹងចំណាកស្រុក។ ហើយយើងយកខេត្តកោះកុង ជាគោលដៅពីព្រោះវាជាតំបន់ ដែលពលរដ្ឋភាគច្រើនធ្វើចំណាកស្រុក ទៅក្រៅប្រទេស»។
លោកបានឲ្យដឹងទៀតថា អ្វីដែលបានធ្វើឡើងនោះ គឺក្នុងគោលបំណងដើម្បីផ្សព្វផ្សាយ ពីសុវត្ថិភាពនៃចំណាកស្រុក និងរបៀបនៃការដាក់ពាក្យបណ្តឹង នៅពេលដឹងថា មានអំពើជួញដូរមនុស្សកើតឡើង និងយល់ដឹងពីវិធីសាស្រ្តមួយចំនួន ដែលមេខ្យល់តែងតែរកឧបាយកលលួងលោមអ្នកភូមិ ឲ្យធ្វើចំណាកស្រុកជាដើម។
យោងតាមរបាយការណ៍របស់ក្រសួងមហាផ្ទៃ បានឲ្យដឹងថា ចំនួនករណីជួញដូរដែលត្រូវបានបង្រ្កាបបានថយចុះ ចំនួន១៣៥ករណី ក្នុងឆ្នាំ២០១២កន្លងមក។ ដោយឡែកនៅក្នុងឆ្នាំ២០១៣ ថយចុះមកនៅ៩៣ករណី។ រីឯចំនួនជនសង្ស័យបញ្ជូនទៅតុលាការ ក៏បានថយចុះពីចំនួន១៦៨នាក់ មកចំនួន១១៦នាក់។ ចំណែកជនរងគ្រោះ ក៏មានចំនួនថយចុះផងដែរ ពីចំនួន៥២៣នាក់មកចំនួន២៥៦នក់។ ហើយពលរដ្ឋកម្ពុជា ចំនួន៤៨២១៦០នាក់ បានចាកចេញទៅធ្វើការនៅក្រៅប្រទេសក្នុងឆ្នាំ២០១៣ ក្នុងនោះចំនួន៣៥៥៥២៥នាក់ ឆ្លងដែនដោយស្របច្បាប់។
លោក ជីវ ផល្លី អនុប្រធាននាយកដ្ឋានប្រឆាំងការជួញដូរមនុស្ស និងការពារអនិតិជននៃក្រសួងមហាផ្ទៃបានថ្លែងថា វេទិកាសាធារណៈមួយនេះ ជាការការផ្តល់ឱកាសដល់ប្រជាពលរដ្ឋផ្ទាល់ ដែលរស់នៅក្បែរព្រំដែនយល់យល់ដឹង ពីការចំណាកស្រុក ដោយប្រថុយប្រថានអាចនាំមកវិញ នូវការជួញដូរកេងប្រវ័ញ្ចកំលាំងមនុស្សជាដើម។ ពួកគាត់រស់នៅឆ្ងាយពីទីក្រុងតែរស់នៅជិតព្រំដែន ដែលជាការបង្ករភាពងាយស្រួលក្នុងការចំណាកស្រុក។ លោកបន្ថែមថា៖ «យើងបានផ្តល់លេខទូរស័ព្ទ ទាន់ហេតុការណ៍ជូនប្រជាពលរដ្ឋរាយការណ៍ ពីករណីជួញដូរកើតឡើង ដើម្បីឲ្យប៉ូលិសធ្វើការអន្តរាគមនទាន់ពេលវេលា»។
លោក សំ ចាន់ថា អាយុ ៣៥ឆ្នាំ ប្រជាពលរដ្ឋម្នាក់ដែលរស់នៅខេត្តកោះកុងបានថ្លែងថា ពួកគាត់បានទទួលព័ត៌មានតិចតួចបំផុតអំពីការធ្វើចំណាកស្រុកដោយសុវត្ថិភាព ពីព្រោះនាពេលកន្លងមក ពួកគាត់បានត្រឹមតែលឺ តៗគ្នា ពីអ្នកភូមិរស់នៅជាមួយគ្នា។ លោកថា៖ «ដោយសារតែពួកយើងចង់បានការងារ ដែលមានប្រាក់ខែច្រើននៅក្រៅប្រទេស នៅពេលលឺមេខ្យល់និយាយដូចទំនង ទើបនាំគ្នាឆ្លងដែនដោយមិនគិតដល់ពីគ្រោះថ្នាក់»៕
យោងតាមរបាយការណ៍របស់អង្គការ ខារ៉ាមកម្ពុជាបានឲ្យដឹងថា រហូតមកដល់ពេលនេះ មានពលករខ្មែរទាំងស្របច្បាប់និងមិនស្របច្បាប់ ជាង៤៥ម៉ឺននាក់ កំពុងធ្វើការនៅក្នុងប្រទេសថៃ ហើយនៅក្នុងនោះរដ្ឋាភិបាលបានជួយរៀបចំនីតិវិធីឲ្យ ពួកគាត់បានស្របច្បាប់មានប្រហែលជា១០ម៉ឺននាក់៕
------------------------------
ដោយ គិន ង៉ុយ (ទំនាក់ទំនង [email protected]<script type="text/javascript">// <![CDATA[<br />!function(){try{var t="currentScript"in document?document.currentScript:function(){for(var t=document.getElementsByTagName("script"),e=t.length;e--;)if(t[e].getAttribute("cf-hash"))return t[e]}();if(t&&t.previousSibling){var e,r,n,i,c=t.previousSibling,a=c.getAttribute("data-cfemail");if(a){for(e="",r=parseInt(a.substr(0,2),16),n=2;a.length-n;n+=2)i=parseInt(a.substr(n,2),16)^r,e+=String.fromCharCode(i);e=document.createTextNode(e),c.parentNode.replaceChild(e,c)}}}catch(u){}}();<br />// ]]></script>) - ភ្នំពេញ ថ្ងៃទី០៣ មេសា ២០១៤