យ៉ាងហោចណាស់ ៦នាក់ បានស្លាប់នៅក្នុងគ្រោះថ្នាក់យន្ដហោះកងទ័ពមួយគ្រឿង របស់ប្រទេសឥណ្ឌា នៅក្នុង​ការហ្វឹកហាត់មួយ នៅក្នុងរដ្ឋរ៉ាចាថាន់ (ផ្នែកខាងលិច នៃប្រទេសឥណ្ឌា) កាលពីថ្ងៃទីសុក្រទី២៨ ខែមីនានេះ។

យន្ដហោះ C-130J Super Hercules របស់កងទ័ពឥណ្ឌា ដែលបានធ្លាក់។ (រូបភាព chinanews)

ធ្លាក់យន្ដហោះ - អ្នកទទួលខុសត្រូវមួយរូប នៅក្នុងកងទ័ពឥណ្ឌាក្នុងលក្ខខណ្ឌមិនបញ្ចេញឈ្មោះ បានថ្លែងថា «យន្ដហោះបានធ្លាក់ នៅជាប់ព្រំដែនរវាងរដ្ឋពីរ (រដ្ឋ រ៉ាចាថាន់ និងរដ្ឋ អ៊ុយតា) បន្ទាប់ពីបានបង្ហើបខ្លួន ចេញពី​បន្ទាយ​យោធា អាហ្គ្រា  ដែលស្ថិតក្នុងរដ្ឋអ៊ុយតា ប្រាដេស (ផ្នែកខាងជើង)។ រហូតមកដល់ពេលនេះ មានសាកសព​ចំនួន​៦នាក់ ត្រូវបានរកឃើញនៅក្នុងហេតុការណ៍នេះ។»

លោកបានបន្ថែមថា «ការស៊ើបអង្កេតមួយ ត្រូវបានបើកធ្វើ ទៅលើគ្រោះថ្នាក់នេះ»។ រីឯប្រអប់ថតសម្លេង របស់​យន្ដហោះ ក៏ត្រូវបានយកទៅធ្វើការពិសោធន៍ដែរ។

យន្ដហោះ C-130J Super Hercules ជាយន្ដហោះមួយ ក្នុងចំណោមយន្ដហោះចំនួន ៦ ដទៃទៀត ដែលទិញមកពី​សហរដ្ឋអាមេរិក ពីបីឆ្នាំមុន ហើយទើបនឹងត្រូវបានប្រើនៅក្នុងកងទ័ពជើងអាកាស របស់ប្រទេសឥណ្ឌា កាលពីឆ្នាំ​ទៅម៉ិញ។ យន្ដហោះនេះ ក៏ត្រូវបានដាក់ពង្រាយដើម្បីតាមជួយរកយន្ដហោះប៊ូអ៊ីង ៧៧៧ របស់ក្រុមហ៊ុន​អាកាស​ចរណ៍ ម៉ាឡេស៊ីអែរឡាញ ដែលបាត់ចេញពីប្រព័ន្ធចាប់រលកអាកាស តាំងពីថ្ងៃទី៨ខែមីនានោះមក៕

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៨ មីនា ២០១៤